ថ្ងៃ១៤កុម្ភ:! តារាសម្តែង សាវិន ហ្វីលីព ស្នើចែករំលែកក្តីស្រលាញ់ដល់កុមារកម្ពុជា

តួអង្គក្នុងខ្សែភាពយន្តល្បីរឿង “អ្នកទោសហែកគុក” លោក សាវិន ហ្វីលីព បានស្នើក៏ដូចជាអំពាវនាវដល់មហាជនទូទាំងប្រទេសចូលរួមចែករំលែកក្តីស្រលាញ់ដល់កុមារកម្ពុជា ដើម្បីពួកគេទទួលបានការព្យាបាលជំងឺទូទៅ និងជំងឺមហារីក។

ការអំពាវនាវរបស់តារាសម្តែងជើងចាស់លោក សាវិន ហ្វីលីព បានធ្វើឡើងស្របពេលដែលទិវានៃក្តីស្រលាញ់ ១៤កុម្ភ: ។ លោក សាវិន ហ្វីលីព បានលើកឡើងថា សូមចែករំលែកក្តីស្រលាញ់ដល់កុមារកម្ពុជាក្នុងថ្ងៃបុណ្យនៃក្តីស្រលាញ់ ១៤កុម្ភៈ ដើម្បីពួកគេទទួលបានការព្យាបាលជំងឺទូទៅ និងជំងឺមហារីកកុមារ ដោយឥតគិតថ្លៃនៅកម្ពុជា។

តារាសម្តែងលោក សាវិន ហ្វីលីព បានឲ្យដឹងទៀតថា “ទឹកប្រាក់ ១ដុល្លាររបស់អ្នកគឺមានតម្លៃខ្លាំងណាស់ សម្រាប់កុមារដែលត្រូវការជំនួយសុខភាព (អង្គការបេះដូងជប៉ុន)។

គេនៅចាំបានដែរថាកន្លងមក តារាសម្តែងរូបនេះ ក៏ធ្លាប់បានប្រកាសបង្ហាញពីឆន្ទ:របស់ខ្លួន ក្នុងការគៀងគររកសប្បុរសជនជួយបរិច្ចាគថវិការ ក្នុងម្នាក់ត្រឹម ១មុឺនរៀលក្នុងខែ ដើម្បីជូនអង្គការបេះដូងជប៉ុន (Japan Heart) ព្យាបាលកុមារកេីតមហារីកនៅកម្ពុជាផងដែរ។

តារាសម្តែងលោក សាវិន ហ្វីលីព ធ្លាប់បានបញ្ជាក់ឱ្យដឹងថា សម្រាប់គ្រួសារលោក គឺបានបរិច្ចាគជារៀងរាល់ខែដើម្បីចូលរួមឧបត្ថម្ភជួយដល់អង្គការបេះដូងជប៉ុន (Japan Heart) ។ តាមរយ:សកម្មភាពមនុស្សធម៌របស់លោក សាវិន ហ្វីលីព ខាងលើនេះដែរ គេឃើញមានមហាជននិងអ្នកសិល្ប:មួយចំនួនធំ បានបង្ហាញនូវការគាំទ្រនិងសរសើរទឹកចិត្ត៕ អត្ថបទ៖ ចាន់រ៉ា