អ្នករៀបចំសង្ក្រាន្តវិទ្យាល័យបរសេដ្ឋ ចេញមុខសុំទោសតារាចម្រៀងម្នាក់ រឿងដេញឱ្យឈប់ច្រៀងកណ្តាលទី

ទស្សនិកជននិងអ្នកគាំទ្រមានការចាប់អារម្មណ៍ បន្ទាប់ពីមានការចែករំលែកពាក់ព័ន្ធនឹងរឿងហួសចិត្តមួយ រវាងតារាចម្រៀងប្រុសលោក Ah Por ដែលគេស្គាល់ឈ្មោះក្នុងសិល្ប: Taa Zvet គឺត្រូវលោកគ្រូសាលាម្នាក់បានប្រកាសឱ្យឈប់ច្រៀងទាំងកណ្តាលទី នៅក្នុងកម្មវិធីសង្ក្រាន្តនៅ វិទ្យាល័យសម្តេចឪ សម្តេចម៉ែ បរសេដ្ឋ ។

ទោះបីជាយ៉ាងណាបន្ទាប់ពីមានការចែករំលែក និងរិះគន់ពីសំណាក់មហាជនជុំវិញការមិនឱ្យតម្លៃសិល្បកររូបនេះ ទីបំផុតគេបានឃើញសមាជិកគណៈកម្មការរៀបចំកម្មវិធីលោកគ្រូ សៀង សន បានចេញមកបង្ហោះសារសុំទោសជំនួសដល់សិល្បកររូបនេះផងដែរ។

នៅលើគណនីហ្វេសប៊ុកលោកគ្រូ សៀង សន បានរៀបរាប់ខ្លឹមសារថា ក្នុងនាមខ្ញុំជាសមាជិកគណៈកម្មការរៀបចំកម្មវិធីសង្ក្រាន្ត និងជាអ្នកអញ្ជើញតារាចម្រៀងកិត្តិយស និងអតីតសិស្ស ដើម្បីមកចូលរួមសម្ដែងនិងផ្សព្វផ្សាយពីវឌ្ឍនភាពរបស់សាលា ពិតជាសោកស្ដាយនិងសុំអភ័យទោសពីប្អូនប្រុស Taa Zvet និងក្រុមការងាររបស់ប្អូនចំពោះរឿងដែលបានកើតឡើងជាយថាហេតុ នៅពេលដែលប្អូនកំពុងតែសម្ដែង ដែលធ្វើឱ្យប៉ះពាល់យ៉ាងធ្ងន់ដល់កិត្តិយសរបស់ប្អូន។

លោកគ្រូ សៀង សន បានបញ្ជាក់បន្ថែមថា លោកសុំការយោគយល់ និងអធ្យាស្រ័យពីប្អូនចំពោះរឿងដែលបានកើតឡើងនេះ។ សូមប្អូនទទួលយកនូវការរាប់អានដោយស្មោះ។

ដោយឡែកភ្លាមៗបន្ទាប់ពីកើតរឿងរ៉ាវនេះឡើងសាមុីខ្លួនលោក Ah Por ក៏បានចេញមកបង្ហោះសាររៀបរាប់ថា “អរគុណ លោកគ្រូនាយកសាលា និង អ្នករៀបចំកម្មវិធី ក៏ដូចជាមានប្អូនៗ ដែលស្រលាញ់ និងជាហ្វេនខ្ញុំបាទទទួលយ៉ាងកក់ក្ដៅ។ បញ្ជាក់: ​រឿងកើតជារឿងបុគ្គលតែម្នាក់អសីលធម៌បង្កឱ្យខូចកិត្តិយស និងជាក្ដីអាម៉ាស់ដល់ខ្ញុំបាទ វិ.ប.ស /សូមអរគុណ!” ៕ អត្ថបទ៖ ចាន់រ៉ា