ខ្លួននៅក្នុងគុកទេ តែ Diddy ហ៊ានប្តឹង NBC ទារថ្លៃ ១០០លានដុល្លារ ពីបទបង្ខូចកេរ្តិ៍ឈ្មោះលោក

Sean Diddy Combs បានដាក់ពាក្យបណ្តឹងក្នុងទំហំទឹកប្រាក់ចំនួន ១០០ លានដុល្លារប្រឆាំងនឹង NBC Universal ដោយអះអាងថា ភាពយន្តឯកសារក្រោមចំណងជើងថា Diddy: Making of a Bad Boy បង្ហាញរូបគាត់ថា ជាឃាតកសៀរៀល និងជាឧក្រិដ្ឋជនផ្លូវភេទច្បាស់ៗពេក។

ពាក្យបណ្តឹងដែលដាក់នៅញូវយ៉ក បានចោទប្រកាន់ថា NBC បានផ្សព្វផ្សាយព័ត៌មានមិនពិត ដើម្បីបង្ខូចកេរ្តិ៍ឈ្មោះ តារារ៉េប ខណៈពេលដែលគាត់កំពុងរង់ចាំការកាត់ទោសលើការចោទប្រកាន់ពីបទជួញដូរផ្លូវភេទរបស់សហព័ន្ធ។

ភាពយន្តឯកសារដែលបានចាក់បញ្ចាំងជាលើកដំបូងនៅលើ Peacock បង្ហាញថា តារារ៉េបវ័យ៥៥ឆ្នាំ មានជាប់ពាក់ព័ន្ធនឹងការស្លាប់របស់ Kimberly Porter, The Notorious B.I.G. និង Heavy D. ក្នុងនោះវាក៏ចោទប្រកាន់គាត់ពីបទរំលោភលើអនីតិជនផងដែរ។

ទោះបីជាយ៉ាងណាក៏ដោយ មេធាវីរបស់គាត់បានចេញមុខអះអាងថា ឯកសារមួយនោះបំភ្លៃការពិតដើម្បីរកប្រាក់ចំណេញ និងធ្វើឲ្យប៉ះពាល់ដល់សិទ្ធិរបស់កូនក្ដីក្នុងការកាត់ក្តីដោយយុត្តិធម៌។ ជាពិសេសថែមទៀត ការចោទប្រកាន់របស់ពួកគេគឺគ្មានមូលដ្ឋានច្បាស់ការឡើយ។

គួររម្លឹកដែរថា ស្ថាបនិក​ផលិតកម្ម​ចម្រៀង Bad Boy Records ត្រូវ​បាន​ចាប់​ខ្លួន​នៅ​ពាក់​កណ្តាល​ខែ​កញ្ញា ក្នុង​ទីក្រុង​ញូវយ៉ក បន្ទាប់​ពី​ការ​ស៊ើបអង្កេត​របស់​រដ្ឋាភិបាល​អស់​រយៈពេល​ជាច្រើន​ខែ​លើ​ការ​ចោទ​ប្រកាន់​ពី​ការ​ប្រព្រឹត្ត​ខុស។ Diddy ត្រូវបានចោទប្រកាន់ពីបទសមគំនិតក្នុងការជំរិតទារប្រាក់ ការជួញដូរផ្លូវភេទដោយបង្ខំ ការក្លែងបន្លំ ឬការបង្ខិតបង្ខំ និងការជួញដូរនៅក្នុងពេស្យាចារ។ លើសពីនេះលោក ត្រូវ​បាន​ចោទ​ប្រកាន់​ពី​បទ​រៀបចំ​ពិធី​ជប់លៀង​ដែល​គេ​ស្គាល់​ថា​ជា “Freak Offs” ដែល​ជនរងគ្រោះ​ខ្លះ​ត្រូវ​បាន​គេ​ចោទ​ថា​បង្ខំ​ឲ្យចូល​រួម​ក្នុង​អំពើ​ផ្លូវ​ភេទ​តាម​បទ​ឧក្រិដ្ឋ។ យ៉ាងណា លោកបានបដិសេធ​ថា​មិន​បាន​ប្រព្រឹត្ត​ខុស​អ្វី​ទាំង​អស់និងកំពុង​ស្ថិត​ក្នុង​ការ​ឃុំឃាំង​របស់​សហព័ន្ធស្របពេលដែល កាល​បរិច្ឆេទ​ចាប់​ផ្តើ​ម​សម្រាប់​ការ​កាត់​ទោស​គ្រោងធ្វើនៅ​ថ្ងៃ​ទី ០៥ ខែ​ឧសភា ឆ្នាំ ២០២៥៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖អត់និយាយលេងទេ Elon Musk បិទគណនី X របស់ Kanye ដែលបង្ហាញសកម្មភាពប្រកាន់ពូជសាសន៍