អតីតស្វាមី រងការចោទ កេងប្រវ័ញ្ចការស្លាប់ Barbie ខណៈមិត្តស្រីទម្លាយថា លោកនិងម្ដាយគឺជាជនបង្ក

អ្នករិះគន់បានចោទប្រកាន់អ្នកជំនួញជនជាតិចិន Wang Xiaofei ថា បានប្រើការស្លាប់របស់អតីតភរិយាគឺតារាសម្ដែងស្រីតៃវ៉ាន់ Barbie Hsu ឬសាន់ឆាយ ដើម្បីបង្ហាញពីខ្លួនគាត់ជាអតីតស្វាមីដែលលះបង់ ហើយមានសក្តានុពលក្នុងការទាមទារទ្រព្យសម្បត្តិរបស់នាង។

យោងតាមកាសែត Tien Phong បន្ទាប់ពីក្រុមគ្រួសាររបស់ Barbie បានបញ្ជាក់ពីការស្លាប់ក្នុងអាយុ ៤៨ឆ្នាំកាលពីថ្ងៃច័ន្ទ លោក Wang Xiaofei បានចូលរួមក្នុងការកាន់ទុក្ខជាសាធារណៈមួយចំនួន។ គាត់បានកាត់បន្ថយវិស្សមកាលនៅប្រទេសថៃជាមួយប្រពន្ធថ្មីគឺ Mandy Ma ហើយប្រញាប់ត្រឡប់ទៅតៃវ៉ាន់វិញភ្លាមៗ។ ពេលមកដល់អាកាសយានដ្ឋាន គាត់ហាក់ដូចជាមានទុក្ខព្រួយខ្លាំង ដោយបានឱនក្បាលចុក្ះរោម និងអង្វរអ្នកសារព័ត៌មានឲ្យនិយាយសប្បុរសពីនាង និងថា Barbie Hsu នៅតែជាសមាជិកគ្រួសារគាត់ជានិច្ច។

មិនតែប៉ុណ្ណោះ អតីតស្វាមីសាន់ឆាយ ក៏បានផ្លាស់ប្តូររូបភាពនៅលើ Douyin ទៅជាពណ៌ខ្មៅ ដែលជាសកម្មភាពនៃការកាន់ទុក្ខបែបប្រពៃណី។ ប៉ុន្តែ ក្រោយមកគាត់បែរជាជំនួសវាដោយរូបថតខ្លួនឯង និងកូនស្រី ដែលធ្វើឲ្យមានការសង្ស័យអំពីភាពមិនស្មោះត្រង់នៃទុក្ខសោកមួយនេះ។

ការរិះគន់ជាសាធារណៈកាន់តែខ្លាំងឡើង បន្ទាប់ពីលោកបានបញ្ចេញមតិលើឃ្លិបវីដេអូមួយ ក្នុងកម្មវិធីទូរទស្សន៍កាលពីមុន ដែលមានរូបលោក និងអតីតភរិយាដោយសរសេរថា «ប្រពន្ធខ្ញុំៗនឹកអ្នកខ្លាំងណាស់» ។ ក្រោយមក លោកបានកែសំណេរទៅជា «ខ្ញុំនឹកអ្នកខ្លាំងណាស់» មុនពេលលុបវាចោលទាំងស្រុង ហើយជំនួសវាដោយមតិមួយទៀតដែលសរសេរថា «វាគួរតែជាខ្ញុំទេ ដែលជាអ្នកត្រូវស្លាប់» ។

ទោះបីជាបែបណាក៏ដោយ មកដល់ពេលនេះរូបថតអេក្រង់នៃការអត្ថាធិប្បាយរបស់គាត់ បានរីករាលដាលយ៉ាងឆាប់រហ័ស ដែលគ្របដណ្តប់លើការពិភាក្សានៅលើប្រព័ន្ធផ្សព្វផ្សាយសង្គម Weibo របស់ប្រទេសចិន ខណៈពេលដែលអ្នកខ្លះសម្តែងការអាណិតអាសូរចំពោះបុរសត្រកូល Wang អ្នកផ្សេងទៀតបានចោទសួរថា តើភរិយាបច្ចុប្បន្នរបស់គាត់មានអារម្មណ៍យ៉ាងណា ចំពោះការកាន់ទុក្ខយ៉ាងខ្លាំងទៅកាន់អតីតភរិយា។

