​​ផ្ទុះរឿង​អាស្រូវ​ផ្លូវច្បាប់ផ្ទួនៗ បវរកញ្ញាវៀតណាម Thuy Tien ប្រឈមដកហូត​​មកុដ​ដ៏​អាម៉ាស់

​ក្រោយ​គ្រង​តំណែង​ឯក​​ពី​កម្មវិធី Miss Grand International ​ប្រចាំឆ្នាំ​​២០២១​មក ​ភាព​ល្បីល្បាញ​​របស់ ​កញ្ញា Nguyen Thuc Thuy Tien បានក្លាយជា​ទី​ចាប់អារម្មណ៍របស់អ្នកគាំទ្រ​ទាំង​ជាតិនិង​អន្តរជាតិ​ ជាពិសេសអ្នក​និយម​តាមដាន​កម្មវិធី​សិល្បៈ​​​។ ​ប៉ុន្តែ​​​ ការ​​ជាប់​ពាក់ព័ន្ធ​នឹង​រឿងអាស្រូវ​​ផ្លូវ​ច្បាប់​ពាក់​ព័ន្ធ​លុកកាក់ និង​​ការ​ឃោសនា​បែបភូតភរកុហក​​ ក៏កំពុង​ទាញ​​ជោគវាសនា​​ង​ដែលខិតខំ​កសាងដោយលំបាកនោះឲ្យ​ធ្លាក់​​ចុះហៅលែង​ឮផងដែរ​។​

មាន​សម្រស់ស្រស់សោភានិងរាងកាយស្រឡូនស្អាត​​​ពិបាករកគូប្រៀប​​ បវរកញ្ញា​ឯក​​វៀតណាម​រូបនេះ តែងតែបង្ហាញភាពស្រស់ស្រាយ រួសរាយរាក់ទាក់ និងចូលរួមយ៉ាងសកម្មក្នុងសកម្មភាពសប្បុរសធម៌នានា។

ជារឿយៗ ទស្សនិកជន​ទូទៅ​និង​​​អ្នកគាំទ្រ​របស់​នាង​ជាពិសេស​នោះ​ តែងតែមើលឃើញថា​​ កញ្ញា Thuy Tien មានទឹក​​មុខ​ញញឹម ស្រស់ស្រាយ និង​ស្វាហាប់ រាល់ពេលបង្ហាញវត្តមានជាសារណៈ​ម្តងៗ​ ក៏ប៉ុន្តែបវរកញ្ញាឯករូបនេះ មែន​ទែនទៅ មានជីវិត​ដ៏កម្សត់​ និង​លំបាកណាស់​​​កាលពី​វ័យ​កុមារភាព។ ឪពុកម្តាយបានបែកបាក់​គ្នានៅពេលនាងមានអាយុ ​ទើបតែ​៤ឆ្នាំ ហើយក្រោយមក នាងបានទៅស្នាក់ជាមួយម្ដាយមីង​រហូត​​​ដល់​ពេញ​វ័យ​​​អាយុ១៨ឆ្នាំ។

ថ្វីដ្បិតតែ ​មិន​បាន​ទទួល​ភាព​កក់ក្តៅ​ពីគ្រួសារ​​និង​​រស់​នៅជុំឪពុកម្តាយក៏ដោយ ​ប៉ុន្តែ​ហែលឆ្លង​ជីវិត​​លំបាកនោះ​បាន​ធ្វើ​ឲ្យ​នាង​ចេះ​តស៊ូ​និង​ការ​តំាងចិត្ត​មាំ​ដើម្បីសម្រេចក្តីប្រាថ្នាធំៗ​ក្នុងជីវិត្ត។ រាជិនី​កំពូល​សម្រស់​របស់​វៀតណាម​រូប​នេះ គឺជាមនុស្សស្រីដែល​ពោរពេញដោយ​ការ​តាំងចិត្តក្នុងជីវិត ប្តេជ្ញាបន្តការសិក្សារហូតដល់ចប់ចុងចប់ដើម។

