តួនាងឡាំយ៉ង ត្រូវគេរិះគន់ថា ច្រៀងមិនកើត ខណៈលេចមុខលើប៉ុស្តិ៍ទូរទស្សន៍ចិន

តារា​សម្ដែង​ជើង​ចាស់ Nune Woranuch បានបង្ហាញខ្លួនក្នុងកម្មវិធី Ride The Wind 2025 ដែលចាក់ផ្សាយលើកញ្ចក់ទូរទស្សន៍ Mango TV បង្កើតការភ្ញាក់ផ្អើលដល់អ្នកទស្សនាទាំងប្រទេសថៃ និងចិន។ នាងគឺជាតំណាងតែម្នាក់គត់ដែលបានចូលរួមក្នុងកម្មវិធីដ៏ល្បីរបស់ចិនក្នុងរដូវកាលនេះ បន្ទាប់ពី Mai Davika ដែលបានមកកម្មវិធីនេះក្នុងឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Ride The Wind 2025 គឺជាកម្មវិធីដែលផ្តល់ឱកាសដល់អ្នកសម្ដែង និងសិល្បករមកពីជុំវិញពិភពលោក មកបង្ហាញទេពកោសល្យ ដើម្បីលើកកម្ពស់ទំនាក់ទំនងអន្តរជាតិ។ ក្នុងកម្មវិធីនោះដែរ តារាស្រីថៃសម្តែងបទ Highlight ច្រៀងបទ PING របស់តារាប្រុស Non Thanon រួមផ្សំទំនុកច្រៀងជាពីរភាសាគឺថៃ និងចិន ធ្វើ​ឲ្យចៅក្រម​ក្នុង​ស្ទូឌីយ៉ូ​ស្រឡាំងកាំង ​នឹង​សមត្ថភាពមិនធម្មតារបស់តារាស្រីវ័យ៤០ ឆ្នាំរូបនេះ។

បន្ទាប់ពីការសម្តែចប់ អ្នកគាំទ្រ​ជនជាតិ​ចិន​បានសម្រុកចែករំលែក​ឃ្លិបរបស់តួនាងឡាំយ៉ង ច្រៀង​នៅលើ​បណ្តាញ​សង្គម​ រួមទាំង Page ល្បីៗ​ដែលមាន​អ្នកតាមដាន​ជាង​១៤​ម៉ឺន​នាក់​ក៏បាន​បង្ហោះវីដេអូ និង​បាន​បញ្ចេញមតិពោលសរសើរអំពីសមត្ថភាព ទេពកោសល្យសម្ដែងការច្រៀង ព្រមទាំងសក្តានុពលរបស់នាង ទាំងស្រស់ស្អាត និងសក្តិសមជាតារាស្រីលំដាប់ជួរមុខ របស់ប្រជាជនថៃពិតមែន។

ទោះជាយ៉ាងណាក៏ដោយ ​ក្រៅពីការសរសើរក្នុងនោះក៏មានមានមតិជាច្រើនរិះគន់ការច្រៀងរបស់ Nune ​ថា វា​មិន​ល្អ​គ្រប់​គ្រាន់​ទេ នាងជ្រើសរើសបទចម្រៀងដែលពិបាកច្រៀងធ្វើឲ្យរូបភាពទាំងមូលមិនសូវល្អ។ មតិ​ខ្លះ​ថា សំឡេង​ច្រៀង​របស់តារាថៃរូបនេះមិន​ទាន់​ល្អ​គ្រប់គ្រាន់ទេ នាង​គួរ​តែ​ហាត់​ច្រៀង​ឲ្យ​បាន​ច្រើន ទើបមើលទៅមិនសូវឆ្គង។

យ៉ាង​ណា​មិញ ចំ​ពេល​មាន​សម្ពាធ និង​ការ​រំពឹង​ទុក​ពី​ទស្សនិកជន​មួយ​ចំនួន ជាពិសេសអ្នកណារិះគន់ Nune ច្រៀងមិនសូវពិរោះនោះ ក៏មានមតិល្អៗជាច្រើនពីហ្វេនៗផងដែរ។ ក្នុងនោះម្នាក់ៗបានផ្ញើការលើកទឹកចិត្តយ៉ាងកក់ក្តៅ សរសើរទឹកចិត្តប្រយុទ្ធលើឆាកអន្តរជាតិរបស់នាង ព្រមទាំងការលះបង់ក្នុងនាមជាតារាសម្ដែងប្រចាំប្រទេសថៃ៕

អត្ថបទ៖ សាង ស្រីល័ក្ខ

ចុចអាន៖Due ដាក់លក់​របស់របរ​ផ្ទាល់ខ្លួនឡៃឡុង យកលុយ​សង​បំណុល​គេ​