អតីតជំទាវទីមួយកូរ៉េ មិនបានរារាំង BLACKPINK សម្តែងជាមួយ Lady Gaga ដូចការចោទឡើយ

នៅចុងខែមេសា ឆ្នាំ ២០២៣ ក្នុងអំឡុងពេលទស្សនកិច្ចផ្លូវរដ្ឋរបស់ប្រធានាធិបតី Yoon Suk Yeol នៅសហរដ្ឋអាមេរិក គណបក្សប្រឆាំងបានលើកឡើងពីទ្រឹស្តីនៃការចូលរួមរបស់ជំទាវទីមួយ Kim Keon Hee ក្នុងការលុបចោលការសម្តែងរួមគ្នាដោយ BLACKPINK និង Lady Gaga នៅសេតវិមាន ដែលត្រូវចាត់ទុកថាជាផ្នែកមួយនៃព្រឹត្តិការណ៍វប្បធម៌រវាងប្រទេសទាំងពីរ។

ដកស្រង់សម្ដីពី Park Ji Won និង Park Sun Won ជាសមាជិកគណបក្សប្រជាធិបតេយ្យ និងជា​អតីត​មន្ត្រី​សេវា​ស៊ើបការណ៍​សម្ងាត់​ជាតិ ថ្មីៗនេះបានលេចមុខនៅលើបណ្តាញ YouTube និងវិទ្យុ CBS ជាច្រើនដោយអះអាងថា ជំទាវទី១ មិនចូលចិត្តនារីវ័យក្មេង ហើយបានរារាំងការសម្តែង ទើបធ្វើឲ្យលុបចោលការប្រគំតន្រ្តីភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក យោងតាមរបាយការណ៍ផ្តាច់មុខរបស់ Joongang Ilbo អតីតមន្ត្រីការិយាល័យប្រធានាធិបតី និងបច្ចុប្បន្នជាច្រើននាក់ដែលដឹងពីស្ថានភាពនៅពេលនោះ បានបដិសេធថា វាមិនពិតទាំងស្រុងទេ ។ ការសម្តែងរួមគ្នាត្រូវលុបចោលដោយសារតែបញ្ហាហិរញ្ញវត្ថុ ហើយថាជំទាវទីមួយមិនបានប្រឆាំងឡើយ។

សមាជិកគាំទ្រលោក Yoon នៃគណបក្សអំណាចប្រជាជនដែលកំពុងកាន់អំណាចបាននិយាយកាលពីថ្ងៃទី ១៩ ខែកុម្ភៈនៅក្នុងការសន្ទនាតាមទូរស័ព្ទថា នៅពេលនោះ BLACKPINK បានយល់ព្រមមិនទទួលយកការធានាបន្ថែមទេ ប៉ុន្តែតម្លៃសម្រាប់បុគ្គលិក ការរៀបចំការសម្តែង និងថ្លៃអញ្ជើញរបស់ Lady Gaga គឺពិបាកពេក សម្រាប់រដ្ឋាភិបាលទាំងពីរក្នុងការទទួល។

មិនតែប៉ុណ្ណោះ ដំណើរ​ទស្សនកិច្ច​ផ្លូវរដ្ឋ​របស់​ប្រធានាធិបតីទៅកាន់​សហរដ្ឋ​អាមេរិក ​កាលពី២​ឆ្នាំមុន ធ្វើឡើង​ដោយ​សម្ងាត់​បំផុត។ អាមេរិកបានស្នើសុំរក្សាការសម្ងាត់ រហូតដល់ការប្រកាសជាផ្លូវការ ព្រោះមានតែប្រមុខរដ្ឋបរទេសពីររូបទេដែលអាចទទួលបានកិត្តិយសជារៀងរាល់ឆ្នាំ។

នៅដើមខែកុម្ភៈ ឆ្នាំ ២០២៣ ត្រឹមតែពីរខែមុនដំណើរទស្សនកិច្ច សេតវិមានត្រូវគេរាយការណ៍ថា បានស្នើឲ្យមានការសម្តែងរួមគ្នាដោយ BLACKPINK និង Lady Gaga ទៅកាន់ស្ថានទូតកូរ៉េប្រចាំនៅសហរដ្ឋអាមេរិក ដោយនិយាយថា វាឆ្លុះបញ្ចាំងពីបំណងប្រាថ្នារបស់ East Wing (ការិយាល័យរបស់ស្ត្រីទីមួយ) ។ នេះ​បាន​បង្ហាញ​ថា Jill Biden ស្ត្រី​ទីមួយ​របស់អាមេរិក​បាន​បង្ហាញ​ការ​ចាប់​អារម្មណ៍​យ៉ាង​ខ្លាំង។ សូម្បីតែចៅស្រីរបស់លោក ចូ បៃដិន ក៏ជាអ្នកគាំទ្រដ៏ធំរបស់ BLACKPINK ។

