ឥណ្ឌា ដែលហក់មកលំដាប់ទី ២ លើលោកវិញ ថ្ងៃនេះរកឃើញអ្នកឆ្លងកូវីដថ្មីជាង ២៣៤,០០០ ករណី

យោងតាមតួលេខរបស់ក្រសួងសុខាភិបាលឥណ្ឌានៅថ្ងៃសៅរ៍នេះបានឲ្យដឹងថា ប្រទេសឥណ្ឌាបានកត់ត្រានូវករណីឆ្លងថ្មីប្រចាំថ្ងៃនៃជំងឺកូវីដ ១៩ ខ្ពស់បំផុតថ្មីមួយទៀតជាង ២៣៤,០០០ ករណី ។

តួលេខបង្ហាញថា អ្នកឆ្លងថ្មីចំនួន ២៣៤,៦៩២ ករណីដែលត្រូវបានកត់ត្រា ជំរុញឲ្យប្រទេសនេះមានចំនួនអ្នកឆ្លងសរុប ១៤.៥ លាននាក់ ខណៈក៏មានអ្នកស្លាប់ថ្មីចំនួន ១,៣៤១ នាក់ផងដែរ ដែលធ្វើឲ្យចំនួនអ្នកស្លាប់ឡើងដល់ ១៧៥,៦៤៩ នាក់ ។

បន្ទាប់ពីករណីឆ្លងប្រចាំថ្ងៃរបស់ប្រទេសឥណ្ឌាបានកើនឡើងដល់ ១០០,០០០ នាក់ជាលើកដំបូងនៅដើមខែនេះ ចាប់តាំងពីជំងឺរាតត្បាតបានផ្ទុះឡើងកាលពីឆ្នាំមុន បច្ចុប្បន្នប្រទេសនេះបានកត់ត្រាករណីឆ្លងជាង ២០០,០០០ នាក់ជារៀងរាល់ថ្ងៃ ចាប់តាំងពីថ្ងៃព្រហស្បតិ៍ មក ។

ទន្ទឹមនោះគ្រាន់តែ ទីក្រុងញូដេលី តែឯងបានកត់ត្រាករណីឆ្លងជិត ២០,០០០ ករណីទៅហើយក្នុងរយៈពេល ២៤ ម៉ោងកន្លងមកនេះ ។

ដោយមើលឃើញបែបនេះ ប្រទេសឥណ្ឌាក៏បានជំរុញឲ្យទីក្រុងជាច្រើនផ្សេងទៀតប្រកាសពីការបិទខ្ទប់ទីក្រុងនៅចុងសប្តាហ៍នេះ ដើម្បីការពារការរីករាលដាលបន្ថែមទៀត ។

បន្ថែមពីនេះក្រុមអ្នកជំនាញនិយាយថា មនុស្សដែលមិនប្រកាន់ខ្ជាប់នូវពិធីសារការពារវីរុសបានបង្កឲ្យមានការកើនឡើងមួយទៀត ស្របពេលនឹងការប្រមូលផ្តុំគ្នាផ្នែកនយោបាយដ៏ធំមួយក្នុងពេលបោះឆ្នោតសភាដែលកំពុងបន្តកើតមានបន្ថែមលើបញ្ហានេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ធ្ងន់ធ្ងរហើយ! អង់គ្លេសរកឃើញ ជំងឺកូវីដ ១៩ បំប្លែងខ្លួនថ្មី និងកាចសាហាវមួយប្រភេទទៀតមកពី ឥណ្ឌា

ចុចអាន ៖ ធ្ងន់​ធ្ងរ​ខ្លាំង ឥណ្ឌា​កំពុង​​ខ្វះ​ទី​បញ្ចុះ​សព​ ខណៈ​គ្រែ ​១ ​ដាក់​អ្នក​ជំងឺ​កូវីដ​-​១៩​ ពីរ​នាក់ក៏​មាន​