Jay Park តាមប្ដឹង Youtuber ម្នាក់ដែលចែកចាយព័ត៌មានមិនពិត ដល់តុលាការសហរដ្ឋអាមេរិក

តារាចម្រៀង Jay Park កំពុងរកយុត្តិធម៌ពី អ្នកបង្កើត YouTube ដែលកំពុងផ្សព្វផ្សាយពាក្យចចាមអារ៉ាមមិនពិត និងធ្វើឲ្យខូចកេរ្តិ៍ឈ្មោះ។ ដូចដែលដឹងស្រាប់ហើយថា Jay បើមើលពីក្រៅមក ដូចជាមនុស្សកោងកាច ព្រោះមានសាក់ពេញខ្លួន រីឯចរិតលក្ខណៈក៏មិនសុភាពរាបសារដូចតារា Kpop ដ៏ទៃដូចនេះ Youtuber ម្នាក់ បានយក Jay ធ្វើជាគោលដៅថ្មី ដើម្បីវាយប្រហារ។

បុគ្គលបង្កើតវីដេអូម្នាក់នោះ បានចែករំលែកព័ត៌មានមិនពិត បង្កើតពាក្យចចាមអារាមអាក្រក់ៗជាច្រើនទៅលើ Jay មានតាំងពីគ្រឿងញៀន ជួញដូរខុសច្បាប់ ផ្សេងៗច្រើនទៀត។ ប៉ុន្ដែ Jay Park នៅតែមានភាពស្អាតស្អំ ហើយក៏បានប្ដឹងទៅកាន់បុគ្គលមាត់ដាចម្នាក់នោះ មិនរួចខ្លួននោះទេ។

យោងតាមសេចក្តីរាយការណ៍ថ្មីៗនេះ តារាចម្រៀងរូបនេះបានដាក់ពាក្យស្នើសុំទៅតុលាការសហរដ្ឋអាមេរិកសម្រាប់សង្កាត់ភាគខាងជើងនៃរដ្ឋកាលីហ្វ័រញ៉ា ផ្នែក San Jose ដោយសុំឱ្យ Google បង្ហាញអត្តសញ្ញាណរបស់ម្ចាស់ប៉ុស្តិ៍ BBR Detective Agency ។

វីដេអូទាំងនេះនៅលើប៉ុស្តិ៍ភ្នាក់ងារស៊ើបអង្កេត BBR ទទួលបានការចូលមើលរាប់លានដង។ Jay Park បានឆ្លើយតបនឹងការចោទប្រកាន់នេះដោយប្តឹង “A” នៅក្នុងខែមករា ឆ្នាំ 2024 នៅតុលាការក្រុងសេអ៊ូលកណ្តាល។ ទោះជាយ៉ាងណាក៏ដោយ ការផ្ទៀងផ្ទាត់អត្តសញ្ញាណរបស់ម្ចាស់ប៉ុស្តិ៍នៅក្នុងប្រទេសកូរ៉េគឺមិនអាចទៅរួចនោះទេ ដោយសារក្រុមហ៊ុនមេរបស់ YouTube គឺ Google មានមូលដ្ឋាននៅសហរដ្ឋអាមេរិក។

ដូច្នេះហើយ Jay Park បានដាក់ពាក្យស្នើសុំការរកឃើញមួយផ្សេងទៀតនៅក្នុងតុលាការសហរដ្ឋអាមេរិកកាលពីខែមុន។ សំណុំរឿងនេះកំពុងស្ថិតក្រោមការត្រួតពិនិត្យដោយចៅក្រម Eumi K. Lee ។

ទន្ទឹមនឹងនោះ ថ្មីៗនេះ Jay Park ទទួលបានការចាប់អារម្មណ៍ បន្ទាប់ពីត្រូវបានតារាចម្រៀង Chungha លើកឡើងក្នុងបទសម្ភាសន៍មួយ ដោយបានបង្ហើបពីភាពមិនចុះសម្រុងរវាងអ្នកទាំងពីរ៕