ព័ត៌មានអន្ដរជាតិ

ជួបជុំ ជប់លៀងកក្រើកប្រទេសអេស្ប៉ាញដើម្បីអបអរឈប់បំរាមកូវីដ-១៩

បានផុស

៤ years មុន

នៅ

ថ្ងៃចន្ទ ១០ ឧសភា ២០២១

ដោយ

មានការជួបជុំ និងពិធីជប់លៀងតាមដងផ្លូវ ក៏ដូចជាទីតាំងនានាទូទាំងប្រទេសអេស្ប៉ាញដើម្បីអបអរសាទរដល់បំរាមរឹតត្បិតត្រូវបានបញ្ចប់ បន្ទាប់ពីរដ្ឋនានាក្នុងប្រទេសត្រូវបានដាក់អស់រយៈពេលយ៉ាងយូររហូតដល់៦ខែដើម្បីទប់ស្កាត់ការរាតត្បាតកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅមណ្ឌល Puerta del Sol ក្នុងទីកក្រុង Madrid នៅតាមដងផ្លូវជាច្រើនត្រូវបានគេមើលឃើញថា មានការជួបជុំយ៉ាងច្រើនដែលពួកគេមិនពាក់ម៉ាស់ មិនមានគម្លាតសង្គម ហើយបាននាំគ្នារាំ ច្រៀងយ៉ាងសប្បាយរីករាយ។

យុវជន និងមនុស្សវ័យក្មេងបាននាំដើរព្រោងព្រាតពេញតាមទីតំបន់សំខាន់ៗក្នុងទីក្រុង និងឆ្នេរខ្សាច់ទីក្រុង Barcelona ដើម្បីបង្ហាញពីការលំហែអារម្មណ៍ក្រោយពេលជាប់បំរាមយូរ។

បុរសឈ្មោះ Juan Cadavid ដើរជាមួយមិត្តភ្តិបាននិយាយថា ៖«សេរីភាព! វាគួរឲ្យខ្លាចណាស់ ដឹងទេ ដោយសារកូវីដ ប៉ុន្តែខ្ញុំចង់មានអារម្មណ៍បែបនេះជាមួយមនុស្សជាច្រើន»។

អ្នករស់នៅទីក្រុង Barcelona អាយុ២៥ឆ្នាំក៏រីករាយនឹងស្ថានភាពដែលវិលត្រឡប់មកល្អប្រសើរវិញ ហើយរំពឹងបានទៅធ្វើការនៅភោគជនីដ្ឋានលំដាប់ផ្កាយវិញ បន្ទាប់ពីត្រូវបានបិទអស់រយៈពេល៧ខែ។

ភោជនីយដ្ឋានក្នុងស្រុកត្រូវបានបើកឲ្យដំណើរការនៅព្រឹកថ្ងៃអាទិត្យ ហើយអាចស្ថិតនៅទទួលទានរហូតដល់ម៉ោង១១យប់ ប៉ុន្តែក្នុងមួយតុត្រូវមានមនុស្សតែ៤នាក់ប៉ុណ្ណោះ និងការជួបជុំទទួលទានក្នុងបន្ទប់អនុញ្ញាតត្រឹមតែ៣០%ប៉ុណ្ណោះ។

ប៉ូលិសនៅទីក្រុង Madrid បាននិយាយថា ពួកគេបានធ្វើអន្តរាគមន៍ដល់មនុស្សរាប់រយនាក់ ដែលកំពុងសប្បាយរីករាយ ច្រៀងរាំ ដើរហើរ អូអរតាមដងផ្លូវទាំងបំរាមរឹតត្បិតមិនទាន់បញ្ចប់ទាំងស្រុងដែលជំរុញឲ្យលោកអភិបាលក្រុងហៅថាជាទង្វើ«គួរឲ្យស្អប់ខ្ពើម»។

លោកអភិបាលក្រុង José Luis Martínez-Almeida បាននិយាយថា ៖«សេរីភាពមិនពាក់ព័ន្ធនឹងពិធីជប់លៀងនៅតាមដងផ្លូវទេ ពីព្រោះពិធីជប់លៀងផឹកស៊ីតាមដងផ្លូវមិនត្រូវបានអនុញ្ញាតនៅទីក្រុង Madrid ឡើយ»។

«បុគ្គលម្នាក់ៗត្រូវយល់ថា យើងរស់នៅក្នុងសង្គមមួយ»។ លោកបាននិយាយ និងបន្ថែមថា ការបញ្ឈប់បំរាមគោចរមិនមែនមានន័យថា ការរាតត្បាតកូវីដ-១៩ឈប់នោះទេ។

ជាមួយនឹងការបញ្ឈប់ភាពអាសន្ន បំរាមធ្វើដំណើរឆ្លងកាត់តំបន់នានាក្នុងប្រទេសក៏ត្រូវបានលើក ហើយបំរាមជាច្រើនទៀតពាក់ព័ន្ធនឹងការជួបជុំសង្គមក៏ត្រូវបានបញ្ចប់ដែរ។ នៅសល់តែ៤ក្នុងចំណោមតំបន់ និងទីក្រុងស្វ័យតចំនួន១៩របស់ប្រទេសនៅបន្តរក្សាបំរាមគោចរពេលយប់។

ទោះជាមានការរិះគន់ពីថ្នាក់ដឹកនាំតំបន់ និងឥស្សរជនប្រឆាំងមួយចំនួនក៏ដោយ ក៏សម្ព័ន្ធភាពកាន់អំណាចឆ្វេងនិយមរបស់ប្រទេសអេស្ប៉ាញមិនបន្តការដាក់គ្រាអាសន្នទៀតដោយបានចេញគោលការណ៍ស្របច្បាប់ដើម្បីបញ្ចប់ និងបន្ធូរបន្ថយវិធានការកូវីដ-១៩។

លោកនាយករដ្ឋមន្ត្រីអេស្ប៉ាញ Pedro Sánchez បាននិយាយថា បទប្បញ្ញត្តិដែលមានស្រាប់គួរតែគ្រប់គ្រាន់ដើម្បីឆ្លើយតបនឹងការរីករាលដាល់កម្រិតតតំបន់ ខណៈយុទ្ធនាការណ៍ចាក់វ៉ាក់សាំងកំពុងតែបង្កើនល្បឿន។

ករណីឆ្លងកូវីដ-១៩ថ្មីនៅប្រទេសអេស្ប៉ាញក្នុងរយៈពេល១៤ថ្ងៃចុងក្រោយគិតត្រឹមថ្ងៃសុក្រកន្លងទៅមាន ១៩៨នាក់ ក្នុងចំណោមមនុស្ស១០ម៉ឺននាក់ បើទោះជាទីក្រុង Madrid និងតំបន់ Basque នៅតែមានអត្រាឆ្លងខ្ពស់៕