ព័ត៌មានអន្ដរជាតិ

ថៃកំពុងស្វែងរកសិទ្ធិប៉ាតង់ពីជប៉ុនដើម្បីផលិតថ្នាំព្យាបាលកូវីដ-១៩ដោយខ្លួនឯង

បានផុស

៤ years មុន

នៅ

ថ្ងៃព្រហស្បតិ៍ ២៩ មេសា ២០២១

ដោយ

ប្រទេសថៃបានកំពុងពិភាក្សាជាមួយប្រទេសជប៉ុនជុំវិញកម្មសិទ្ធិបញ្ញាសម្រាប់ឱសថ Favipiravir ដែលជាប្រភេទថ្នាំព្យាបាលជំងឺកូវីដ-១៩ ដើម្បីទទួលបានសិទ្ធិផលិតថ្នាំនេះនៅប្រទេសរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរងរបស់រដ្ឋាភិបាលថៃ កញ្ញា Traisuree Taisaranakul បានឲ្យដឹងថា លោកនាយករដ្ឋមន្ត្រីថៃ ប្រាយុទ្ធ ចាន់ អូចា បានកំពុងតាមដានយ៉ាងយកចិត្តទុកដាក់ពីការព្យាបាលអ្នកជំងឺកូវីដ-១៩ ដូច្នេះលោកអាចបញ្ជាទិញយ៉ាងឆាប់រហ័សពាក់ព័ន្ធនឹងសិទ្ធិប៉ាតង់ និងឧបករណ៍ផលិតឱសថ។

រដ្ឋមន្ត្រីក្រសួងសុខាភិបាលថៃលោក Anutin Chanvirakul បានរាយការណ៍ទៅកាន់ទីស្តីការគណៈរដ្ឋមន្ត្រីថា ការបញ្ជាទិញត្រូវបានដាក់ហើយ ដើម្បីទិញថ្នាំ Favipiravir ពីក្រុមហ៊ុនជប៉ុនសម្រាប់ការចែកចាយដល់អ្នកជំងឺនៅមន្ទីរពេទ្យរដ្ឋ និងមន្ទីរពេទ្យឯកជនទូទាំងប្រទេស។

យោងតាមលោក Anutin ថា អង្គការឱសថរដ្ឋាភិបាល (GPO) ត្រូវបានណែនាំឲ្យស្វែងរកសិទ្ធិអនុញ្ញាតពីប្រទេសជប៉ុនដើម្បីផលិតថ្នាំ Favipiravir នៅប្រទេសថៃ។

កញ្ញា Traisuree បានបញ្ជាក់ថា ជាមួយគ្នានេះ មន្ទីរពេទ្យឯកជនក៏អាចនាំចូលថ្នាំនេះផងដែរ។

កញ្ញាបានឲ្យដឹងថា ៖«រដ្ឋមន្ត្រីក្រសួងសុខាភិបាលបានជំរាបទៅគណៈរដ្ឋមន្ត្រីថា GPO កំពុងចាត់ចែងដើម្បីទទួលបានសិទ្ធិប៉ាតង់សម្រាប់ការផលិតថ្នាំ Favipiravir នៅប្រទេសថៃ។ ជាមួយសិទិ្ធប៉ាតង់ ថៃនឹងមានសុវត្ថិភាពជាងមុនពាក់ព័ន្ធនឹងការផ្គត់ផ្គង់ឱសថ»។

អនុប្រធាន GPO លោក Sirikul Matevelungsun បាននិយាយនៅថ្ងៃពុធដា អង្គការបានចាប់ផ្តើមផលិតថ្នាំគ្រាប់ Favipiravir ២០០មីលីក្រាម និងបានសាកល្បងពីប្រសិទ្ធភាពរបស់វាលើអ្នកស្ម័គ្រចិត្តដែលមានសុខភាពល្អ។

កញ្ញាអ្នកនាំពាក្យបន្តឲ្យដឹងថា ដំណើរការនេះនឹងបញ្ចប់នៅខែមិថុនា ឬកក្កដា ជាពេលដែលអង្គការនឹងដាក់ពាក្យស្នើសុំអាជ្ញាប័ណ្ណដើម្បីផលិតឱសថក្នុងស្រុកជាមួយរដ្ឋបាលចំណីអាហារ និងឱសថ (FDA)។

អ្នកនាំពាក្យរដ្ឋាភិបាលបន្ថែមថា ការផលិតឱសថអាចនឹងចាប់ផ្តើមភ្លាមៗ បន្ទាប់ពីចុះបញ្ជីជាមួយ FDA ប្រសិនបើមិនមានបញ្ហាពាក់ព័ន្ធនឹងសិទ្ធិប៉ាតង់ទេនោះ៕

ប្រែសម្រួល៖ វីរបុត្រ
ប្រភព៖ bangkokpost