ម៉េង កែវពេជ្ជតា ស្នើរួមគ្នាលុបបំបាត់ក្រុមផលិតមាតិកាបំពុលសង្គម ដើម្បីប្រយោជន៍ជាតិ

កំពូលតារាចម្រៀងសម្លេងពិរោះរណ្តំចិត្តអ្នកនាង ម៉េង កែវពេជ្ជតា ក្នុងគោលបំណងចូលរួមបំបាត់រឿងមិនល្អ ដែលនាំឱ្យប៉ះពាល់តម្លៃសង្គមបានចេញមុខបំផុសដោយស្នើដល់មហាជនអ្នកនិយមប្រើប្រាស់បណ្តាញទំនាក់ទំនងសង្គម រួមគ្នាលុបបំបាត់ក្រុមផលិតមាតិកា បំពុលតាមបណ្តាញសង្គមដើម្បីប្រយោជន៍ជាតិ។

ការលើកឡើងរបស់អ្នកនាង ម៉េង កែវពេជ្ជតា នាពេលនេះដោយសង្កេតឃើញថាបច្ចុប្បន្ន កំពុងមានបុគ្គលមួយចំនួនបានបង្កើតនូរឿងរ៉ាវអសីលធម៌ខ្វះការគិតពិចារណាអត់ប្រយោជន៍ដែលនាំឱ្យបំពុលសង្គមតាមរយ:ការប្រើប្រាស់បណ្តាញសង្គមនានាធ្វើជាឈ្នាន់ដើម្បីទាញយកផលប្រយោជ៍ផ្ទាល់ខ្លួន ខណ:អ្នកនាងបំផុសអ្នកគាំទ្រត្រូវរួមគ្នាលុបបំបាត់។

សរសេរបង្ហោះភ្ជាប់ខ្លឹមសារនៃសេចក្តីណែនាំរបស់ក្រសួងព័ត៌មានដល់អ្នកផលិតមាតិការនៅតាមបណ្តាញសង្គមកាលពីថ្មីៗកន្លងទៅ អ្នកនាង ម៉េង កែវពេជ្ជតា បានលើកថា “ផ្តេីមចេញពីការឈប់ចូលមេីលឈប់ចុច Like ឈប់ Comment ឈប់​ Share បន្ទាប់មកត្រូវតែមានចំណាត់ការផ្លូវច្បាប់ឱ្យធ្ងន់ធ្ងរសម្រាប់អ្នកផលិតមាតិកាបំពុល​នោះមាតិការឆ្កួតៗទាំងនោះនឹងរលាយបាត់” ។

តារាចម្រៀងជើងចាស់អ្នកនាង ម៉េង កែវពេជ្ជតា បានបញ្ជាក់បន្ថែមថាការលេីកស្ទួយមាតិការណ៍ ឬរូបភាពមិនត្រឹមត្រូវបែកស្លុយ​គឺគាំទ្រអំពេីអសីលធម៌​។ ដូច្នេះអ្នកនាងយល់ថាយើងត្រូវរួមគ្នាដើម្បីលុបបំបាត់។ តាមរយ:នេះដែរ មានមហាជនមួយចំនួនបានបង្ហាញការគាំទ្រគំណិតដ៏ល្អនេះ។

ក្រៅពីអ្នកនាង ម៉េង កែវពេជ្ជតា ជាការកត់សម្គាល់កន្លងមកក៏មានអ្នកសិល្បករជើងចាស់ល្បីឈ្មោះ ២រូប មកហើយគឺលោក ដួង សុខគា និងលោក គួច ខេវិន តែងបង្ហាញការព្រួយបារម្ភ និងចេញសាបំផុសជាបន្តបន្ទាប់ ជុំវិញអ្នកប្រើប្រាស់បណ្តាញសង្គមយក្សហ្វេសប៊ុក ដើម្បីជាការដាស់តឿនពាក់ព័ន្ធការផលិតមាតិកា និងការបង្ហោះអ្វីមួយនៅលើបណ្តាញសង្គមគួរថ្លឹងថ្លែងឱ្យប្រាកដជាមុនសិន៕ អត្ថបទ៖ ចាន់រ៉ា