ចំណែកអ្នកខ្លះក៏បានថ្កោលទោសទង្វើគាត់ថា មិនសមរម្យ ដោយសារគាត់ និងតួឯកស្រីសាន់ឆាយ បានលែងលះគ្នាតាំងពីខែវិច្ឆិកា ឆ្នាំ ២០២១​ មកម៉្លេះ។ អ្នកទាំងពីរសុទ្ធតែបានរៀបការសារជាថ្មី ក្នុងពេលដែលលោកបានចុះបញ្ជីអាពាហ៍ពិពាហ៍ជាមួយភរិយាថ្មី អាយុ ២៦ ឆ្នាំក្នុងខែឧសភា ឆ្នាំ ២០២៤ ខណៈដែល Barbie បានរៀបការជាមួយ DJ Koo អាយុ ៥៥ ឆ្នាំនៅខែកុម្ភៈ ឆ្នាំ ២០២២ ។

ថ្វីដ្បិតតែថាយ៉ាងនេះ បន្ថែមលើភាពចម្រូងចម្រាសកាន់តែលើសមុនទៀតនោះគឺថា អតីតមិត្តស្រីរបស់ Wang Xiaofei​ គឺតារាសម្ដែងចិន Zhang Yingying បានបរិហារគាត់ជាសាធារណៈនៅលើ Weibo ដោយចោទប្រកាន់ថា បានកេងចំណេញការស្លាប់របស់ Barbie ដើម្បីធ្វើរូបភាពជាបុរសដែលលះបង់ និងខូចចិត្ត ហើយលាបពណ៌ខ្លួនឯងជាជនរងគ្រោះ ខណៈពេលដែលអ្នកដែលស្រលាញ់សាន់ឆាយយ៉ាងពិតប្រាកដ គឺជាគ្រួសារនិងប្តីក្រោយ ដែលពួកគេប្រឈមមុខនឹងការយាយីតាមអ៊ីនធឺណិត។។

នាង​ថែមទាំង​អះអាងទៀត​ថា លោកនិង​ក្រុម​គ្រួសារ​របានធ្វើបាប​តួសាន់ឆាយ និង​ទាញ​យក​កេរ្តិ៍ឈ្មោះ​នាង​ដើម្បី​ចំណេញ​ផ្នែក​ហិរញ្ញវត្ថុ។​ ដូច្នេះ លោកគឺជាជាអ្នកទទួលខុសត្រូវចំពោះការលំបាកដែលអតីតភរិយាធ្លាប់បានលះបង់ក្នុងអំឡុងពេលអាពាហ៍ពិពាហ៍ ដែលមានរយៈពេលពីឆ្នាំ ២០១១ ដល់ឆ្នាំ ២០២១។ នាង​បាន​រៀបការ​ហើយ​ប្តូរ​ពី​ការ​បួស​មក​ញ៉ាំ​សាច់​ឲ្យ​អ្នក​ពេល​នាង​មាន​ផ្ទៃពោះ​, នាង​បាន​គាំទ្រ​អាជីព​របស់​លោកដោយ​ខ្ចី​កម្ចី​សម្រាប់​អាជីវកម្ម​ដោយមិនទាមទារវិញ​។ នាង​បាន​ប្រថុយ​ជីវិតផុយស្រួយ​ ដើម្បី​សម្រាល​កូនដល់ទៅ៤ដង។ លោកនិងម្ដាយ គឺជាដែល​បំផ្លាញ​សុខភាព​ដំបូង​របស់​នាង និងតែងតែកេងប្រវ័ញ្ចឋានៈជាតារាល្បី ដើម្បីផលប្រយោជន៍ផ្ទាល់ខ្លួន ព្រមទាំងទាមទារបង្ខូចកេរ្តិ៍ឈ្មោះ វាយប្រហារនាងតាមអ៊ីនធឺណិតមករហូត៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖​ សាង​ ស្រីល័ក្ខ

ចុចអាន៖អតីតម្តាយក្មេក សាន់ឆាយ រងការរិះគន់ពីមហាជនថា ធ្វើរឿងមិនសមរម្យ កំឡុងពេលកាន់ទុក្ខ