ទស្សនិកជននៅចាំបានថា ពេលមកដល់ Miss Grand International 2021 (MGI) រូបនាងបាននាំមកជាមួយនូវរូបភាពជានារីក្លាហាន ខិតខំពុះពារគ្រប់កាលៈទេសៈ។ ភាពរីករាយ និងថាមពលរបស់នាងបានជំរុញទឹកចិត្ត រហូតក្លាយជាម្ចាស់មកុដលើឆាកអន្តរជាតិ ទទួលបានការចាប់អារម្មណ៍ខ្លាំងពីប្រព័ន្ធផ្សព្វផ្សាយ និងសាធារណជន​ជាហូរ​ហែចាប់ពីពេលនោះមក។

ទោះជាយ៉ាងណាក៏ដោយ នៅមុនពេលក្លាយជារាជិនីឯកប្រចាំកម្មវិធីប្រកួតសម្រស់ MGI នាង Thuy Tien គឺជាក្មេងស្រីដែលមានបទពិសោធន៍ក្នុងការប្រលងសម្រស់ច្រើនមកហើយ​។ នាងគឺជាបេក្ខនារីទីមួយនៅ Miss Southern Vietnam 2017 មុនពេលឡើងដល់ Top 5 និងជាបវរកញ្ញាសប្បុរសធម៌ Miss Vietnam 2018។ ជាមួយគ្នានោះដែរ បវរកញ្ញាក៏តំណាងឲ្យប្រទេសវៀតណាម ក្នុងកម្មវិធី Miss International ឆ្នាំ២០១៨។

មិន​ត្រឹម​តែ​ពឹង​លើ​រូប​សម្រស់​ប៉ុណ្ណោះ​ទេ កត្តា​សំខាន់​ដែល​ជួយ​ឲ្យ Thuy Tien ទទួល​បាន​មកុដ ​នោះ​គឺ​ការ​អប់រំ​ល្អ។ នាងមក​ពី​មហាវិទ្យាល័យ​អក្សរសាស្ត្រ​បារាំង​នៃ​សាកលវិទ្យាល័យ​វិទ្យាសាស្ត្រ​សង្គម និង​មនុស្សសាស្ត្រ ទីក្រុង​ហូជីមិញ ហើយនាពេលកន្លងមក នាងក៏​បាន​បង្ហាញ​ទេពកោសល្យ​ពូកែ​ខាង​ភាសា​បរទេស ដោយអាច​ប្រើ​ភាសា​អង់គ្លេស និង​បារាំង​បាន​យ៉ាង​ស្ទាត់ជំនាញ។ នេះ​ក៏​ជា​អត្ថប្រយោជន៍​ដ៏​ធំ​មួយ​សម្រាប់ Thuy Tien អាចឈោងយកមកុដបានយ៉ាងងាយស្រួល។

ក្រោយ​រង​ពិន័យ និង​ហាម​មិន​ឲ្យ​ចេញ​ពី​ប្រទេស តើ​បវរកញ្ញា Thuy Tien ត្រូវ​ដក​ម្កុដ​ទេ?

ទាក់ទិននឹ​រឿង​ក្តី​ក្តាំ​នៅ​​ក្រុមហ៊ុន​​ស្ករគ្រាប់បន្លែ Kera នៅរសៀលថ្ងៃទី៤ខែមេសា ភ្នាក់ងារនគរបាលស៊ើបអង្កេត ក្រសួងសន្តិសុខសាធារណៈរបស់​វៀតណាម បានចេញ​​ប្រកាស​ចោទប្រកាន់​មនុស្ស​មួយចំនួន​ផ្សេង​ទៀត ចេញ​ដីកាស្វែងរកចាប់ខ្លួន។ ជាមួយគ្នា​នោះ អយ្យការ​​តុលាការ​កំពូល​វៀតណាមក៏មានវិធានការ​ផ្លូវច្បាប់ចំពោះ​មនុស្ស​៥នាក់ដែល​ពាក់ព័ន្ធ​កញ្ញា Thuy Tien ដែរ​។

ចុង​ចោទ​បាន​បង្ហាញ​សញ្ញា​នៃ​ឧក្រិដ្ឋកម្ម​ផលិត​ផលិតផល​អាហារ​ក្លែងក្លាយ និង​បោកប្រាស់​អតិថិជន។ ភ្នាក់ងារ​ប៉ូលិស​ស៊ើបអង្កេត​នៃ​ក្រសួង​សន្តិសុខ​សាធារណៈ​បាន​កំណត់​ថា កញ្ញា Thuy Tien មាន​ជាប់​ពាក់ព័ន្ធ​នឹង​ករណី​នេះ។

