ស្នាដៃចម្រៀងចុងក្រោយបង្អស់ របស់ Ruthko មុនឃ្លាតឆ្ងាយលែងវិលត្រលប់

មុនជួបឧបទវហេតុគ្រោះថ្នាក់ចរាចរណ៍បាត់បង់ជីវិត តារារ៉េបដ៏មានប្រជាប្រិយលោក ដាវិឌ ឬទ្ធិរុទ្រ ហៅ Rutho បានបន្សល់ទុកនូវស្នាដៃចម្រៀងចុងក្រោយបង្អស់មួយបទ ចំណងជើង “រស់នៅឱ្យសប្បាយ” (Live It Up) ខណៈចម្រៀងមួយបទនេះ បានបង្ហាញជាសាធារណៈនៅរសៀលថ្ងៃទី២១ កុម្ភៈនេះ លើហ្វេសប៊ុកផេកលោកផ្ទាល់។

តាមរយៈខ្លឹមសារភ្ជាប់នឹងវីដេអូចម្រៀងជាង ៣នាទី បានរៀបរាប់ថា “ចេញទៅដោយមិនបានលា តែនេះជាបទដែលគាត់សរសេរចុងក្រោយបំផុតមុនគាត់ចេញទៅ”។

​សារដដែលបញ្ជាក់ទៀតថា កាលនៅមានជីវិត Ruthko មានគោលដៅតែមួយគត់ គឺផ្ដល់ភាពសប្បាយរីករាយដល់សាធារណជន និងចង់ឃើញមនុស្សចេះស្រលាញ់គ្នា ចង់ឱ្យមនុស្សរៀនរស់ដោយមានក្ដីសង្ឃឹម ឱ្យតម្លៃជីវិតនិងអ្នកជុំវិញខ្លួន ហើយក៏ចង់ឃើញប្រទេសជាតិអភិវឌ្ឍគ្រប់វិស័យ ខណៈខ្លួនលោកផ្ទាល់មិនដែលចង់បានអ្វីក្រៅពីភាពកក់ក្ដៅពីអ្នកជុំវិញខ្លួននោះឡើយ។ តួយ៉ាង លោកជាមនុស្សម្នាក់ដែលស្រលាញ់ធម្មជាតិ និងសត្វព្រៃ ហើយចូលចិត្តជីវិតបែបសាមញ្ញៗ។

ក្នុងនោះ មានសរសេររៀបរាប់ដែរថា “ទោះបីពេលនេះលោកមិននៅ ប៉ុន្តែលោកបានបន្សល់ទុកអនុស្សាវរីយ៍ និងបទចម្រៀងជាច្រើន ដែលបានប៉ះដល់បេះដូងពួកយើងទាំងអស់គ្នា”។

គួរជម្រាបថា RuthKo ដែលមានឈ្មោះដើមថា លោក ដាវិឌ ឬទ្ធិរុទ្រ ត្រូវបានគេស្គាល់ថា ជាតារារ៉េបម្នាក់របស់កម្ពុជា និងជាសមាជិកក្មេងបំផុតរបស់ផលិតកម្ម KlapYaHandz ។ តាមរយៈចម្រៀងដែលរួមបញ្ចូលដោយសំឡេងប្រពៃណីខ្មែរ ជាមួយនឹងចង្វាក់ Hip Hop ក្នុងឧស្សាហកម្មតន្ត្រីសម័យ Rapper រូបនេះ ក៏ត្រូវបានគេចាត់ទុកថាជាសិល្បករមួយរូប ដែលបានរួមចំណែកយ៉ាងសំខាន់ដល់ការអភិវឌ្ឍន៍ឧស្សាហកម្មតន្រ្តីសម័យផងដែរ។

តារា​រ៉េប​វ័យ ២៤ឆ្នាំ​ រូបនេះ ជាអ្នក​ខេត្ត​បាត់ដំបង និងមានប្រវត្តិសិក្សាមកពីប្រទេសបារាំង។ មុនក្លាយជា Rapper ល្បីឈ្មោះ លោកធ្លាប់ជាអ្នកផលិតមាតិកាកំប្លែងខ្លីៗ និងវីដេអូ Freestyle ជាមួយនឹងអត្ថបទចម្រៀងដែលសរសេរដោយខ្លួនឯង កាលពីអំឡុងពេលកំពុងសិក្សានៅបារាំង។ ក្រោយមក នៅឆ្នាំ២០១៨ លោកក៏បានក្លាយជាតារាចម្រៀងរបស់ផលិតកម្ម Klapyahandz ។ នេះបើតាមប្រភពព័ត៌មាន giglifepro.com បានបញ្ជាក់។

