សាន ផានិត ថា ខ្លួនគ្មានមហិច្ចតាកាច់កុងប្រជែងធ្វើស្តេចចម្រៀងទេ

ខណ:ដែលបច្ចុប្បន្នវិស័យចម្រៀងហាក់មាន ការប្រកួតប្រជែងដណ្តើមទីផ្សាល្បីឈ្មោះពីសំណាក់តារាចម្រៀងរលក់ថ្មី និង តារាចម្រៀងចាស់ក្មេងមួយចំនួនទៀត ម្ចាស់បទ “ជាប់រវល់” លោក សាន ផានិត បានអះអាងថា សុំសំងំនៅឆ្ងាយពីពិភពគុនដ៏អស្ចារ្យ។

តារាចម្រៀងជើងចាស់លោក សាន ផានិត ដែលបច្ចុប្បន្នមានវ័យច្រើនបន្តិចហើយនោះ បាននិយាយថា រឿងដែលលោកចង់ឃើញពេលនេះឬថ្ងៃខាងមុខ គឺសុំត្រឹមរាល់បទចម្រៀងរបស់ខ្លួននៅមានជីវិតក្នុងចិត្តមហាជនទៅបានហើយ។លោកថា លោកគ្មានមហិច្ចតាកាច់កុងប្រជែងធ្វើស្តេចចម្រៀងទេ។

តារាចម្រៀងធ្លាប់ល្បីឈ្មោះតាមរយ: “ទូរស័ព្ទប្រាប់ផង” និងបទ”ជាប់រវល់” លោក សាន ផានិត បានបញ្ជាក់ថា ត្រឹមតែជាអ្នកធំនិងរាល់បទចម្រៀងនៅមានជីវិតនៅឡើយក្នុងចិត្តមហាជនខ្លះទៅបានហើយ គ្រប់គ្រាន់ហើយ ! ។

លោក សាន ផានិត និយាយទៀតថា “អស់លោកជំនាន់ចាស់ ជំនាន់ថ្មីនៅមានមហិច្ចតាកាច់កុងប្រណាំងប្រជែងគ្នាធ្វើស្តេចចម្រៀងអ្វីធ្វើទៅ ខ្ញុំសុំសំងំនៅឆ្ងាយពីពិភពគុនដ៏អស្ចារ្យមួយហ្នឹងហើយ ពាក្យដែលខ្ញុំធ្លាប់និយាយថាខ្ញុំកើតមកដើម្បីតែមនោសញ្ជេតនានិងសិល្ប:មួយនេះ សិល្ប:បានឱ្យលទ្ធផលតបមកដល់ខ្ញុំវិញវាលើសលប់ពេកហើយ ខ្ញុំមានសំណាងពេកហើយនៅលើលោកនេះ”។

លោក សាន ផានិត ធ្លាប់បានចេញមករម្លឹកពីរឿងអតីតកាលរបស់ខ្លួនប្រាប់អ្នកគាំទ្រកាលពីថ្មីៗនេះថា លោកធ្លាប់ត្រូវបា នប្រពន្ធបញ្ចូនឱ្យចូលវត្តស្វែងរកផ្លូវធម៌ប្រមាណជា ៤ឆ្នាំ ដោយមិននឹកស្មានជីវិតអាចមានថ្ងៃនេះវិញឡើយ៕ អត្ថបទ៖ ចាន់រ៉ា