ជីវិតកម្សាន្ដ

តារាសម្តែងចិន លោក Huang Zitao ងាកមកចាប់អារម្មណ៍រកស៊ីផលិតសំឡីអនាម័យស្រី

បានផុស

២ ម៉ោង មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

តារាសម្ដែងចិន និងជាអតីតសមាជិកក្រុមចម្រៀងកូរ៉េ Exo លោក Huang Zitao បានបង្ហោះសារលើបណ្ដាញសង្គមផ្ទាល់ខ្លួនដោយគ្រោងជះលុយបណ្តាក់ទុនផលិតសំឡីអនាម័យស្ត្រីដែលមានគុណភាពខ្ពស់ ដើម្បីដាក់លក់លើទីផ្សារ ដោយដឹងថា មានស្ត្រីៗអ្នកប្រើប្រាស់ជាច្រើន បានរអ៊ូរទាំអំពីផលិតផលសំឡីអនាម័យគ្មានគុណភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងរយៈពេលប៉ុន្មានថ្ងៃថ្មីៗនេះ ព័ត៌មាននៅក្នុងប្រទេសចិនបានផ្ទុះជុំវិញនៃការផ្សព្វផ្សាយអំពីសំឡីអនាម័យ ខោទឹកនោមទារក និងកន្ទបទារក ដែលមិនមានគុណភាព បានរីករាលដាលនៅលើបណ្តាញសង្គមចិនយ៉ាងព្រោងព្រាត។ ជាងនេះទៅទៀត គេដឹងថា ក្រុមហ៊ុនផលិតសំឡីអនាម័យនោះជាច្រើនបានប្រើប្រាស់ក្រដាសកខ្វក់ និងកប្បាសដែលមិនមានអនាម័យសម្រាប់ការផលិតលក់នៅលើទីផ្សារ។

ទោះជាយ៉ាងណាក៏ដោយ ដោយមានការខកចិត្តចំពោះបញ្ហាដ៏ធំសម្រាប់មនុស្សស្រី តារាចម្រៀងដ៏ល្បីល្បាញប្រចាំប្រទេសចិនរូបនេះ បាននិយាយថា លោកនឹងដាក់គោលដៅថ្មីទៅក្នុងទីផ្សារ ដើម្បីផលិតនូវផលិតផលអនាម័យល្អបំផុតសម្រាប់មនុស្សស្រី។

តួឯកប្រុសក្នុងរឿង «The Negotiator» បានបង្ហើបថា ចាប់តាំងពីចុងឆ្នាំ២០២៤មក លោកបានចាប់ផ្តើមរៀបចំបង្កើតរោងចក្រផលិតសំឡីអនាម័យ ដោយមានគោលដៅធានាគុណភាព និងសុវត្ថិភាពផលិតផល តាមរយៈខ្សែសង្វាក់ផលិតកម្មដែលត្រួតពិនិត្យជារៀងរាល់ថ្ងៃ។ ជាពិសេស លោកស្នើសុំឲ្យសាធារណជនតាមដានគ្រប់ជំហាន ចាប់ពីប្រភពវត្ថុធាតុដើម រហូតដល់ការវេចខ្ចប់យ៉ាងមានគុណភាពនៅក្នុងក្រុមហ៊ុន ដើម្បីជាការធានាគុណភាពដូចដែលលោកលើកឡើងនាពេលកន្លងមក។

ជាមួយគ្នានោះ ដើម្បីធានាបាននូវភាពជឿជាក់ Huang Zitao បានឲ្យភរិយាវ័យក្មេងរបស់លោកគឺ នាង Xu yiyang ដែលជាអតីតសិក្ខាកាមនៅផលិតកម្ម SM Entertainment ព្រមទាំងបុគ្គលិកស្រីៗនៅក្នុងក្រុមហ៊ុនប្រើប្រាស់ផលិតផលនេះជាការពិសោធន៍រយៈពេល៩០ថ្ងៃឯណោះ មុនចេញលក់លើទីផ្សារ។

លោក Huang Zitao បាននិយាយថា៖«ខ្ញុំបានចាប់ផ្តើមទាក់ទងអ្នកផ្គត់ផ្គង់សំឡីអនាម័យជាច្រើនខែមុន។ ខ្ញុំមិនអាចធានាថាផលិតផលនឹងល្អឥតខ្ចោះនោះទេ ប៉ុន្តែខ្ញុំអាចធានាអ្នកប្រើប្រាស់ថា សំឡីអនាម័យដែលខ្ញុំផលិតគឺស្អាត និងមានសុវត្ថិភាពទាំងស្រុងចំពោះស្រ្តី»។

Huang Zitao កើតក្នុងឆ្នាំ ១៩៩៣ ធ្លាប់ជាសមាជិកនៃក្រុមដ៏ល្បីល្បាញ EXO ។ ប៉ុន្តែនៅឆ្នាំ ២០១៥ តារាប្រុសដែលមានជំនាញរ៉េបយ៉ាងស្ទាត់ជំនាញស្រាប់តែចាកចេញពីក្រុម ហើយត្រលប់ទៅប្រទេសកំណើត ដើម្បីបន្តសកម្មភាពក្នុងនាមជាសិល្បៈទោល។ នៅទីនោះ លោកបានចេញអាល់ប៊ុមចម្រៀងជាច្រើន ហើយលេចមុខក្នុងរឿងភាគទូរទស្សន៍ល្បីៗដូចជា «The Negotiator និង The Brightest Star in the Sky» ជាដើម។

កើតក្នុងគ្រួសារអ្នកមានទ្រព្យធន និងបានទទួលមរតកទាំងអស់ពីឪពុកដែលជាស្ថាបនិកក្រុមហ៊ុនកម្សាន្ត L. Tao Entertainment ដូច្នេះមិនមែនជារឿងចម្លែកនោះទេសម្រាប់ Huang Zitao ដែលហ៊ានបណ្ដាក់ទុនលើផលិតផលល្បីៗដាក់លក់លើទីផ្សារបែបនេះ។ ទស្សនិកជនជាច្រើនសុទ្ធតែដឹងហើយថា ឪពុករបស់តារាប្រុសមានទ្រព្យសម្បត្តិរហូតដល់ទៅ ៣ ពាន់លានដុល្លារ មានដី ៤ ទៅ ៥ ឡូត៍ធំៗនៅក្នុងទៅក្រុង Qingdao ក្រោយមកនៅឆ្នាំ១៩៩៧ លោក Huang Zhongdong ជាប់ចំណាត់ថ្នាក់ទី ៧ ក្នុងបញ្ជីអ្នកមានបំផុតនៅក្នុងប្រទេសចិន៕