IU រកចំណូលបានជាង២៣លានដុល្លារ ពីអាជីពសិល្បៈមួយមុខ

នៅថ្ងៃទី ២៨ ខែមីនា EDAM Entertainment បានចេញផ្សាយរបាយការណ៍សវនកម្មឆ្នាំ ២០២៤ របស់ខ្លួន។ ដូច្នោះហើយ ការចំណាយសរុបដែលបានចំណាយដល់សិល្បករចាប់ពីថ្ងៃទី ០១ ខែមករា ដល់ថ្ងៃទី ៣១ ខែធ្នូ ឆ្នាំ ២០២៤ ត្រូវបានបញ្ជាក់ថាមានចំនួន ៣៣.៦ ពាន់លានវ៉ុន (២២.៩ លានដុល្លារអាមេរិក)។

គួរកត់សម្គាល់ថា IU គឺជាសិល្បករតែមួយគត់របស់ក្រុមហ៊ុនដែលសកម្មនៅក្នុងឆ្នាំ ២០២៤ ខណៈដែលតារាចម្រៀងប្រុស WOODZ (Cho Seung Youn) កំពុងសម្រាកដោយសារតែកាតព្វកិច្ចយោធា។ ដូច្នេះហើយ តម្លៃដែលបង់ជូនសិល្បករដែលបានរាយក្នុងរបាយការណ៍នេះ ភាគច្រើនបានចូលទៅក្នុងហោប៉ៅរបស់តារាចម្រៀងស្រីដែលកើតក្នុងឆ្នាំ ១៩៩៣។ ការទូទាត់សំណងរបស់ IU ត្រូវបានគេប៉ាន់ស្មានថា មានចំនួនប្រហែល ៣០ ពាន់លានវ៉ុន (២០.៤ លានដុល្លារ)។

នៅក្នុងក្រុមហ៊ុនកម្សាន្ត EDAM Entertainment Kakao Entertainment កាន់កាប់ភាគហ៊ុនធំជាងគេ (៥២.៥%) ខណៈដែល IU គឺជាម្ចាស់ភាគហ៊ុនធំទីបីដែលមានភាគហ៊ុន ២២.៥% ។

ទោះបីជាមានសិល្បករផ្សេងទៀតក៏ដោយ EDAM ត្រូវបានគេដឹងថា ផ្តោតសំខាន់លើ IU ដោយសារតែប្រាក់ចំណូលភាគច្រើនរបស់ក្រុមហ៊ុនបានមកពីការសម្ដែងរឿង «When Life Gives You Orange»។ ចំនួនទឹកប្រាក់ ៣០ ពាន់លានវ៉ុនមិនមែនជាប្រាក់ចំណូលសរុបពិតប្រាកដដែល IU ទទួលបាននោះទេ។ នេះ​គ្រាន់​តែ​ជា​ប្រាក់​ដែល​នាង​ទទួល​បាន​ក្នុង​នាម​ជា​អ្នក​សិល្បៈ។ លើសពីនេះ នាងក៏ទទួលបានភាគលាភក្នុងនាមជាម្ចាស់ភាគហ៊ុនធំនៅក្នុងក្រុមហ៊ុនផងដែរ។

របាយការណ៍សវនកម្មនេះ ត្រូវបានផ្សព្វផ្សាយជាសាធារណៈ បន្ទាប់ពីប្រព័ន្ធផ្សព្វផ្សាយកូរ៉េបានរាយការណ៍ថា IU និងសហតារាសម្ដែង Park Bo Gum រកបានប្រហែល ៥០០លានវ៉ុន (៣៤៦,០០០ ដុល្លារ) ក្នុងមួយវគ្គនៃរឿង «When Life Gives You Tangerines» ។

