លាតត្រឡាងការពិតនៃអាពាហ៍ពិពាហ៍! ក្រោយមានការវែកញែកជីវិតគូស្វាមីភរិយាតារាចម្រៀងរ៉េប G-Devith

ក្រោយផ្ទុះការវែកញែក រឿងគូរស្វាមីភរិយាតារារ៉េបល្បីឈ្មោះ G-Devith និងអ្នកនាង ទេព បូព្រឹក្ស សាធារណជនជាច្រើន បានគាស់កកាយរឿងរ៉ាវពិតពីប្រសាសន៍ចាស់ទុំគ្រួសារនេះ ឱ្យអ្នកដែលទើបតែតាមដានជីវិតគូស្នេហ៍ចម្រៀងរ៉េបមួយគូនេះ បានដឹងថា កន្លងមកដោយសារតែវិបត្តិជំងឺកូវីដ ទើបធ្វើឱ្យខកខានមិនបានរៀបចំកម្មវិធីអាពាហ៍ពិពាហ៍។ ប៉ុន្តែកាលណោះ គ្រួសារទាំងសងខាង បានឯកភាពគ្នាធ្វើពិធីផ្សំផ្គុំជាលក្ខណៈគ្រួសារ និងចុះអេតាសុីវិល ហើយរង់ចាំពេលវេលាសមស្របដើម្បីរៀបអាពាហ៍ពិពាហ៍តាមក្រោយ។

សម្រាប់អ្នកដែលនិយមតាមដានវិស័យចម្រៀងរ៉េប ពិសេសអ្នកគាំទ្រស្វាមីភរិយាមួយគូនេះ ប្រាកដជាបានជ្រាបច្បាស់ហើយថា កាលពីពេលកន្លងទៅថ្មីៗនេះ អ្នកទាំងពីរបានឱ្យតម្រុយពីការចង់រៀបចំកម្មវិធីមង្គលការរបស់ខ្លួនជារឿយៗ និងទើបតែបង្ហាញរូប Pre-Wedding លើកទី២របស់ខ្លួន លើទឹកដីអង្គរផងដែរ ខណៈកាលពីឆ្នាំ២០១៩ តារាចម្រៀងគូស្នេហ៍មួយគូនេះ បានបង្ហាញរូប Pre-Wedding ម្តងរួចទៅហើយ ដែលបានថតនៅទីតាំង កោះម៉ាឌីវ ។

តួយ៉ាង ដោយខកខានដោយសារវិបត្តិជំងឺកូវីដ១៩ ក៏ដូចជាមមារញឹកនឹងការងារសិល្បៈខ្លាំង ស្វាមីភរិយាមួយគូនេះ មិនចង់មានត្រឹមពិធីតូចដែលចាស់ទុំដឹងឮ និងអេតាសុិវិលប៉ុណ្ណោះទេ អ្នកទាំងពីរនៅតែមានចិត្តចង់រៀបចំពិធីមង្គលការតាមទំនៀមទម្លាប់ដដែល។ ខណៈទើបតែប្រកាសថ្មីៗនេះថា ថ្ងៃសំខាន់ខ្លួនគ្រោងរៀបចំធ្វើនៅថ្ងៃទី ០៧ ខែមិថុនា ឆ្នាំ២០២៥ ខាងមុខ។

ដោយឡែក ពាក់ព័ន្ធនឹងរឿងរ៉ាវនៃការវែកញែកជីវិតប្តីប្រពន្ធមួយគូនេះ មិនចប់មិនហើយ ជុំវិញការយល់ខុសជាញឹកញយលើរឿងបញ្ហា “ទុំមុនស្រគៀល ឬកូនឥតខាន់ស្លា ឬ ទម្ងន់មុនការ…។ល។ សាធារណជនមួយចំនួនបានចូលរួមជួយលាតត្រដាងការពិតដល់អ្នកពុំបានដឹង ខណៈក្នុងនោះ ម្ចាស់គណនីហ្វេសប៊ុក Carbon Dioxide បានលើកឡើង ៣ ចំណុច៖