បើតាម Asean Festival បញ្ជាក់ថា RuthKo ជា Rapper ម្នាក់ ដែលស្ទាត់ជំនាញទាំងភាសាខ្មែរ អង់គ្លេស និងភាសាបារាំង។ លោកក៏ជាសិល្បករដ៏លេចធ្លោជាមួយនឹងជំនាញក្នុងវិស័យតន្ត្រីខ្មែរ ហើយមានការទទួលស្គាល់ជាអន្តរជាតិជាមួយនឹងបទ “West side” ដែលជាការច្រៀងរួមគ្នានឹងលោក វុទ្ធា ។ ប្រភពដដែលបញ្ជាក់ទៀតថា ក្នុងការប្រគុំតន្ត្រី Rapper រូបនេះកាលពីឆ្នាំ២០២២ នៅទីក្រុងប៉ារីស គឺជាការប្រគុំតន្រ្តីដ៏ជោគជ័យមួយ ដែលទទួលបានការគាំទ្រខ្លាំង និងជាពេលដែលលោកកាន់តែឈានជំហានក្នុងការសាងភាពល្បីល្បាញ។

លើសពីនេះ RuthKo ក៏ត្រូវបានគេចាត់ទុកថា ជាសិល្បករមួយរូបដែលបានរួមចំណែកយ៉ាងសំខាន់ ដល់ការអភិវឌ្ឍន៍ឧស្សាហកម្មតន្រ្តីសម័យផងដែរ ជាមួយនឹងទេពកោសល្យដែលកំពុងលេចធ្លោក្នុងនាមជាគ្រូបង្វឹកក្នុងកម្មវិធី “The Rapper Cambodia” និងនៅឆ្នាំនេះក្នុងកម្មវិធី “Rapper Fighter” ។

នុងឱកាសចូលរួមវិស័យតន្ត្រី និងការបង្ហាញវប្បធម៌នៅក្នុងតំបន់អាសុី លោកធ្លាប់ប្រាប់ពីបំណងរបស់ខ្លួនក្នុងវិស័យចម្រៀង Hip Hop នេះ ថា ជំហានរបស់លោកក្នុងចម្រៀងអាស៊ាននេះ គឺលោកចង់ធ្វើជាតួអង្គមួយដែលមានភាពច្នៃប្រឌិតក្នុងការផលិតចម្រៀង ក៏ដូចជាការតាក់តែងនិពន្ធ ការលេងទំនុកច្រៀង លេងពាក្យ ដោយការប្រើឧបករណ៍បុរាណ និងសម័យលាយបញ្ចូលគ្នា។

មួយវិញទៀត លោកក៏បង្ហាញបំណងដែលចង់ឃើញខ្លួនឯង ជាតួអង្គដែលអាចផ្តល់ការកម្សាន្ត បំបាត់ទុក្ខសាធារណជន ក៏ដូចជាអ្នកណែនាំ ឬជម្រុញចិត្តអ្នកស្តាប់របស់លោកផងដែរ។ ប៉ុន្តែជារឿងដ៏គួរឱ្យសោកស្តាយ ឆន្ទៈនៃតារាចម្រៀងរ៉េបរូបនេះ ត្រូវបានបញ្ចប់ជាមួយនឹងហេតុការណ៍គ្រោះថ្នាក់ចរាចរណ៍ កាលពីយប់រំលងអាធ្រាត្រឈានចូលថ្ងៃទី ៦ ខែមករា ឆ្នាំ២០២៥ បន្សល់ត្រឹមតែស្នាដៃចម្រៀង និងសកម្មភាពរីករាយជាច្រើន ដែលលោកធ្លាប់ផ្តល់ជូនដល់មនុស្សជុំវិញខ្លួន។

គួររំលឹកថា តារារ៉េប Ruthko បានបាត់បង់ជីវិតភ្លាមៗខណៈជួបគ្រោះថ្នាក់ចរាចរណ៍ រវាងម៉ូតូនិងរថយន្ត ក្រោយរថយន្ដ Lexus RX 330 ពាក់ស្លាកលេខ ខ.ម 09.2-4771 បើកឆ្លងផ្លូវបុកមួយទំហឹងលេីបណ្តោយផ្លូវ ៦០ម៉ែត្រ ស្ថិតក្នុងសង្កាត់ចាក់រអង្រែក្រោម ខណ្ឌមានជ័យ រាជធានីភ្នំពេញ កាលពីវេលាម៉ោង និង២០នាទី យប់រំលងអាធ្រាតឈានចូលថ្ងៃទី៦ ខែមករា ឆ្នាំ២០២៥។

ចំពោះការបាត់បង់តារារ៉េបរូបនេះ មហាជន និងសិល្បករសិល្បការិនី នៅតែមានក្តីនឹករលឹក និងសោកសង្រេង អាឡោះអាល័យអនុស្សាវរីយ៍រួមគ្នានឹងលោកប៉ុណ្ណោះ៕