តារាកូរ៉េប៉ុន្មានរូប សុទ្ធតែរងសំពាធ រហូតដើរដល់ជ្រោះមរណៈ ក្នុងវ័យខ្ទង់២០

នៅល្ងាចថ្ងៃទី ១៦ ខែកុម្ភៈ កាសែតកូរ៉េជាច្រើនបានរាយការណ៍ពីការស្លាប់ដ៏គួរឲ្យតក់ស្លុតរបស់តារាសម្តែង Kim Sae Ron ។ តារាស្រីវ័យ ២៤ឆ្នាំ ត្រូវប៉ូលិសសន្ធិដ្ធានថា អាចមកពីគាំងបេះដូង ដោយសារតែសំពាធច្រើនហួសស្មានព្រមទាំងការស្អប់ខ្ពើមពីសង្គម។

ទោះយ៉ាងណា ក្នុងរយៈពេលប៉ុន្មានឆ្នាំចុងក្រោយនេះ វិថីសិល្បៈកូរ៉េ បានបន្តឃើញតារាជាច្រើនដែលស្លាប់ក្នុងវ័យ២០ ឆ្នាំ។ បន្ថែមពីលើហេតុផលផ្ទាល់ខ្លួន ការធ្វើអត្តឃាតរបស់តារាកូរ៉េជាច្រើន ក៏បង្ហាញពីសម្ពាធដ៏ធំធេង និងភាពឃោរឃៅដែលពួកគេប្រឈមមុខក្នុងអាជីពមួយនេះផងដែរ។

១ Moonbin

នៅថ្ងៃទី ១៩ ខែមេសា ឆ្នាំ ២០២៣ Moonbin សមាជិកក្រុម ASTRO ត្រូវបានគេប្រទះឃើញស្លាប់នៅផ្ទះរបស់លោក នៅ Gangnam ទីក្រុងសេអ៊ូល ក្នុងអាយុ ២៥ ឆ្នាំ។ មូលហេតុ​នៃ​ការ​ស្លាប់​ត្រូវ​បាន​គេ​ជឿ​ថា ​ជា​ការ​ធ្វើ​អត្តឃាត។

Moonbin កើតក្នុងឆ្នាំ ១៩៩៨ ហើយបានបង្ហាញខ្លួនជាលើកដំបូងជាមួយក្រុម ASTRO ក្នុងឆ្នាំ ២០១៦។ គាត់បានធ្វើឲ្យមានការចាប់អារម្មណ៍ នៅពេលដែលដើរតួជាយុវជន So Yi Jung ក្នុងរឿង Boys Over Flowers ហើយបង្ហាញខ្លួននៅក្នុង MV Balloon របស់ DBSK ។ ក្រៅពីអាជីពផ្ទាល់ខ្លួន លោកក៏ត្រូវគេស្គាល់ថាជាបងប្រុសបង្កើតរបស់តារាស្រី Moon Sua (Billie) ផងដែរ។

យ៉ាងណា មុនពេលគាត់ស្លាប់ Moonbin មានសកម្មភាពនៅក្នុងក្រុមរង ASTRO Moonbin & Sanha ។ អ្នក​ទាំង​ពីរ​គ្រោង​នឹង​ចូល​រួម​ក្នុង​ការ​ប្រគំតន្ត្រី Dream នៅ​ខែ​ឧសភា ឆ្នាំ ២០២៣ ហើយ​បន្ត​ការ​ប្រគំ​តន្ត្រី​របស់​អ្នក​គាំទ្រ​នៅ​ម៉ាកាវ តៃប៉ិ (ចិន) ប្រេស៊ីល ឈីលី និង​ម៉ិកស៊ិក។

២ Sulli

កាលពីថ្ងៃទី ១៤ ខែតុលា ឆ្នាំ ២០១៩ Sulli ត្រូវគេប្រទះឃើញដេកស្លាប់នៅជាន់ទីពីរនៃផ្ទះរបស់នាង ក្នុងទីក្រុង Seongnam ទីក្រុង Gyeonggi ។ អ្នក​ដែល​បាន​រក​ឃើញ​នោះ​គឺ​ជា​អ្នក​គ្រប់​គ្រង​ ដែល​ក៏​ជា​ប្អូន​ប្រុស​របស់​នាង​ដែរ។មរណភាពរបស់តារាស្រីវ័យ២៥ឆ្នាំ បានបង្កនូវភាពភ្ញាក់ផ្អើលយ៉ាងខ្លាំងក្នុងកម្មវិធីបង្ហាញម៉ូតរបស់កូរ៉េនៅពេលនោះ។ យោងតាមប្រព័ន្ធផ្សព្វផ្សាយកូរ៉េ Sulli បានចំណាយពេលយូរក្នុងការតស៊ូជាមួយជំងឺធ្លាក់ទឹកចិត្ត និងបានទទួលរងនូវការខូចចិត្ត ដោយសារការអត្ថាធិប្បាយអាក្រក់ៗនៅលើបណ្តាញសង្គម។

