ជីវិតកម្សាន្ដ

កម្មវិធីទូរទស្សន៍ចិនរងការរិះគន់ខ្លាំង ដែលតម្រូវឲ្យជនរងគ្រោះក្នុងការចាប់ជំរិតនៅមីយ៉ាន់ម៉ា ដើរតួធ្វើត្រាប់

បានផុស

៤៩ វិនាទី មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

តារាសម្ដែងចិន លោក Wang Xing ដែលត្រូវជួយសង្គ្រោះកាលពីខែមករា បន្ទាប់ពីរងគ្រោះដោយសារការចាប់ជំរិតពីទឹកដីថៃធ្លាយទៅដល់ប្រទេសមីយ៉ាន់ម៉ា បានក្លាយជាចាប់អារម្មណ៍ម្តងទៀតពីសំណាក់មហាជន នៅពេលដែលកម្មវិធីមួយរបស់ប្រទេសចិន ស្នើសុំឲ្យលោកធ្វើសកម្មភាពត្រាប់តាម របស់ភាពយន្ត «No More Bets»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធី Memories Beyond Horizon ដែលផលិតដោយទូរទស្សន៍ Zhejiang របស់ប្រទេសចិន មានគោលបំណងបង្ហាញពីទេពកោសល្យសម្តែងដែលកំពុងលេចធ្លោ។ វគ្គទីមួយនៃរដូវកាលទី៣របស់ខ្លួន បានចាក់ផ្សាយនៅថ្ងៃទី ៥ខែមេសា។

ទោះបីយ៉ាងណា នៅក្នុងវីដេអូឃ្លីបនៃវគ្គមួយបានបង្ហាញឲ្យឃើញសកម្មភាពរបស់តួប្រុសនៅក្នុងរឿង «Ip Man វគ្គ៣» ឈរតែម្នាក់ឯងនៅលើឆាក សម្តែងឈុតមួយពីខ្សែភាពយន្តចិន ឆ្នាំ២០២៣ ក្រោមចំណងជើង «No More Bets» ដែលរៀបរាប់ពីស្ថានភាពរបស់បុរសជនជាតិចិនម្នាក់ ត្រូវគេជួញដូរនៅបរទេសសម្រាប់ការលួចបន្លំតាមអ៊ីនធឺណិត (Call Center)។

លោក Wang Xing បានសម្ដែងក្នុងឈុតមួយដែលត្រូវគេចាប់ជំរិត ក៏ប៉ុន្តែតួអង្គប្រុសត្រូវក្រុមចាប់ជំរិតអនុញ្ញាតឲ្យហៅទូរស័ព្ទទៅមិត្តស្រីក្រោមលក្ខខណ្ឌដ៏អាក្រក់ថា «គាត់អាចត្រូវបានគេសម្លាប់នៅពេលណាក៏បាន» ជាពិសេស នៅក្នុងអំឡុងពេលហៅវីដេអូ បានសុំឲ្យនាងបង្ហាញឆ្មាពីរក្បាល និងឲ្យនាងមើលថែពួកគេ។ ជម្នះដោយអារម្មណ៍ តារាប្រុសស្រក់ទឹកភ្នែក រាងកាយរបស់គាត់ឡើងញ័រ ហើយដៃរបស់គាត់ក្តោបក្បាលនិងបន្តយំ សូម្បីតែបន្ទាប់ពីការហៅទូរសព្ទបានបញ្ចប់ក្ដី។

ថ្វីដ្បិតតែជាការសម្តែង តារាប្រុសហាក់ដូចជាបង្ហាញអំពីជីវិតរបស់គាត់ កំឡុងពេលចាប់ពង្រត់នៅក្នុងប្រទេសមីយ៉ាន់ម៉ា ដែលធ្វើឲ្យទស្សនិកពិបាកប៉ានស្មានថា នេះជាការសម្ដែង ឬមួយជាជីវិតពិត។ មិនតែប៉ុណ្ណោះ Wang Xing ធ្លាប់ជាជនរងគ្រោះពិតប្រាកដនៃការចាប់ជំរិត នៅតាមបណ្ដោយព្រំដែនថៃ-មីយ៉ាន់ម៉ា កាលពី៣ខែមុន។

ដោយឡែក ងាកមកកាន់កម្មវិធីឯណោះវិញ បន្ទាប់ពីការចាក់ផ្សាយនៃវគ្គនេះ ទូរទស្សន៍ Zhejiang បានប្រឈមមុខនឹងការរិះគន់ពីអ្នកសង្កេតការណ៍អនឡាញរបស់ចិន ដែលបានរិះគន់ចំពោះការកេងប្រវ័ញ្ចលើតារាសម្ដែង Wang Xing ព្រមទាំងធ្វើឲ្យគាត់កាន់តែមានរបួសស្នាមបន្ថែមទៀត បើទោះបីជារឿងរ៉ាវអាក្រក់មួយនេះបានកន្លងមកផុតទៅយូរក៏ពិតមែន។

លើសពីនេះទៀតដែរ មតិមួយបានសរសេរថា គាត់ច្បាស់ជាមិនសម្តែងទេ ប៉ុន្តែបង្ហាញពីរបួសធ្ងន់ធ្ងរដែលគាត់នៅតែស៊ូទ្រាំ។ នេះជាក្រុមផលិតដ៏ឃោរឃៅ និងអមនុស្សធម៌បំផុត។ អ្នកសង្កេតការណ៍ម្នាក់ទៀតបានកត់សម្គាល់ថា អ្វីដែលទូរទស្សន៍កំពុងធ្វើ គឺអាក្រក់ជាងអ្នកបោកប្រាស់ដែលបានចាប់ពង្រត់ Wang Xing ទៅទៀត ។

**តារាសម្ដែងចិន Wang Xingកំឡុងពេលជួួសង្រ្គោះពីប៉ូលិសថៃ**

ទោះបីជាយ៉ាងណាក៏ដោយ នេះមិនមែនជារឿងចម្រូងចម្រាសដំបូងឡើយ សម្រាប់ទូរទស្សន៍ Zhejiang ដោយកាលក្នុងឆ្នាំ២០១៩ តារាម៉ូដែល និងជាតារាសម្តែងជនជាតិតៃវ៉ាន់-កាណាដា Godfrey Gao បានស្លាប់ដោយសារគាំងបេះដូងភ្លាមៗ បន្ទាប់ពីមានការរន្ធត់ខ្លាំងពេកក្នុងការថតរឿង «Chase Me» របស់ខ្លួន។ ក្រុមផលិតកម្មបានប្រឈមនឹងមតិពីមហាជន និងការពិនិត្យអំពីលិទ្ធភាពដែលពួកគេរបង្កគ្រោះថ្នាក់ដល់ភ្ញៀវកិត្តិយស៕