LD ប្រើពេលជិត ១ឆ្នាំ សិក្សារឿងរ៉ាវពិតនៃសោកនាដកម្មភ្លើងឆេះក្លិបក្រោមដី ផលិតជារឿង ក្រោមការយល់ព្រមពីគ្រួសារជនរងគ្រោះ

ក្រោយបង្ហើបខ្លឹមសារនៃភាពយន្តថ្មី ដែលដកស្រង់ចេញពីសោកនាដកម្មភ្លើងឆេះក្លិបក្រោមដីប៉ុន្មានឆ្នាំមុន លោក លៀក លីដា ផលិតករនិងជាម្ចាស់ផលិតកម្ម LD បានបញ្ជាក់ថា ភាពយន្តនេះ ត្រូវបានសិក្សានិងយកចិត្តទុកដាក់អស់រយៈពេលជិតមួយឆ្នាំ ដើម្បីផលិត។

ជុំវិញរឿងរ៉ាវនៃការផលិតភាពយន្តដកស្រង់ពីហេតុការណ៍ពិតនេះ លោក លៀក លីដា បានឱ្យដឹងថា គឺចាប់ផ្ដើមផលិតឡើងដោយមានការយលព្រមរបស់គ្រួសារនៃសព ស្ត្រីជាប្រពន្ធ ដែលត្រូវបានបាត់បង់ប្ដីជាទីស្រលាញ់ ហើយថែមទាំងឈរមើលការរៀបការទាំងឈឺចាប់របស់ព្រលឹងប្ដីជាមួយនឹងព្រលឹងស្រីកំណាច។

ក្រោមការផលិតយ៉ាងយកចិត្តទុកដាក់ពីផលិតកម្ម រឿងពិតដែលនៅពីក្រោយសោកនាដកម្មភ្លើងឆេះក្លិបក្រោមដីនេះ នឹងត្រូវបើកបង្ហាញជូនតាមរយៈរឿង “៧ថ្ងៃនៃអាពាហ៍ពិពាហ៍ម៉ានីកាំង” ដែលគ្រោងនឹងដាក់ជូនទស្សនា ខណៈពេលវេលានៃការចាក់បញ្ចាំងជាក់លាក់ ខាងផលិតកម្មពុំទាន់បានលម្អិតនៅឡើយទេ ប៉ុន្តែក៏បានបញ្ជាក់ថា ឆាប់ៗនេះ។

គួររំលឹកថា ភាពយន្តថ្មីនេះ ដកស្រង់ចេញពីហេតុការណ៍ពិតមួយ កាលអំឡុងពេលនៃវិបត្តិជំងឺកូវីដ១៩ ពោលគឺមានទំនាក់ទំនងនឹងហេតុការណ៍ភ្លើងឆេះក្លិបកម្សាន្តក្រោមដីមួយកន្លែង ដែលមានភាពល្បីល្បាញខ្លាំង និងត្រូវបានគេចែករំលែកពេញបណ្តាញទំនាក់ទំនងសង្គម។ ដោយចាប់អារម្មណ៍លើរឿងរ៉ាវពិតមួយនេះ ផលិតកម្ម LD ក៏សម្រេចផលិតភាពយន្តនេះឡើង ដើម្បីចែកជូនមហាជនទស្សនា ខណៈតាមតម្រុយដែលបញ្ជាក់ អាចនឹងមិនយូរឡើយ៕