ជីវិតកម្សាន្ដ

T.O.P បញ្ចាក់ជំហរច្បាស់ការ មិនវិលទៅរក Big Bang វិញទេ

បានផុស

៣ សប្តាហ៍ មុន

នៅ

ថ្ងៃអង្គារ ១១ កុម្ភៈ ២០២៥

ដោយ

នៅថ្ងៃទី ១១ ខែកុម្ភៈ អ្នកតំណាងរបស់ T.O.P បានបំភ្លឺថា ឈ្មោះ ‘TOP’ នៅលើទម្រង់ប្រព័ន្ធផ្សព្វផ្សាយសង្គមរបស់ Choi Seung Hyun មិនត្រូវបានបន្ថែមឬផ្លាស់ប្តូរថ្មីទេ វាតែងតែនៅទីនោះ។ ពួកគេបានសង្កត់ធ្ងន់បន្ថែមទៀតថា “ជំហររបស់គាត់ទាក់ទងនឹង Big Bang នៅតែដដែល ដូចដែលគាត់បានសម្តែងនៅក្នុងបទសម្ភាសន៍ថ្មីៗនេះ ។

យ៉ាងណា កាលពីពេលថ្មីៗនេះសហគមន៍អនឡាញបានប៉ាន់ស្មានអំពីការវិលត្រលប់របស់លោក បន្ទាប់ពីបានកត់សម្គាល់ឃើញឈ្មោះមួយនេះបានចុះក្នុងគណនី YouTube ផ្លូវការរបស់ Big Bang ដោយបង្ហាញថា G-Dragon, Taeyang, T.O.P, Daesung។

លើសពីនេះ ទម្រង់ប្រព័ន្ធផ្សព្វផ្សាយសង្គមផ្លូវការរបស់ T.O.P នៅតែបញ្ចូលឈ្មោះ TOP Choi Seung Hyun ដែលជំរុញឲ្យមានការរំពឹងទុកជាច្រើនពាក់ព័ន្ធនឹងតារាប្រុស។ អ្នកគាំទ្រមួយចំនួនថែមទាំងទន្ទឹងរង់ចាំការវិលវិញជាក្រុមពេញមួយក្រុម បន្ទាប់ពីគាត់បានផ្លាស់ប្តូររូប Profile ផ្ទាល់ខ្លួន។

ទោះជាយ៉ាងណាក៏ដោយ នៅក្នុងបទសម្ភាសន៍ថ្មីៗនេះ T.O.P បានបញ្ជាក់យ៉ាងច្បាស់ថា គាត់មានអារម្មណ៍ថាមិនសមក្នុងការត្រលប់ទៅក្រុម Big Bang បន្ទាប់ពីចាកចេញពីក្រុម។ កាលពីខែមុន ក្នុងអំឡុងពេលសម្ភាសន៍សារព័ត៌មានសម្រាប់ «Squid Game 2» របស់ Netflix គាត់បានបើកចំហអំពីការចាកចេញថែមទៀតផង។

នៅក្នុងបទសម្ភាសមួយ គាត់បាននិយាយថា «បន្ទាប់ពីការដកទ័ពរបស់ខ្ញុំ ខ្ញុំមានអារម្មណ៍ថា ខ្ញុំបានបង្កគ្រោះថ្នាក់ដល់ក្រុម Big Bang ច្រើនពេកហើយ។ ខ្ញុំបានសម្រេចចិត្តចាកចេញពីព្រោះខ្ញុំមិនចង់បង្កបញ្ហាដល់ក្រុមទៀតទេ»។

តារាចម្រៀងវ័យ៣៧ឆ្នាំបានពន្យល់បន្ថែមថា «នៅពេលកិច្ចសន្យារបស់ខ្ញុំបានបញ្ចប់ ខ្ញុំបានជ្រើសរើសចាកចេញបន្ទាប់ពីគម្រោង Still Life ។ ខ្ញុំមានអារម្មណ៍ខ្មាសក្នុងការត្រឡប់ទៅក្រុម Big Bang វិញ។ ប្រសិនបើខ្ញុំធ្វើការតែម្នាក់ឯង ខ្ញុំអាចទទួលខុសត្រូវទាំងស្រុងចំពោះកំហុសរបស់ខ្ញុំកន្លងមក ប៉ុន្តែប្រសិនបើខ្ញុំចូលរួមក្រុមវិញ នោះមិនមែនជាករណីនោះទេ។ ខ្ញុំមិនចង់ដាក់បន្ទុកពួកគេទេ»។

មិនតែប៉ុណ្ណោះ ជាមួយនឹងការរំពឹងទុកបន្តជុំវិញការវិលត្រឡប់មកវិញរបស់គាត់ ពេលនេះ T.O.P បានបញ្ជាក់ជាថ្មីថាជំហររបស់គាត់មិនផ្លាស់ប្តូរទេ ដោយបញ្ចប់ភាពចម្រូងចម្រាសលើបណ្ដាញអ៉ិនធើណេត៕