នាយ កុយ ចេញសម្តែងឡើងវិញក្រោយសុខភាពល្អប្រសើរ

តារាកំប្លែងជើងចាស់ល្បីឈ្មោះលោក ជួង ជី ហៅនាយ កុយ បានវិលមកចូលសម្តែងតាមបណ្តាកម្មវិធីផ្សេងៗវិញហើយក្រោយសុខភាពល្អប្រសើរជាងមុនច្រើន។ ប៉ុន្តែក៏មានអ្នកគាំទ្រមួយចំនួនបង្ហាញក្តីបារម្ភចំពោះសុខភាពលោកផងដែរ។

ការវិលមករកអាជីពសម្តែងនេះបន្ទាប់ពីនាយ កុយ ទទួល ការវះកាត់ដុំសាច់មហារីកពោះវៀនធំដោយជោគជ័យនៅឯមន្ទីរពេទ្យបាងកកប្រទេសថៃកាលពីអំឡុងខែកុម្ភៈកន្លងទៅ។ ទោះបីយ៉ាងណាបច្ចុប្បន្នសុខភាពលោកគឺមិនទាន់វិលរកភាពប្រក្រតី ១០០ភាគរយ ដូចដើមឡើយ គ្រាន់តែអាចចេញសម្តែងតាមបណ្តាខេត្តបានខ្លះ។

តួយ៉ាង មានការបង្ហើបថា តារាកំប្លែងនាយ កុយ កាលពីយប់ថ្ងៃទី០១ខែមីនាឆ្នាំ២០២៥ បានចាប់ផ្តើមចេញសម្តែងវិញ នៅ ឯកម្មវិធីកាតសក់មង្គលការមួយនាខេត្តកំពត បន្ទាប់មកនៅថ្ងៃទី០៣ ខែមីនាឆ្នាំ២០២៥ នាយបានបន្តដំណើរទៅកាន់ខេត្តបាត់ដំបងដើម្បីចូលរួមកម្មវិធីសម្តែងមួយទៀតនៅថ្ងៃទី៤ ខែមីនា ឆ្នាំ២០២៥។

លោកជួង ជី ហៅ នាយ កុយ បានឱ្យដឹងថា ពេលនេះសុខភាពរបស់លោកបានល្អប្រសើជាងមុនច្រើន លោកអាចហាត់ប្រាណនិងចេញសម្តែងបានខ្លះ គ្រាន់តែមិនអាចសម្តែងហត់លោតដូចមុន។ នាយកុយ បន្តថា លោកបានធូរស្រាលហើយប៉ុន្តែក៏មិនទាន់បានជាស្រឡះទេ ដោយសារមានដុំសាច់កាចត្រូវបន្តទៅពេទ្យថៃព្យាបាលបន្តទៀត ដោយត្រូវចាក់គីមី ។

តារាកំប្លែងនាយកុយ បានឱ្យដឹងផងដែរថា មូលហេតុដែលលោកប្រញាប់ត្រលប់ទៅទទួលការងារឡើងវិញដោយសារតែលោកបានទទួលការងារចាស់ហ្នឹងជាយូរមកហើយ ហើយក៏មិនចង់ឱ្យខកខាន ណាមួយពេលនេះសុខភាពលោកក៏បានធូរស្រាលច្រើន ចេញសម្តែងខ្លះក៏ជារឿងល្អជាជាងនៅផ្ទះ ។

នាយ កុយ បានបញ្ជាក់បន្ថែថាខាងពេទ្យថៃគេណាត់ជាក់គីមីនៅខែមេសា ដូច្នេះនៅថ្ងៃទី០២ខែមេសាលោ កត្រូវឡើងទៅទីក្រុងបាងកកប្រទេសថៃដើម្បីចាក់គី មីបន្តទៀត។លោកសូមអរគុណដល់បងប្អូនកូនក្មួយទាំងអស់ដែល បានអាណិតអាសូរនិងគាំទ្រដល់រូប លោកដែលមានជំងឺវះកាត់ជាបន្ទាន់កាលពីថ្មីៗកន្លងទៅ៕ អត្ថបទ៖ ចាន់រ៉ា