WHO៖ វិបត្តិកូវីដ នៅសល់ផ្លូវវែងឆ្ងាយទៀតទម្រាំដល់ទីបញ្ចប់

ប្រមុខអង្គការសុខភាពពិភពលោកបាននិយាយថា ភាពច្របូកច្របល់និងភាពមិនពេញចិត្តក្នុងការដោះស្រាយជំងឹកូវីដ-១៩ មានន័យថា រោគរាតត្បាតនេះនៅសល់ផ្លូវវែងឆ្ងាយទៀតទម្រាំដល់ទីបញ្ចប់ ប៉ុន្តែវាអាចគ្រប់គ្រងបានក្នុងរយៈពេលប៉ុន្មានខែខាងមុខបើមានវិធានការសុខភាពសាធារណៈសមស្រប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Tedros Adhanom Ghebreyesus អគ្គនាយក WHO បានប្រាប់សន្និសីទសារព័ត៌មានមួយកាលពីថ្ងៃចន្ទថា “យើងក៏ចង់ឃើញសង្គមនិងសេដ្ឋកិច្ច បើកឡើងវិញនិងការធ្វើដំណើរនិងពាណិជ្ជកម្មឡើងវិញផងដែរ”។

“ប៉ុន្តែឥឡូវនេះ ផ្នែកសង្គ្រោះបន្ទាន់នៅក្នុងប្រទេសជាច្រើន កំពុងទប់លែងឈ្នះហើយប្រជាជនកំពុងតែស្លាប់ ប៉ុន្តែវាអាចចៀសវាងបាន។

ជំងឺរាតត្បាតកូវីដ-១៩ នៅសល់ផ្លូវវែងឆ្ងាយទៀត។ ប៉ុន្តែយើងមានហេតុផលជាច្រើនសម្រាប់សុទិដ្ឋិនិយម។ ការធ្លាក់ចុះនៃករណីនិងការស្លាប់ ក្នុងអំឡុងពេលពីរខែដំបូងនៃឆ្នាំនេះបានបង្ហាញថា វីរុសនេះនិងការបំប្លែងខ្លួនរបស់វា អាចបញ្ឈប់បាន។

លោក Tedros និយាយថា នៅក្នុងប្រទេសមួយចំនួន បើទោះបីជាមានការចម្លងជាបន្តក៏ដោយ ភោជនីយដ្ឋាននិងក្លិបរាត្រីគឺពោរពេញទៅដោយមនុស្ស ហើយផ្សារបានបើកចំហទាំងមានមនុស្សច្រើនដែលគ្មានការប្រុងប្រយ័ត្ន។

លោកបន្តថា “មនុស្សមួយចំនួនហាក់ដូចជាកំពុងប្រើវិធីសាស្រ្តថា​ ព្រោះពួកគេនៅក្មេង ដូចនេះ វាមិនមានបញ្ហាទេប្រសិនបើពួកគេឆ្លងកូវីដនោះ”។

គួរបញ្ជាក់ថា ឥណ្ឌាបានវ៉ា ប្រេស៊ីល ក្លាយជាប្រទេសដែលមានចំនួនអ្នកឆ្លងសរុបខ្ពស់បំផុតលំដាប់ទី២នៅលើពិភពលោកបន្ទាប់ពីសហរដ្ឋអាមេរិកកាលពីម្សិលមិញនេះ៕

ប្រែសម្រួលដោយ៖ Vann Vann

ប្រភព៖ Aljazeera

ចុចអាន៖ តំណាង WHO៖ កម្ពុជា​កំពុងឈរ​លើ​​មាត់​ជ្រោះ ​សោកនាដកម្ម មេរោគរាតត្បាតកូវីដ១៩