ព័ត៌មានអន្ដរជាតិ

ទីបំផុត ទាហានមីយ៉ាន់ម៉ាផ្ទុះអាវុធជាមួយក្រុមឧទ្ទាមភាគតិចស្លាប់ច្រើននាក់

បានផុស

៤ years មុន

នៅ

ថ្ងៃអង្គារ ១៣ មេសា ២០២១

ដោយ

ការបាញ់គ្នារវាងក្រុមប្រដាប់អាវុធជនជាតិភាគតិចជាច្រើនក្រុម និងរបបយោធាមីយ៉ាន់ម៉ាបានកើតឡើងនៅទីតាំងផ្សេងៗគ្នាជាច្រើននៅភាគខាងជើង និងឥសាន្តប្រទេសកាលពីថ្ងៃចន្ទ។

ជាលទ្ធផលនៃការផ្ទុះអាវុធនេះបណ្តាលឲ្យស្លាប់ និងរបួសយោធាជាច្រើន ក្នុងនោះមេបញ្ជាការកងវរសេនាតូចម្នាក់ម្នាក់របស់របបយោធាក៏បានស្លាប់ ហើយក៏មានចាប់ខ្លួនទាហានមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប៉ះទង្គិចគ្នាខ្លាំងរវាងកងទ័ពឯករាជ្យ Kachin (KIA) និងរបបយោធាមីយ៉ាន់ម៉ាបានកើតឡើងនៅតំបន់ Dokphoneyan ទីប្រជុំជន Momauk របស់រដ្ឋ Kachin។ ភាពតានតឹងបានកំពុងកើនឡើង ចាប់តាំងពីកងទ័ពឯករាជ្យ KIA បានកាន់កាប់មូលដ្ឋានទ័ព Alaw Bum កាលពីថ្ងៃទី២៥ខែមីនា ជិតព្រំដែនចិន ដែលកាលពីមុនគ្រប់គ្រងដោយរបបយោធាមីយ៉ាន់ម៉ា។

មន្ត្រីព័ត៌មាន KIA លោកវរសេនីយ៍ទោ Naw Bu បានប្រាប់សារព័ត៌មានក្នុងស្រុកបាននិយាយថា យោធាមីយ៉ាន់ម៉ាបានបើកការវាយប្រហារតាមផ្លូវអាកាសជាច្រើនលើកក្នុងរយៈពេល៤ថ្ងៃកន្លងទៅនេះដើម្បីព្យាយាមដណ្តើមយកមូលដ្ឋានទ័ពពី KIA មកកាន់កាប់វិញ។

លោក Naw Bu ថា ៖«របបយោធាមីយ៉ាន់ម៉ាបានពង្រឹងកម្លាំងទាហានរបស់ពួកគេបន្ថែម ហើយការប៉ះទង្គិចអាចនឹងកើតមានទៀតថ្ងៃនេះ (អង្គារ ទី១៣ មេសា)»។

មន្ត្រីរបស់ KIA ម្នាក់នៅមូលដ្ឋានបាននិយាយថា ទាហានជាច្រើន ក្នុងនោះមានទាំងមេបញ្ជាការកងវរសេនាតូចថ្មើរជើង Battalion No. 387 របស់យោធាមីយ៉ាន់ម៉ាម្នាក់ត្រូវបាន KIA សម្លាប់កំឡុងការប្រយុទ្ធកាលពីថ្ងៃចន្ទ។ លោកថា កងទ័ព KIA ក៏បានចាប់ខ្លួនទាហានមីយ៉ាន់ម៉ា៨នាក់។

អ្នកស្រុកម្នាក់បាននិយាយថា គ្រាប់បែក៦គ្រាប់ត្រូវបានទម្លាក់នៅលើទឹកដីដែលជាអធិបតេយ្យភាពរបស់ចិនកំឡុងពេលការវាយប្រហារតាមផ្លូវអាកាស។ នៅលើទឹកដីរបស់ចិននោះគ្មាននរណាម្នាក់របួសទេ ខណៈគ្រាប់បែកធ្លាក់លើដីស្រែ។

នៅតំបន់ Momauk ក៏មានការប្រយុទ្ធគ្នា បន្ទាប់ពី KIA បានកាន់កាប់ប៉ុស្តិ៍ប៉ូលិសពីរកន្លែង និងមូលដ្ឋានទ័ពមួយកន្លែងនៅ Tarpein Bridge។ ជនស៊ីវិល៣នាក់ត្រូវបានសម្លាប់នៅក្នុងការប្រយុទ្ធគ្នានោះ បន្ទាប់ពីទាហានបានបាញ់គ្រាប់ផ្លោងទៅលើភូមិ។

បន្ទាប់ពី KIA បានបដិសេធទទួលស្គាល់របបយោធា ការបាញ់គ្នាត្រូវបានគេរាយការណណ៍ថា បានកើតមានឡើងនៅរដ្ឋ Kachin និងភាគឥសាន្តរដ្ឋ Shan ចាប់តាំងពីថ្ងៃទី១១ ខែមីនា។ កងទ័ព KIA បានវាយប្រហារលើទីបញ្ជាការយោធា និងប៉ូលិសមីយ៉ាន់ម៉ា ព្រមទាំងគំរាមបង្កើតការវាយប្រហារថែមទៀត ប្រសិនបើរបបយោធាមីយ៉ាន់ម៉ានៅតែបន្តបាញ់សម្លាប់អ្នកតវ៉ាទូទាំងប្រទេស។

នៅយប់ថ្ងៃចន្ទ មានសេចក្តីរាយការណ៍ថា ការប្រយុទ្ធគ្នាបានកើតមានឡើងរវាងរបបយោធាមីយ៉ាន់ម៉ា និងកងទ័ពរំដោះជាតិ Ta’ang (TNLA) នៅតំបន់សំបូរត្បូង Mogoke ក្នុងទីក្រុង Mandalay ប្រទេសមីយ៉ាន់ម៉ា។

អ្នកភូមិ Mogoke ម្នាក់បាននិយាយថា ៖«យើងបានឮសំឡេងផ្ទុះអាវុធធុនធំចាប់ពីម៉ោង៧កន្លះយប់រហូតដល់ម៉ោង១០កន្លងយប់។ យើងឮសំឡេងបាញ់អាវុធច្រើនណាស់។ នៅព្រឹកថ្ងៃអង្គារ៍នេះ យើងបានឃើញ ទាហានបានពង្រឹងកម្លាំងទ័ពនៅតំបន់នោះបន្ថែម»។ ប៉ុន្តែមិនមានព័ត៌មានពីការស្លាប់ ឬរបួសឡើយ៕

ប្រែសម្រួល៖ វីរបុត្រ
ប្រភព៖ irrawaddy