នៅ ស៊ីនឿន ចូលរួមជាសមាជិកសមាគមសិល្បករខ្មែរ ទោះកំពុងបន្តអាជីពសិល្បៈនៅឯនាយប្រទេស

ទោះទៅដល់ទឹកដីស៊ីវិល័យសម្បូរដុល្លារ លោក នៅ ស៊ីនឿន នៅតែផ្តល់គុណតម្លៃដល់សមាគមសិល្បករខ្មែរ ដែលជាផ្នែកមួយដើម្បីរួមគ្នាអភិរក្សការពារអភិវឌ្ឍ និងលើកស្ទួយវិស័យសិល្បៈវប្បធម៌របស់កម្ពុជា តាមរយៈការចុះឈ្មោះចូលជាសមាជិករបស់សមាគមអាណត្តិទី៦ ស្របពេលដែលលោកកំពុងមានវត្តមាននៅប្រទេសកំណើត។

ទង្វើនេះត្រូវបានសមាគមសិល្បករខ្មែរអាណត្តិទី៦ ដែលមានលោកជំទាវអ្នកឧកញ៉ា ម៉ៅ ចំណាន ចាត់ទុកថាជាការផ្តល់គុណតម្លៃដល់សមាគមសិល្បករ និងសិល្ប:វប្បធម៌របស់ប្រទេសកំណើតខ្លួនទឹកដីកម្ពុជាដ៏អច្ឆរិយ:។

សមាគមបានឲ្យដឹងថាហេតុផលដែលលោក នៅ ស៊ីនៅ ចូលជាសមាជិកដោយសារតែលោកយល់ ក្នុងការចូលជាសមាជិករបស់សមាគមគឺជាកាតព្វកិច្ចរបស់សិល្បករគ្រប់រូប ដើម្បីរួមគ្នាអភិរក្សការពារអភិវឌ្ឍ និងលើកស្ទួយវិស័យសិល្បៈវប្បធម៌របស់កម្ពុជា។

គួរបញ្ជាក់ថា លោក នៅ ស៊ីនឿន បានផ្តើមអាជីពជាតារាចម្រៀងដំបូងនៅផលិតកម្មស្វាងតារា ក្រោយមកបានក្លាយជាតារាចម្រៀងល្បីនៅផលិតកម្មរស្មីហង្សមាស ហើយចុងក្រោយលោកបានរៀបការចេញទៅរស់នៅរដ្ឋកាលីហ្វ័រនីញ៉ា សហរដ្ឋអាមេរិក។ ទោះបីជាលោកចេញទៅរស់នៅសហរដ្ឋអាមេរិកក្តី តែលោកនៅតែបន្តអាជីពសិល្បៈនេះដដែល៕ អត្ថបទ៖ ចាន់រ៉ា