ទោះ​ជា​យ៉ាង​ណា សំណើ​នេះ​បាន​បង្កើន​ការ​ព្រួយ​បារម្ភ​បន្ថែម​ទៀត​នៅ​ក្នុង​ការិយាល័យ​ប្រធានាធិបតី។ ជាធម្មតា ប្រទេសដែលអញ្ជើញជាអ្នករ៉ាប់រងការចំណាយទាំងអស់ សម្រាប់ដំណើរទស្សនកិច្ចផ្លូវរដ្ឋ ប៉ុន្តែសម្រាប់ការសម្តែងរួមគ្នានេះ ភាគីអាមេរិកបានស្នើថា ពួកគេនឹងរ៉ាប់រងការចំណាយរបស់ Lady Gaga ខណៈដែលកូរ៉េនឹងរ៉ាប់រងលើ BLACKPINK ។

ការិយាល័យប្រធានាធិបតីកូរ៉េបានរកឃើញលក្ខខណ្ឌនេះពិបាកក្នុងការទទួលយក ហើយចាប់ផ្តើមស្វែងរកជម្រើសផ្សេងៗ។ បន្ទាប់មក លោក Yoon បានណែនាំឲ្យពិនិត្យឡើងវិញនូវសំណើអនុវត្តរួមគ្នា ដោយខ្លាចថា ការមិនអើពើអាចត្រូវគេមើលឃើញថា ជាការមិនគោរពការទូត។ ប៉ុន្តែ បញ្ហាតម្លៃនៅតែជាឧបសគ្គ ទោះបីជា BLACKPINK បានយល់ព្រមមិនទទួលយកការធានាដាច់ដោយឡែកពីគ្នា ដោយគិតពីលក្ខណៈនៃការសម្តែងក៏ដោយ ប៉ុន្តែការចំណាយសម្រាប់ការរៀបចំទីកន្លែង និងការធ្វើដំណើររបស់បុគ្គលិកតែម្នាក់ឯង ត្រូវបានគេប៉ាន់ប្រមាណថាឈានដល់រាប់រយលានវ៉ុន។ អាមេរិក​ក៏​បាន​ប្រឈម​មុខ​នឹង​បញ្ហា​ក្នុង​ការ​ធានា​រ៉ាប់រង​ Lady Gaga ដូច​ដែល​បាន​គ្រោង​ទុក​ដំបូង។ភាពចម្រូងចម្រាសលើការលុបចោលរបាយការណ៍នេះបានផ្ទុះឡើង ដែលនាំទៅដល់ការលាលែងពីតំណែងរបស់មន្ត្រីកិច្ចការបរទេសមួយចំនួន រួមទាំងលោក Kim Sung Han ដែលជាអតីតទីប្រឹក្សាសន្តិសុខជាតិផងដែរ នៅចុងខែមីនាឆ្នាំនោះ។

យ៉ាងណាមិញ គណបក្សកាន់អំណាចឥឡូវនេះ សង្ស័យថាការរស់ឡើងវិញរបស់គណបក្សប្រឆាំង នៃភាពចម្រូងចម្រាសរបស់ BLACKPINK បន្ទាប់ពីការចោទប្រកាន់ថា មានអន្តរាគមន៍ក្នុងការតែងតាំងដោយ Myung Tae Kyun គឺជាហេតុផលនយោបាយដើម្បីវាយប្រហារស្ត្រីទីមួយ ។ ពួកគេជឿថា នេះគឺជាការប៉ុនប៉ងដើម្បីទាញលោកស្រីឲ្យត្រលប់ទៅរកការចាប់អារម្មណ៍ផ្នែកនយោបាយ ដើម្បីបែងចែកមូលដ្ឋានអភិរក្សដែលបានរួបរួមគ្នា បន្ទាប់ពីដំណើរការចោទប្រកាន់នៅក្នុងរដ្ឋសភា។ ចាប់តាំងពីត្រូវបានស៊ើបអង្កេតដោយអយ្យការលើកាបូបប្រណីត និងការក្លែងបន្លំភាគហ៊ុនកាលពីខែកក្កដាកន្លងទៅ លោកស្រីបានបញ្ឈប់សកម្មភាពសាធារណៈ ហើយកំពុងស្នាក់នៅដោយស្ងាត់ស្ងៀម នៅឯគេហដ្ឋានប្រធានាធិបតី៕

អត្ថបទ៖ សាង ស្រីល័ក្ខ

ចុចអាន៖ដោះលែង Yoo Ah-in ក្រោយ​តុលាការសម្រច​ព្យួរ​ទោស ​ក្នុង​ករណី​គ្រឿង​ញៀន