របាំព្រះរាជទ្រព្យ ត្រៀមនឹងសម្តែងបង្ហាញជាថ្មីម្តងទៀតនៅប្រទេសបារាំង ក្រោយអាក់ខានប៉ុន្មានឆ្នាំ

របាំព្រះរាជទ្រព្យរបស់កម្ពុជា ត្រៀមនឹងសម្តែងបង្ហាញជាថ្មីម្តងទៀតនៅប្រទេសបារាំង បន្ទាប់ពីត្រូវបានអាក់ខានសម្តែងនៅប្រទេសបារាំងជាប៉ុន្មានឆ្នាំមកនេះ។ នេះបើយោងតាមការបញ្ជាក់ឱ្យដឹងពីស្ថានទូតបារាំងប្រចាំនៅកម្ពុជា។

ស្ថានទូតបារាំងប្រចាំនៅកម្ពុជា បញ្ជាក់ថា ការសម្តែងពិសេសចំនួន ៣ គ្រោងធ្វើឡើងនៅថ្ងៃទី៨ និងទី៩ ខែមីនា ខាងមុខនេះ នៅសារមន្ទីរ Muséed u quai Branly – Jacques Chirac ក្រុងប៉ារីស៍ ខណៈការសម្តែងពីរទៀត គ្រោងនឹងធ្វើនៅតាមខេត្ត ពោលគឺនៅ Opéra National de Bordeaux បន្ទាប់មកនៅ Cité musicale-Metz ។

ដោយមានការគាំទ្រពីក្រសួងវប្បធម៌ និងវិចិត្រសិល្បៈ ការសម្តែងរបាំព្រះរាជទ្រព្យនៅប្រទេសបារាំង ឆ្លុះបញ្ចាំងឱ្យឃើញនូវចំណងវប្បធម៌ដែលផ្សារភ្ជាប់ប្រទេសទាំងពីរ ក៏ដូចជាផ្តល់ឱកាសស្វែងយល់អំពីរបាំមួយ ដែលមានអាយុកាលពាន់ឆ្នាំ អមដោយសម្លៀកបំពាក់និងគ្រឿងលម្អប្រណិត និងកាយវិការរាំដ៏ទន់ភ្លន់ក្រៃលែងរបស់នាដការី។

សមាគមសិល្បករខ្មែរ បានឱ្យដឹងដែរថា លោកជំទាវ អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរនឹងអមដំណើរលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្រោមព្រះរាជវត្តមានសម្តេចរាជបុត្រីព្រះអនុជនរោត្តម អរុណរស្មី ក្នុងដំណើរបេសកកម្មទៅកាន់ប្រទេសបារាំង។

បើតាមការបញ្ជាក់ ក្នុងដំណើរដឹកនាំប្រតិភូ និងសិល្បករកម្ពុជាទៅសម្តែងនៅប្រទេសបារាំង គឺរយៈពេល៧ថ្ងៃ ពោលគឺចាប់ពីថ្ងៃទី០៦ ដល់ ថ្ងៃទី១២ ខែមីនា ឆ្នាំ២០២៥ ។

ប្រភពដដែលបញ្ជាក់ដែរថា ការសម្តែងនៅក្នុងកម្មវិធី «Le Ballet roy al du Cambodge» នាពេលខាងមុខនេះ គឺបន្ទាប់ពីរបាំព្រះរាជទ្រព្យដែលជាសម្បត្តិបេតិកភណ្ឌវប្បធម៌អរូបី នៃមនុស្សជាតិមួយនេះ ត្រូវអាក់ខានសម្តែងនៅប្រទេសបារាំងជាច្រើនឆ្នាំ បន្ទាប់ពីការយាងចូលទិវង្គតរបស់សម្តេចរាជបុត្រីព្រះរៀម នរោត្តម បុប្ផាទេវី ៕ អត្ថបទ៖ ចាន់រ៉ា