ប្អូនប្រុស វ៉ាង ស្រីណូ ចេញមុខសុំទោសស្ថាប័ន Majestic Cambodia ក្រោយរិះគន់មិនសំចៃមាត់

ក្រោយមានការប្រតិកម្ម និងចេញលិខិតជូនដំណឹងពីសំណាក់មេធាវីតំណាងឱ្យស្ថាប័ន Miss and Mister Majestic Cambodia ទីបំផុតប្អូនប្រុសតារាសម្តែង វ៉ាង ស្រីណូ ឈ្មោះ ជុង វ៉ាង បានចេញមុខសុំទោសស្ថាប័ន Majestic Cambodia ជាសាធារណ:នូវកំហុសឆ្លងរបស់ខ្លួន។

ការចេញមុខសុំទោសស្ថាប័ន Miss and Mister Majestic Cambodia ពីសំណាក់លោក ជុង វ៉ាង បន្ទាប់ពីថ្មីៗនេះលោកបានសរសេររិះគន់យ៉ាងចាស់ដៃលើស្ថានប័នមួយនេះ ដែលបង្កឱ្យមានការមិនសប្បាយចិត្តពីអ្នករៀបចំកម្មវិធីប្រកួតក៏ដូចជាបេក្ខភាពប្រឡងផងដែរ។

ជាក់ស្តែងកាលពីថ្ងៃទី១៧ ខែមីនា ឆ្នាំ២០២៥ ហ្វេសប៊ុកផេកមួយឈ្មោះ ChanDara Vang បានបង្ហោះវីដេអូដែលមានចំណងជើងថា “កម្មវិធីប្រកួតសម្រស់ ឬកម្មវិធីស្វែងរកជនពិការ និងអ្នកមុខអាក្រក់” ខណៈក្នុងវីដេអូនោះ បាននិយាយប្រមាថមាក់ងាយយ៉ាងអសីលធម៌បំផុតទៅកាន់កម្មវិធី Miss and Mister Majestic Cambodia ក៏ដូចជា បេក្ខជនបេក្ខនារីដែលបានចូលរួមប្រកួតប្រជែងយ៉ាងចាស់ដៃ។

យ៉ាងណាមិញ បន្ទាប់ពីដឹងកំហុស និង មានការចេញលិខិតពីស្ថាប័នខាងលើម្ចាស់គណនីឈ្មោះ Chandara Vang និង Facebook ឈ្មោះ ជុង វ៉ាង បានចេញមុខសុំទោសជាសាធារណ:នូវកំហុសឆ្គងរបស់ខ្លួនដោយលើកឡើងថា “ខ្ញុំបាទសូមធ្វេីការទោសជាសាធារណៈដល់កម្មវិធី Miss and Mister Majestic Cambodia និងបេក្ខភាពបេក្ខនារីទាំងអស់។ ទន្ទឹមនេះ លោកក៏បានសន្យាលុបចោលនូវវីដេអូទាំងអស់ ដែលបានបង្ហោះរិះគន់កម្មវិធីកន្លងមកផងដែរ៕ អត្ថបទ៖ ចាន់រ៉ា