ឈ្មោះពិតរបស់ Sulli គឺ Choi Jin Ri កើតក្នុងឆ្នាំ ១៩៩៤ នាងចូលប្រឡូកក្នុងវិស័យសិល្បៈក្នុងឆ្នាំ ២០០៥ ក្នុងរឿងភាគប្រវត្តិសាស្ត្ររបស់ SBS ក្រោមចំណងជើងថា Ballad of Seo Dong ។ តួនាទី​នេះ​គឺ​ជា​ជំហាន​ដែល​នាំ Sulli មក​រក​ការ​ចាប់អារម្មណ៍។ បន្ទាប់មក ដោយសារតែទេពកោសល្យ និងរូបរាងដ៏ស្រស់ស្អាត Sulli ទទួលបានការចាប់អារម្មណ៍ពីក្រុមហ៊ុន SM Entertainment ។

Sulli គឺជាតារា K-pop ដ៏មានប្រជាប្រិយបំផុតមួយរូបនៃជំនាន់ទី៣ ក្នុងឆ្នាំ ២០០៩ នាងបានបង្ហាញខ្លួនជាសមាជិកក្រុម f(x)។ ពេញមួយឆ្នាំនៃសកម្មភាពនាងគឺជាក្រុមនារីដ៏លេចធ្លោមួយ និងជាសមាជិកដែលមានអ្នកគាំទ្រច្រើនជាងគេ។ ប៉ុន្តែ ចាប់តាំងពីខែកញ្ញា ឆ្នាំ ២០១៣ នាងបានចាប់ផ្តើមបង្ហាញសញ្ញានៃការធ្លាក់ទឹកចិត្ត និងបាត់បង់ការផ្តោតអារម្មណ៍នៅកន្លែងធ្វើការ។ ក្នុងឆ្នាំ ២០១៤ តារាស្រីស្រាប់តែជាប់ជាប់ពាក់ព័ន្ធក្នុងរឿងអាស្រូវស្នេហា ជាមួយលោក Choiza ដែលចាស់ជាងនាង ១៤ ឆ្នាំ។ ទំនាក់ទំនងនេះបានបង្កឲ្យមានភាពចម្រូងចម្រាសជាច្រើន ហើយបានធ្វើឲ្យ Sulli ប្រឈមមុខនឹងរលកនៃការរិះគន់យ៉ាងខ្លាំងក្លាពីមតិសាធារណៈ។

៣ Goo Hara

នៅថ្ងៃទី ២៤ ខែវិច្ឆិកា ឆ្នាំ ២០១៩ ត្រឹមតែ៦សប្តាហ៍បន្ទាប់ពីការស្លាប់របស់ Sulli, Goo Hara បានទទួលមរណភាពនៅផ្ទះរបស់នាងក្នុងទីក្រុងសេអ៊ូល។ ប៉ូលិស​បញ្ជាក់​ថា​​ នេះ​ជា​ការ​ធ្វើ​អត្តឃាត។ ទន្ទឹមគ្នានោះដែរ មានព័ត៌មានជាច្រើនដែលតារាស្រីត្រូវស៊ូទ្រាំនឹងសម្ពាធជាច្រើនក្នុងជីវិត និងអាជីពរបស់នាង មុនពេលនាងធ្វើអត្តឃាត។

Goo Hara កើត​ក្នុង​ឆ្នាំ ១៩៩១ និង​ជា​តារា​ចម្រៀង​ដ៏​ល្បី​មួយ​រូប​ក្នុង​វិស័យ​កម្សាន្ត​កូរ៉េ។ នាងបានចាប់ផ្តើមអាជីពរបស់នាង ជាសមាជិកនៃក្រុមចម្រៀងនារី Kara ។ ពេល​ពួកគេ​នៅ​ក្នុង​ក្រុម​ជាមួយ​គ្នា នាង​ជា​មិត្ត​ជិតស្និទ្ធ​ជាមួយ Sulli។

ជាមួយនឹងទឹកដមសម្លេង និងរូបរាងដ៏ស្រស់ស្អាត Goo Hara មានអ្នកគាំទ្រយ៉ាងច្រើននៅអាស៊ី ដែលគេស្គាល់ថាជា តុក្កតាមានជីវិត។ ថ្វីបើអាជីពជោគជ័យ តែ Goo Hara ក៏បានជាប់ពាក់ព័ន្ធនឹងរឿងអាស្រូវមិនល្អជាច្រើនផងដែរ។ នាង​ត្រូវ​បាន​ទស្សនិកជន​កូរ៉េ​ចាត់​ទុក​ថា​ជា​មូលហេតុ​ដោយ​ប្រយោល​នៃ​ការ​រំសាយ​ក្រុម KARA។

