ជីវិតកម្សាន្ដ

ឈានចូលវ័យ ៥៤ ឆ្នាំ តារាសម្តែងហ្វីលីពីន Kris មិនមានដៃគូជីវិតឡើយ

បានផុស

៣២ វិនាទី មុន

នៅ

ថ្ងៃសុក្រ ២៨ កុម្ភៈ ២០២៥

ដោយ

តារាសម្តែង Kris Aquino ដែលគេតែងតែហៅថា Queen of All Media របស់ហ្វីលីពីន សម្រាប់ឥទ្ធិពលដ៏សំខាន់របស់នាងនៅក្នុងឧស្សាហកម្មនេះ បានបង្ហាញឲ្យដឹងថា នៅអាយុ ៥៤ ឆ្នាំ បច្ចុប្បន្ននេះ នាងមិនមានទំនាក់ទំនង ឬភ្ជាប់ពាក្យជាមួយអ្នកណាឡើយ។

តារាស្រីរូបនេះបានសរសេរនៅលើ Instagram ផ្ទាល់ខ្លួនថា «ខ្ញុំតែងតែស្មោះត្រង់ជាមួយអ្នកទាំងអស់គ្នា មួយរយៈពេលនេះខ្ញុំនៅលីវ គ្មានមិត្តប្រុស ច្បាស់ណាស់ថាគ្មានគូដណ្តឹង។ ខ្ញុំមិនដែលផ្តល់ព័ត៌មានលម្អិតទេ ខណៈពេលដែលយើងនៅជាប្តីប្រពន្ធ ដូច្នេះវាមិនសមហេតុផលក្នុងការពន្យល់លម្អិតនៅពេលនេះទេ»។

អាពាហ៍ពិពាហ៍តែមួយគត់របស់ Aquino រហូតមកដល់បច្ចុប្បន្នគឺជាមួយកីឡាករបាល់បោះអាជីព James Yap ដែលនាងបានរៀបការនៅឆ្នាំ ២០០៥។ បើទោះបីជា Yap មានជម្លោះភាពមិនស្មោះត្រង់ក្នុងឆ្នាំ ២០០៦ក៏ដោយ ក៏ប្តីប្រពន្ធមួយគូនេះ នៅតែរស់នៅជាមួយគ្នារហូតដល់លែងលះគ្នាក្នុងឆ្នាំ ២០១២ ព្រមទាំងមានកូនពីរនាក់ជាមួយគ្នា។

កាលពីខែមិថុនាឆ្នាំមុន តារាស្រីរូបនេះបានចែករំលែកថានាងកំពុងជួបវេជ្ជបណ្ឌិត Michael Padlan ដែលជាវេជ្ជបណ្ឌិតដែលមានមូលដ្ឋាននៅទីក្រុង Makati ប្រទេសហ្វីលីពីន នេះបើយោងតាម PhilStar ។

ក្រោយមក កាលពីដើមខែតុលា ឆ្នាំ ២០២១ Aquino បានប្រកាសពីការភ្ជាប់ពាក្យរបស់នាង ជាមួយអ្នកនយោបាយហ្វីលីពីន Mel Sarmiento ដែលបានបម្រើការជាលេខាធិការក្រសួងមហាផ្ទៃ និងរដ្ឋាភិបាលក្នុងតំបន់នៃប្រទេសហ្វីលីពីនពីឆ្នាំ ២០១៥ ដល់ឆ្នាំ ២០១៦ តាមបណ្តាញ GMA ។ ទោះជាយ៉ាងណាក៏ដោយ គូស្នេហ៍មួយគូនេះបានបញ្ជាក់ពីការបញ្ចប់ការភ្ជាប់ពាក្យរបស់ពួកគេនៅខែមករា ឆ្នាំ ២០២២។

គួរជម្រាបជូនថា Aquino គឺជាកូនស្រីពៅរបស់សមាជិកព្រឹទ្ធសភា Benigno Aquino Jr. និងអតីតប្រធានាធិបតី Corazon Aquino ដែលជាស្ត្រីដំបូងដែលកាន់តំណែងប្រធានាធិបតីហ្វីលីពីន។ បងប្រុសរបស់នាង Benigno Aquino III ក៏បានធ្វើជាប្រធានាធិបតីទី១៥ នៃប្រទេសហ្វីលីពីនពីឆ្នាំ ២០១០ ដល់ឆ្នាំ ២០១៦ ផងដែរ។

នាងបានបង្ហាញខ្លួនជាលើកដំបូងក្នុងឆ្នាំ ១៩៩០ ហើយត្រូវបានទទួលស្គាល់ក្នុងប៉ុន្មានឆ្នាំថ្មីៗនេះសម្រាប់ការសម្ដែងរបស់នាងនៅក្នុងខ្សែភាពយន្តដ៏ល្បីល្បាញ Crazy Rich Asians ឆ្នាំ ២០១៨ ៕