ពាក្យចចាមអារ៉ាមនេះត្រូវបានបដិសេធដោយក្រុមហ៊ុនផលិតខ្សែភាពយន្ត Pan Entertainment កាលពីថ្ងៃទី ១៨ ខែមីនា។ ពួកគេបានបញ្ជាក់ថាព័ត៌មានដែល IU ទទួលបាន៥០០ លានវ៉ុនក្នុងមួយវគ្គគឺមិនពិត ប៉ុន្តែមិនបានបង្ហាញពីចំនួនជាក់លាក់នោះទេ។

IU (ឈ្មោះពិត Lee Ji Eun) ស្ថិតនៅក្នុងបញ្ជីរបស់ Forbes ក្នុងចំណោមតារាល្បី ៗ ទាំង ៤០នៅក្នុងប្រទេសកូរ៉េ។ នាង​មិន​ត្រឹម​តែ​ច្រៀង​បាន​ល្អ និង​តែង​និពន្ធ​បាន​ល្អ​ទេ ប៉ុន្តែ​នាង​ក៏​ទទួល​បាន​ជោគជ័យ​ក្នុង​ការ​សម្ដែង និង​ការ​ផ្សាយ​ពាណិជ្ជកម្ម​ផង​ដែរ។ តារាស្រីបានចូលប្រឡូកក្នុងវិស័យសិល្បៈកូរ៉េក្នុងនាមជាតារាចម្រៀង។ មក​ដល់​ពេល​នេះ នាង​គឺ​ជា​តារា​ចម្រៀង​ស្រី​ដ៏​ល្បី​មួយ​រូប​ក្នុង​វិស័យ Kpop។ នាង​ត្រូវ​បាន​គេ​ចងចាំ​សម្រាប់​សំឡេង​ដ៏​ច្បាស់​លាស់ ស្រទន់មានទឹកដម លើស​ពី​នេះ នាង​ក៏​ពូកែ​និពន្ធ និង​លេង​ឧបករណ៍​ភ្លេង​យ៉ាងស្ទាត់ជំនាញដែរ ។

នៅឆ្នាំ ២០២៤ IU បានលះបង់ពេលវេលាភាគច្រើនរបស់នាងក្នុងអាជីពតន្ត្រី។ ជាពិសេស នាងបានរៀបចំដំណើរទេសចរណ៍ពិភពលោក HER 2024 ដែលចាប់ផ្តើមនៅថ្ងៃទី ០២ ខែមីនា ឆ្នាំ ២០២៤ នៅទីក្រុងសេអ៊ូល ប្រទេសកូរ៉េខាងត្បូង។

ក្នុងឆ្នាំ ២០២៥ នាងបានធ្វើឲ្យមានការចាប់អារម្មណ៍ជាសកលនៅពេលដែលនាងបានសម្តែងក្នុងរឿង «When Life Gives You Oranges»។ នាងត្រូវបានគេសរសើរថាជាតារាពូកែសម្ដែង ដោយបានគ្រងតំណែងពីរ ដោយមិនមានការត្រួតស៊ីគ្នា ធ្វើឲ្យអ្នកទស្សនាស្រក់ទឹកភ្នែកទោរទន់ទៅតាមសាច់រឿង។ មិនតតែប៉ុណ្ណោះ IU ក៏​ជា​មុខ​មាត់​គួរឲ្យចាប់​អារម្មណ៍​របស់​ម៉ាក​យីហោ​ដែល​គេ​ស្គាល់​ថា ​ជា​រាជិនី​ផ្សាយ​ពាណិជ្ជកម្ម ដោយយោងតាម ​​GQ India តារាស្រីវ័យ៣១ឆ្នាំ មានទ្រព្យសម្បត្តិសុទ្ធប៉ាន់ស្មានចំនួន ៤៥ លានដុល្លារនៅឆ្នាំ ២០២៤៕

អត្ថបទ៖ សាង ស្រីល័ក្ខ

ចុចអាន៖សន្និសីទ Kim Soo Hyun ទាញអ្នកទស្សនានៅចិនជាង ១៣ លាននាក់ មិនគួរឲ្យជឿ