អ៊ីរ៉ង់នៅតែបន្តរំលោភកិច្ចព្រមព្រៀងនុយក្លេអ៊ែរ ក្រោយស្ដុកសារធាតុអ៊ុយរ៉ានីញ៉ូមលើសកម្រិត

ក្រុមឃ្លាំមើលនុយក្លេអ៊ែររបស់អង្គការសហប្រជាជាតិនិយាយថា អ៊ីរ៉ង់នៅតែបន្តរំលោភកិច្ចព្រមព្រៀងនុយក្លេអ៊ែរឆ្នាំ ២០១៥ របស់ខ្លួនជាមួយមហាអំណាចពិភពលោក ។

ទីភ្នាក់ងារថាមពលបរមាណូអន្តរជាតិ (IAEA) បានបង្ហាញរបាយការណ៍ចុងក្រោយស្តីពីការអភិវឌ្ឍនុយក្លេអ៊ែររបស់អ៊ីរ៉ង់ដល់គណៈអភិបាលរបស់ខ្លួនកាលពីថ្ងៃពុធ ។

របាយការណ៍បាននិយាយថា គិតត្រឹមថ្ងៃទី ២ ខែវិច្ឆិកា ការស្តុកសារធាតុអ៊ុយរ៉ានីញ៉ូមដែលមានបរិមាណទាបរបស់អ៊ីរ៉ង់បានកើនឡើងដែលលើសពី ១២ ដងនៃបរិមាណដែលបានកំណត់ក្រោមកិច្ចព្រមព្រៀង ។

ប្រទេសអ៊ីរ៉ង់និយាយថា ខ្លួនមានគម្រោងផ្លាស់ប្តូរទីតាំងផលិតទៅទីតាំងក្រោមដីនៃរោងចក្រនុយក្លេអ៊ែរនៅជិតទីក្រុង Natanz ភាគកណ្តាលប្រទេសអ៊ីរ៉ង់ ។

ប្រសិនបើអ៊ីរ៉ង់ចាប់ផ្តើមស្តារឡើងវិញនូវសារធាតុអ៊ុយរ៉ាញ៉ូមពេញលេញ វានឹងក្លាយជាការបំពានថែមទៀតនៃកិច្ចព្រមព្រៀងនេះ ។ គណៈអភិបាលនៃ IAEA ត្រូវបានគេរំពឹងថានឹងពិភាក្សាអំពីបញ្ហាទាំងនេះនៅក្នុងកិច្ចប្រជុំមួយដែលនឹងត្រូវធ្វើឡើងនៅទីក្រុង Vienna ប្រទេសអូទ្រីសចាប់ពីថ្ងៃទី ១៩ ខែវិច្ឆិកា ។

ទីក្រុងតេរ៉ង់បានបន្តបង្កើនការចម្រាញ់សារធាតុអ៊ុយរ៉ានីញ៉ូមដោយរំលោភលើកិច្ចព្រមព្រៀង បន្ទាប់ពីសហរដ្ឋអាមេរិកបានដកខ្លួនចេញពីកិច្ចព្រមព្រៀងជាឯកតោភាគីក្នុងឆ្នាំ ២០១៨ ហើយបានបន្តដាក់ទណ្ឌកម្មសេដ្ឋកិច្ចប្រឆាំងនឹងអ៊ីរ៉ង់ ។

ទន្ទឹមនោះក្រុមអ្នកសង្កេតការណ៍ក៏កំពុងរង់ចាំមើលផងដែរថាតើប្រធានាធិបតីជាប់ឆ្នោតអាមេរិកលោក Joe Biden អាចផ្លាស់ប្តូរស្ថានការណ៍ដូចដែលលោកបានសន្យាថា សហរដ្ឋអាមេរិកគួរតែវិលត្រឡប់ទៅរកកិច្ចព្រមព្រៀងនេះវិញឬយ៉ាងណា ៕

ប្រែសម្រួលដោយ ៖ ជីវ័ន្ត

ប្រភព ៖ NHK