ផ្ទុះកូវីដខ្លាំងក្លានៅឥណ្ឌា រាលដាលដល់អ្នកការទូតអាមេរិក ស្លាប់២នាក់ និងឆ្លងជាង១០០នាក់

ប្រភពជិតស្និទ្ធិបានប្រាប់ CNN ថា ការផ្ទុះឡើងនូវជំងឺកូវីដ-១៩ដ៏ធំក្នុងចំណោមបុគ្គលិកការទូតអាមេរិកនៅក្នុងប្រទេសឥណ្ឌា បានបណ្តាលឲ្យបុគ្គលិកក្នុងស្រុកចំនួន២នាក់ស្លាប់ និងជាង១០០នាក់ ធ្វើតេស្តវិជ្ជមានក្នុងរយៈពេលប៉ុន្មានសប្តាហ៍ថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្រានៃករណីឆ្លងជំងឺកូវីដ-១៩ នៅក្នុងប្រទេសឥណ្ឌា បានឈានដល់កម្រិតខ្ពស់ជាសកលសម្រាប់រយៈពេល៥ថ្ងៃជាប់ៗគ្នា ខណៈមន្ទីរពេទ្យអស់គ្រែ ថ្នាំ ម៉ាស៊ីនជំនួយខ្យល់ដកដង្ហើមនិងខ្យល់អុកស៊ីសែន ហើយមនុស្សរាប់ម៉ឺននាក់បានស្លាប់ ក្នុងរលកទីពីរដ៏អាក្រក់ដែលបានចាប់ផ្តើមកាលពីខែមុន។

ប្រភពនេះ មិនបានផ្តល់ព័ត៌មានលម្អិតទេថាតើបុគ្គលិកបានស្លាប់និងធ្វើតេស្តវិជ្ជមាននៅទីតាំងណា ប៉ុន្តែសហរដ្ឋអាមេរិកបានប្រតិបត្តិការស្ថានកុងស៊ុលចំនួន៥ នៅតាមទីក្រុងផ្សេងៗគ្នានិងស្ថានទូតមួយក្នុងរដ្ឋធានី New Delhi។

ប្រភពមួយបាននិយាយថា បុគ្គលិកអាមេរិក សមាជិកគ្រួសារនិងបុគ្គលិកធ្វើការនៅក្នុងប្រទេសឥណ្ឌា ទើបតែចាប់ផ្តើមទទួលវ៉ាក់សាំងកូវីដកាលពី ២សប្តាហ៍មុនប៉ុណ្ណោះ។ ក្នុងរយៈពេលប្រាំមួយសប្តាហ៍ចុងក្រោយនេះ ទោះបីអត្រាករណីឆ្លងរបស់ប្រទេសឥណ្ឌា កំពុងកើនឡើងហើយបុគ្គលិកមិនទាន់បានទទួលវ៉ាក់សាំងនៅឡើយក៏ដោយ ប៉ុន្តែមានការធ្វើដំណើរកម្រិតខ្ពស់ចំនួនពីរដងដោយមន្រ្តីរដ្ឋបាលរបស់លោក Biden ទៅកាន់ប្រទេសនេះ។

ប្រភពបានប្រាប់ CNN ថា បុគ្គលិកខ្លះមានការអាក់អន់ចិត្ត ដោយសារតែពួកគេមានអារម្មណ៍ថា ពួកគេមិនបានទទួលព័ត៌មានច្បាស់លាស់អំពីពេលវេលា​ ដែលបេសកកម្មការទូតអាមេរិកនឹងទទួលបានវ៉ាក់សាំងទេ ហើយពួកគេមានអារម្មណ៍ថា ពួកគេមិនត្រូវបានផ្តល់អាទិភាពឡើយ ខណៈបុគ្គលិកការទូតជាច្រើននៅអឺរ៉ុបនិងសហរដ្ឋអាមេរិក បានទទួលការចាក់ថ្នាំបង្ការរួចទៅហើយហើយ។

គួរបញ្ជាក់ថា តាម​ទិន្នន័យ​របស់​ក្រសួង​សុខាភិបាលឥណ្ឌា​បាន​បង្ហាញ​ថា រយៈ​ពេល​២៤​ម៉ោង​ចុង​ក្រោយ ប្រទេស​នេះមាន​ករណី​ឆ្លងជំងឺ​កូវីដ-១៩​ថ្មី​សរុប​ចំនួន៣៥២,៩៩១នាក់ ដែល​​ជា​ចំនួន​ខ្ពស់​បំផុត​ប្រចាំ​ថ្ងៃ​ក្នុង​ពិភព​លោក ដោយ​បំបែក​កំណត់​ត្រា​ចាស់​របស់​ខ្លួន​កាល​ពី​ថ្ងៃ​សៅរ៕

ប្រែសម្រួលដោយ៖ Vann Vann

ប្រភព៖ CNN

ចុចអាន៖ អាមេរិក ត្រៀមចែកវ៉ាក់សាំង AstraZeneca ៦០លានដូសដល់ប្រទេសដទៃ