ឥណ្ឌា ប្រកាស ព្យួរ.ក អ្នកណាហ៊ានបង្កឧបសគ្គ ដល់ការផ្គត់ផ្គង់អុកស៊ីសែនទៅមន្ទីរពេទ្យ

តុលាការជាន់ខ្ពស់ក្នុងទីក្រុង New Delhi ដែលជាទីក្រុងមានប្រជាជនប្រមាណ៣០លាននាក់​ បានចេញសេចក្តីសម្រេចដ៏ម៉ឺងម៉ាត់មួយថា ប្រសិនបើនរណាម្នាក់ត្រូវបានគេរកឃើញថា បង្កជាឧបសគ្គដល់ការផ្គត់ផ្គង់អុកស៊ីសែនទៅមន្ទីរពេទ្យ ពួកគេនឹងត្រូវព្យួរ.ក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខរដ្ឋាភិបាលក្រុង Delhi លោក Arvind Kejriwal បានត្អូញត្អែរថា ការផ្គត់ផ្គង់ចាំបាច់ កំពុងត្រូវបានរាំងស្ទះនៅតាមព្រំដែនរដ្ឋ មុនពេលចូលដល់ទីក្រុង New Delhi ដែលនាំឲ្យពន្យារពេលដល់ការបញ្ជូនទៅមន្ទីរពេទ្យដែលកំពុងជួបប្រទះបញ្ហា។

គ្រូពេទ្យជាច្រើន បានអំពាវនាវសុំជំនួយនៅតាមបណ្តាញសង្គមក្នុងរយៈពេលប៉ុន្មានថ្ងៃនេះ ខណៈដែលកង្វះខាតកាន់តែធ្ងន់ធ្ងរទៅៗ ដោយមន្ទីរពេទ្យ Max Healthcare និង Fortis បានព្រមានក្នុងពេលតែមួយថា ពួកគេអាចអស់ការផ្គត់ផ្គង់ក្នុងរយៈពេលមួយម៉ោង។

ក្រុមហ៊ុន Max ដែលបើកមន្ទីរពេទ្យនៅភាគខាងជើងនិងខាងលិចប្រទេសឥណ្ឌា បាននិយាយនៅលើ Twitter ថា “យើងសោកស្តាយណាស់ដែលបានត្រូវជូនដំណឹងថា យើងសូមផ្អាកការទទួលអ្នកជំងឺថ្មីនៅតាមមន្ទីរពេទ្យទាំងអស់ក្នុងទីក្រុង Delhi រហូតដល់ការផ្គត់ផ្គង់អុកស៊ីសែន មានស្ថិរភាព”។

ទីក្រុង Delhi ត្រូវការអុកស៊ីសែនយ៉ាងហោចណាស់ ៤៨០ មេទ្រីកតោនដើម្បីព្យាបាលអ្នកជំងឺ កូវីដឲ្យមានប្រសិទ្ធិភាព។ កាលពីថ្ងៃសុក្រ រដ្ឋធានីនេះទទួលបានតែ ២៩៧ មេទ្រីកតោនប៉ុណ្ណោះ។

វេជ្ជបណ្ឌិតម្នាក់ បានប្រាប់វិទ្យុប៉ុស្តិ៍លេខ៤ ថា រដ្ឋាភិបាលចាំបាច់ត្រូវធ្វើអ្វីៗគ្រប់យ៉ាងដែលអាចធ្វើទៅបាន ដើម្បីពន្លឿនការផ្គត់ផ្គង់អុកស៊ីសែន និងថ្នាំដល់អ្នកដែលត្រូវការជំនួយ។

កាលពីថ្ងៃចន្ទ ប្រទេសឥណ្ឌា បានបំបែកកំណត់ត្រា៥ថ្ងៃជាប់គ្នា ជាមួយការស្លាប់និងឆ្លងកូវីដខ្ពស់បំផុត។ ប្រទេសនេះបានប្រកាសចំនួនអ្នកឆ្លងថ្មីក្នុងកម្រិតកំណត់ត្រា ៣៥២,៩៩១ករណី និងអ្នកស្លាប់ចំនួន២,៨១២នាក់៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ មេដឹកនាំឥណ្ឌាកំពុងប្រឹងរឿងបោះឆ្នោតកំឡុងកូវីដ-១៩កំពុងធ្វើឲ្យវិនាស