ជីវិតកម្សាន្ដ

Honey Lee ស្ថិតក្រោមការស៊ើបអង្កេតពីប៉ូលិស រឿងគេចពន្ធជាង៤លានដុល្លារ

បានផុស

១ ខែ មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

នៅព្រឹកថ្ងៃទី ១៧ ខែកុម្ភៈ ប្រព័ន្ធផ្សព្វផ្សាយកូរ៉េបានរាយការណ៍ព្រមគ្នាថា អតីតបវរកញ្ញាកូរ៉េនិងជាតារាសម្ដែង Honey Lee កំពុងស្ថិតក្រោមការស៊ើបអង្កេតរឿងពន្ធ។ ក្រោយមក គេតម្រូវឲ្យតារាស្រីត្រូវបង់ប្រាក់បន្ថែមចំនួន ៦ ពាន់លានវ៉ុន (ជាង៤លានដុល្លារអាមេរិក) រួមទាំងពន្ធលើប្រាក់ចំណូលផងដែរ។

យោងតាម Hankyung សេវាពន្ធប្រចាំតំបន់សេអ៊ូលបានធ្វើការស៊ើបអង្កេតពន្ធស៊ីជម្រៅលើតារាស្រីវ័យ៤១ឆ្នាំ និងក្រុមហ៊ុនរបស់នាងនៅក្នុងខែកញ្ញា ឆ្នាំ ២០២៤។ ជាពិសេស ការផាកពិន័យបន្ថែមរបស់ Honey Lee គឺធំជាងសិល្បករកូរ៉េ ដែលត្រូវបានស៊ើបអង្កេតលើពន្ធនាពេលកន្លងមក ។

Honey Lee បានបង្កើតក្រុមហ៊ុនផ្ទាល់ខ្លួនរបស់នាងក្នុងឆ្នាំ ២០១៥។ នៅខែកញ្ញា ឆ្នាំ ២០២២ ក្រុមហ៊ុនរបស់សិល្បករបានប្តូរឈ្មោះទៅជា Hope Project ហើយនាងមានតួនាទីជា CEO និងជាប្រធានផ្នែកខាងក្នុងរហូតដល់ខែមករា ឆ្នាំ ២០២៣។ បច្ចុប្បន្នស្វាមីជានាយកប្រតិបត្តិ ឯនាងមានតួនាទីជានាយកផ្ទៃក្នុង។

ហេតុផលដែលសេវាពន្ធជាតិបើកការស៊ើបអង្កេតពន្ធលើ Honey Lee and Hope Project ត្រូវបានគេបង្ហាញឲ្យដឹងថាពាក់ព័ន្ធនឹងក្រុមហ៊ុនគ្រប់គ្រងរបស់អតីតសិល្បករ។ អាជ្ញាធរបានរកឃើញការគេចពន្ធរវាងនាង និងក្រុមហ៊ុននេះ។

ទោះបីជាយ៉ាងណាក៏ដោយ ជាការឆ្លើយតបទៅនឹងការស៊ើបអង្កេតនេះ តំណាងរបស់ Honey Lee បាននិយាយថា សិល្បករបានបំពេញកាតព្វកិច្ចពន្ធរបស់នាងស្របតាមច្បាប់ និងការណែនាំរបស់ភ្នាក់ងារពន្ធដារ។ អ្នកតំណាងបាននិយាយថា ពន្ធនេះគឺជាការទូទាត់បន្ថែមដោយសារតែភាពខុសគ្នានៃវិធីសាស្រ្តការងាររបស់អាជ្ញាធរពន្ធដារ និងភ្នាក់ងារពន្ធដារ។ នេះមិនមែនជាការគេចពន្ធដោយចេតនាទេ។

Honey Lee កើតនៅឆ្នាំ ១៩៨៣ និងបានគ្រងមកុដបវរកញ្ញាកូរ៉េក្នុងឆ្នាំ ២០០៦។ នាងបានចូលរួមក្នុងកម្មវិធី Miss Universe២០០៧ និងបានជាប់ចំណាត់ថ្នាក់លេខ៣ ក្នុងឆ្នាំដដែលនោះនាងបានក្លាយជាបវរកញ្ញាអាស៊ីដំបូងគេដែលត្រូវបានផ្តល់កិត្តិយសជា Miss Grand Slam ម្ចាស់ក្សត្រីនៃសម្រស់។

នៅប្រទេសកូរ៉េ Honey Lee ត្រូវបានចាត់ទុកថាជាតារាសម្រស់មួយរូបនៅក្នុងឧស្សាហកម្មកម្សាន្ត។ នាងត្រូវបានអ្នកសារព័ត៌មានហៅថាជាបវរកញ្ញាកូរ៉េដែលមានមន្តស្នេហ៍បំផុតឬជាបវរកញ្ញាកូរ៉េដែលស្អាតបំផុត។ នៅដើមឆ្នាំ ២០២៥ នាងបានបញ្ជាក់ថា នឹងសម្តែងក្នុងរឿងភាគទូរទស្សន៍ Show Business ជាមួយ Gong Yoo និង Song Hye Kyo ៕