សម្ពាធ​ខ្លាំង​បំផុត​គឺ​នៅ​ពេល តារាស្រីវ័យ២៨ឆ្នាំកំពុង​ណាត់​ជួប​ជាមួយ Yong Jun Hyung រូបភាព​របស់​នាង និង​អតីត​មិត្ត​ប្រុស​បាន​សាយភាយ​យ៉ាង​លឿន​ក្នុង​ប្រទេស​កូរ៉េ។ ក្រុមហ៊ុនគ្រប់គ្រងរបស់ KARA បានបំភ្លឺថា នេះគ្រាន់តែជារូបថតរបស់ Hara និងមិត្តភក្តិរបស់នាង ដែលធ្វើដំណើរជាមួយគ្នា ប៉ុន្តែអ្នកលេងអ៊ីនធឺណិតជឿថា ក្រុមហ៊ុននេះកុហកដើម្បីបិទបាំងហេតុការណ៍នេះ។ បន្ទាប់ពីចាកចេញពីក្រុមហ៊ុន Goo Hara បានបង្កើតអាជីពទោល ប៉ុន្តែមិនបានជោគជ័យនោះទេ។

៤ Kim Jonghyun

នៅថ្ងៃទី ១៨ ខែធ្នូ ឆ្នាំ ២០១៧ Kim Jonghyun ដែលជាមេក្រុម SHINee ត្រូវគេប្រទះឃើញស្លាប់នៅឯផ្ទះល្វែងរបស់គាត់នៅ Chungdamdong (ស្រុក Gang Nam ទីក្រុងសេអ៊ូល) ក្នុងអាយុ ២៧ ឆ្នាំ។ តារាចម្រៀងប្រុសបានដុតធ្យូងនៅក្នុងបន្ទប់បិទជិតមុនពេលគាត់ស្លាប់។ ភ្លាមៗ​ក្រោយ​ការ​រក​ឃើញ​ប៉ូលិស​បាន​នាំលោកទៅ​កាន់​មន្ទីរពេទ្យ​សាកលវិទ្យាល័យ Konkuk ប៉ុន្តែ​នៅតែមិនអាចជួយជីវិតលោកបានដដែល។

យោងតាមប្រព័ន្ធផ្សព្វផ្សាយកូរ៉េ បានឲ្យដឹងថា មុនពេលគាត់ស្លាប់ ២ ម៉ោង តារាចម្រៀងប្រុសរូបនេះ បានផ្ញើសារធ្វើអត្តឃាត ទៅកាន់បងស្រីបង្កើតដែលជាមនុស្សដែលគាត់ស្រលាញ់បំផុតថា «អ្នកបានរងទុក្ខរហូតមកដល់ពេលនេះ អនុញ្ញាតឲ្យខ្ញុំទៅ។ ប្រាប់ខ្ញុំថា អ្នកបានប្រឹងប្រែង! នេះជាការលាចុងក្រោយ»។ ទោះបីជាសាច់ញាតិព្យាយាមណែនាំ Kim Jonghyun ទៅរកគំនិតសុទិដ្ឋិនិយមក៏ដោយ វាហាក់បីដូចជាការខិតខំប្រឹងប្រែងទាំងអស់មិនអាចទាញគាត់ចេញពីគំនិតដ៏កំសត់នៃភាពបាក់ទឹកចិត្តនេះបានទេ។

Kim Jonghyun កើតនៅឆ្នាំ ១៩៩០ នៅទីក្រុងសេអ៊ូល ប្រទេសកូរ៉េខាងត្បូង។ គាត់គឺជាអ្នកចម្រៀងសំខាន់របស់ក្រុម SHINee ដែលតែងតែចាត់ទុកថាជាតារាម្នាក់ដែលមានសំឡេងច្រៀងល្អបំផុតនៅក្នុង Kpop ។ លោក​មាន​សមត្ថភាព​និពន្ធ​យ៉ាង​ប៉ិនប្រសប់​ ជាមួយ​នឹង​បទ​ចម្រៀង​ល្បីៗ​ជា​ច្រើន​បទ។ តារាប្រុស ក៏មាន​អាជីព​ដ៏​អស្ចារ្យ និង​ជីវិត​ផ្ទាល់ខ្លួន​ស្អាតស្អំ ដូច្នេះ​ទស្សនិកជន​ភ្ញាក់ផ្អើល ​នឹង​ការ​លាចាក​លោក​ភ្លាមៗដែរ៕

អត្ថបទ៖ សាង ស្រីល័ក្ខ

ចុចអាន៖ការ​ស្លាប់​ Kim Sae Ron ជំរុញ​ឲ្យសង្គមឈប់ប្រព្រឹត្ត​អំពើឃោរឃៅ និងរុញច្រាន​តារា​ដល់ជ្រោះមរណៈ