មិនទាន់ចប់ឡើយ! អ៊ីស្រាអែល បន្តវាយប្រហារពាសពេញតំបន់ហ្គាហ្សា និង West Bank ហើយថែមទាំងកម្ទេចផ្លូវរូងក្រោមដីរបស់ក្រុមហាម៉ាស

អំពើហិង្សារវាងអ៊ីស្រាអែល និងប៉ាឡេស្ទីន កំពុងរាលដាលពាសពេញផ្នែកជាច្រើននៃតំបន់ហ្គាហ្សាស្ទ្រីប និង West Bank ដោយមិនមានសញ្ញាបង្ហាញពីបញ្ចប់ឡើយ ។

យោធាអ៊ីស្រាអែលកាលពីថ្ងៃអង្គារ បានធ្វើការវាយប្រហារតាមអាកាសលើផ្លូវរូងក្រោមដី ដែលគេដឹងថាត្រូវបានសាងសង់ ដោយក្រុមសកម្មប្រយុទ្ធហាម៉ាសរបស់ប៉ាឡេស្ទីន ដែលគ្រប់គ្រងតំបន់ហ្គាហ្សាស្ទ្រីប ។

ជាការតបត ក្រុមហាម៉ាសក៏បានធ្វើការវាយប្រហារទៅវិញ ដោយគ្រាប់រ៉ុកកែត និងកាំភ្លើងត្បាល់ ហើយបានសម្លាប់កម្មករថៃ ២ នាក់នៅឯកសិដ្ឋានមួយ ក្នុងប្រទេសអ៊ីស្រាអែល ។

ការប្រយុទ្ធគ្នាដែលកំពុងបន្តនេះ បានធ្វើឲ្យចំនួនអ្នកស្លាប់កើនដល់ ២១៧ នាក់ រួមមានកុមារ ៦៣ នាក់ និងស្ត្រី ៣៦ នាក់នៅតំបន់ហ្គាហ្សា ខណៈមនុស្ស ១២ នាក់ត្រូវបានសម្លាប់ នៅអ៊ីស្រាអែល បន្ទាប់ពីអំពើហិង្សាថ្មីៗនេះបានផ្ទុះឡើងនៅថ្ងៃទី ១០ ឧសភា ។

ចំណែកនៅតំបន់ West Bank និងទីក្រុង East Jerusalem ប្រជាជនបានធ្វើបាតុកម្ម ដើម្បីប្រឆាំងនឹងការវាយប្រហាររបស់អ៊ីស្រាអែល ដោយបិទហាង ក្រុមហ៊ុន និងសាលារៀនទាំងអស់ ។

នៅក្នុងបាតុកម្មនោះ ប្រជាជនប៉ាឡេស្ទីន ក៏បានប៉ះទង្គិចគ្នាជាមួយកងកម្លាំងសន្តិសុខអ៊ីស្រាអែល នៅតាមបណ្តាទីក្រុងរបស់តំបន់ West Bank មួយចំនួនដូចជា ទីក្រុង Bethlehem និងទីក្រុង Ramallah ដែលក៏បណ្តាលឲ្យមានមនុស្សស្លាប់ និងរបួសផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ការវាយប្រហាររបស់ អ៊ីស្រាអែល ស្លាប់ដល់មេក្រុមជីហាដ ខណៈរ៉ុកកែតក្រុមហាម៉ាសច្រើនគ្រាប់ត្រូវស្ទាក់ចាប់ដោយប្រព័ន្ធការពារដែនអាកាស

ចុចអាន ៖ នាយករដ្ឋមន្រ្តីអ៊ីស្រាអែល ថា អាមេរិកកំពុងគាំទ្រប្រទេសខ្លួន ហើយរាល់ការវាយប្រហារគឺមិនឲ្យជនស៊ីវិលគ្រោះថ្នាក់ឡើយ