នាយ ក្រិន ទម្លាយថា ខ្លួនក៏ធ្លាប់ថតកុនប៉ះផលិតករមិនបើកលុយឱ្យដែរ

តារាកំប្លែងមាឌល្អិត នាយ ក្រិន បានទម្លាយឱ្យដឹងថានាយក៏ធ្លាប់ជាជនរងគ្រោះម្នាក់ផងដែរក្នុងចំណោមអ្នកសិល្ប:ឯទៀតដែលត្រូវបានផលិតករ ឬម្ចាស់ផលិតកម្មបោកទំនុកចិត្ត និងកេងប្រវ័ញ្ចកំលាំងញើសឈាមមិនបើកលុយឱ្យពេលថតកុនចប់។

ការបង្ហាញអារម្មណ៍របស់តារាកំប្លែងនាយ ក្រិន នេះ ខណ:ដែលថ្មីៗនេះមានសិល្បករសិល្បការិនីខ្មែរមួយចំនួន បានចេញមកត្អូញត្អែរ និងទម្លាយការឈឺចាប់ ព្រោះម្ចាស់ផលិតកម្មឬផលិតករមិនបើកលុយកម្រៃថ្លៃថតរឿងតាមការសន្យាតួយ៉ាងដូចតារាសម្តែងជើងចាស់អ្នកស្រី រ៉េត រ៉ូស ជាដើម។

តារាកំប្លែងមានដើមកំណើតចេញពីខេត្តបាត់ដំបងនាយ ក្រិន បានឱ្យដឹងថារឿងឈឺចាប់នេះបានកើតមកលើខ្លួនកាលពីអំឡុងប៉ុន្មានឆ្នាំកន្លងមកនេះ ពោលគឺមកដល់បច្ចុប្បន្ន នៅតែមិនទទួលបានលុយថតកុននោះឡើយ។ នាយ ក្រិន ថាកាលពីជំនាន់មុនពេលថតចប់ប្រាប់ថា ចាំស្អែកបើកលុយតែស្អែកនេះ គឺស្អែកមិនចេះចប់រហូតមកដល់សព្វថ្ងៃ។ នាយថាមានផលិតករមួយចំនួនតូចទេ ដែលកេងប្រវ័ញ្ចកំលាំងញើសឈាមអ្នកសិល្ប:ដូច្នេះ។

គួរបញ្ជាក់ថា បន្ទាប់បាត់វត្តមានពីសិល្ប:មួយរយ:ធំកន្លងទៅតារាកំប្លែងមាឌល្អិតកម្សត់ស្នេហ៍នាយ ក្រិន កាលពីថ្មីៗនេះបានបញ្ជាក់ថា បច្ចុប្បន្នលោកកំពុងរស់នៅជាមួយកូនៗទាំង ៣នាក់ ឯស្រុកកំណើតខេត្តបាត់ដំបងដោយប្រកបរបរចិញ្ចឹមមាន់ទា ដើម្បីបានប្រាក់កម្រៃចិញ្ចឹមខ្លួន និងកូនៗទាំង៣ដែលកំព្រាម្តាយ៕ អត្ថបទ៖ ចាន់រ៉ា