សំណេរ “ក្នុងនាមជាឪពុកម្ដាយទាំងសងខាងបានឯកភាពគ្នាធ្វើពិធីផ្សំផ្គុំជាលក្ខណៈគ្រួសារ និងចុះអេតាស៉ីវិល (សំបុត្រអាពាហ៍ពិពាហ៍)…” ជាឃ្លាដែលបញ្ជាក់យ៉ាងច្បាស់ថា៖

១. គ្រួសារនេះគឺបាន ក្លាយជាគូស្វាមីភរិយាស្របតាមប្រពៃណី។ ការផ្សំផ្គុំជាលក្ខណៈគ្រួសារ មានការដឹងឮទទួលស្គាល់ពីមេបា សាច់ញាតិទាំងសងខាង រាប់ចាត់ទុកថាជាអាពាហ៍ពិពាហ៍ខ្នាតតូច ជាគ្រួសារពេញដោយចំណង ៥ប្រការ មិនខ្វះចន្លោះនោះទេ។ រីឯកូន ដែលកើតមកក៏រាប់ជាកូនមានខាន់ស្លា។

២. ជាក់ស្ដែងប្រសិន គូរសង្សារណាក៏ដោយដែលជ្រុលជ្រួស ទុំមុនស្រគៀល បើគ្រួសារទាំងសងខាងបានដឹងឮទទួលស្គាល់ និងបានរៀបចំពិធីផ្សំផ្គុំសែនព្រេន គឺចាត់ទុកថាបានរៀបអាហ៍ពិពាហ៍រួចរាល់ដែរ ពោលគឺការរៀបអាពាហ៍ពិពាហ៍តាមបែបសែនព្រេន។

៣. ឯការចុះសំបុត្រអាពាហ៍ពិពាហ៍ គឺជាលក្ខខណ្ឌចាំបាច់បំផុត ពោលគឺសំខាន់ជាងពិធីរៀបអាហ៍ពិពាហ៍ទៅទៀត ដើម្បីបំពេញឈ្មោះជាគ្រួសារស្របច្បាប់។ មានតែសំបុត្រអាពាហ៍ពិពាហ៍មួយប៉ុណ្ណោះទើបអាចអះអាងបានថាបុគ្គលប្រុសស្រី (ថ្ងៃអនាគតអាចមាន ប្រុសនិងប្រុស ស្រីនិងស្រី) គឺពិតជាស្វាមីនិងភរិយាយ៉ាងពិតប្រាកដ គ្មានបុគ្គលណាមួយអាចអះអាងរំលោភលើសំបុត្រនេះបានឡើយ។

ជុំវិញរឿងរ៉ាវនេះ ម្ចាស់គណនីខាងលើនិយាយដែរថា “ការដែលលើករឿងគ្រួសារអ្នកដទៃមកនិយាយ រឿងបុគ្គលដទៃក្រៅពីខ្លួនឯងមកនិយាយ ការចែកចាយរូបភាពអាសអាភាសរបស់អ្នកដទៃ ដោយគ្មានការអនុញ្ញាត ព្រមទាំងបង្កឱ្យប៉ះពាល់ដល់សេចក្ដីថ្លៃថ្នូរ ប៉ះពាល់កិត្តិយស បង្កើតឱ្យមានការប៉ះទង្គិចផ្លូវចិត្ត ញុះញង់ឱ្យមានការរើសអើស ជេរប្រមាថ គំរាមកំហែង គឺជារឿងខុសច្បាប់ និងចាត់ទុកជាទង្វើអសីលធម៌ ខ្វះការអប់រំបំផុត“។

ជាមួយនឹងការលើកឡើងខាងលើនេះដែរ ត្រូវបានសាធារណជនជាច្រើនឯកភាព និងចែករំលែកព្រោងព្រាតពេញបណ្តាញទំនាក់ទំនងសង្គម៕