ប៉ូលិសខេត្ត Dak Lak ក៏បានសម្រេចផ្អាកជាបណ្តោះអាសន្ន ហាមមិនឲ្យចាកចេញពីប្រទេស ពោលគឺចាប់ពីថ្ងៃទី ១៥ ខែមីនា ដល់ថ្ងៃទី ១៥ ឧសភា ដើម្បី​ងាយស្រួល​ដល់​ការ​ផ្ទៀងផ្ទាត់ និងស៊ើបអង្កេតបន្ថែមដោយសារតែនាងជាប់ពាក់ព័ន្ធក្នុងការផលិតទំនិញក្លែងក្លាយនៅ ក្រុមហ៊ុន Asia Life​។

បន្ទាប់ពីរឿងអាស្រូវ Thuy Tien ទទួលបានការរិះគន់ជាច្រើនពីសហគមន៍អនឡាញ ប្រឈមមុខនឹងហានិភ័យដែលត្រូវសងកិច្ចសន្យាផ្សាយពាណិជ្ជកម្ម។ គម្រោងភាពយន្តដែលគ្រោងនឹងចាក់បញ្ចាំងនៅខែមិថុនាខាងមុខ កំពុងត្រូវបាន​ប៉ះ​ពាល់​យ៉ាងខ្លាំង។

យោងតាមគេហទំព័រ Vietnamnet បានឲ្យដឹងថា ព័ត៌មានអំពីរឿងអាស្រូវរបស់កញ្ញាសម្រស់ប្រចាំទឹកដីវៀតណាម ត្រូវបានបង្ហោះដោយ Sanook ដែលជាគេហទំព័រព័ត៌មានដំបូង និងចំណាស់ជាងគេបំផុតនៅក្នុងប្រទេសថៃ។ ទំព័រហ្វេកប៊ុក និង​បណ្តាញ​​សង្គម​សំខាន់​ៗ​​​​ជាច្រើន​របស់​​​កម្មវិធី​សម្រស់នៅក្នុងប្រទេសនេះក៏បានដកស្រង់ព័ត៌មាននេះផងដែរ ដោយបានទាក់ទាញមតិ​រិះគន់​បែបអវិជ្ជមាន​ជាច្រើនរាប់​មិនអស់​។

ជុំវិញភាពចម្រូងចម្រាសនេះ អ្នកគាំទ្រសម្រស់ថៃ និងអ្នកគាំទ្រ កញ្ញា​ Thuy Tien នៅប្រទេសវៀតណាម កំពុងតែចាប់អារម្មណ៍ និងកំពុងរង់ចាំមើលថា តើតំណែង MGI នឹងត្រូវដកហូតតំណែងដោយប្រធានដែរឬទេ?

បច្ចុប្បន្ន ស្ថាប័ននិងលោក Nawat ផ្ទាល់ មិនទាន់មានចំណាត់ការណាមួយពាក់ព័ន្ធនឹងរឿងអាស្រូវរបស់កញ្ញា Thuy Tien នូវឡើយទេ។ ប៉ុន្តែនៅក្នុងការបង្ហោះថ្មីៗ ក្នុងកម្មវិធីកាលពីដើមខែមីនា លោកបែរជាអបអរសាទរនាង ដែលបានក្លាយជាជាទូតសឆន្ទៈនៃម៉ាកយីហោពិភពលោក Dior ទៅវិញ។ ស្ថិតនៅក្នុងស្ថានភាពស្រពិចស្រពិលរឿងដក​ដ​ម្កុដ​ នៅក្នុងការ​ផ្សាយ​ផ្ទាល់កាលពី​ថ្មីៗ​នេះ មេ MGI បាន​ឆ្លើយ​យ៉ាង​ខ្លី​ថា៖ «កុងត្រា​របស់​នាង​ជាមួយ​ពួក​យើង​បាន​ផុត​កំណត់​កាល​ពី​២​ឆ្នាំ​មុន»៕

អត្ថបទ៖ សាង ស្រីល័ក្ខ

ចុចអាន៖​​ក្រោយ​គ្រង​មកុដ​​​ MGI ត្រឹម៤ឆ្នាំ កញ្ញាឯក​វៀត​ណាម​​ ​Thuy Tien ​​មានរឿង​អាស្រូវ​ផ្លូវច្បាប់​ផ្ទួនៗ​