វ៉ាក់សាំង Sputnik V របស់រុស្ស៊ីមានប្រសិទ្ធភាពជិត ១០០ ភាគរយប្រឆាំងកូវីដបំប្លែងខ្លួនប្រេស៊ីល ក្រោយចាក់ពេញ ២ ដូស

យោងតាមមូលនិធិវិនិយោគផ្ទាល់របស់រុស្ស៊ី (RDIF) និងការសិក្សាដែលធ្វើឡើងដោយ អ្នកស្រាវជ្រាវនៅប្រទេសអាហ្សង់ទីន បានឲ្យដឹងថា វ៉ាក់សាំង Sputnik V មានប្រសិទ្ធិភាពខ្ពស់ ក្នុងការប្រយុទ្ធប្រឆាំង ក៏ដូចជាកម្ចាត់វីរុសកូវីដបំប្លែងខ្លួន ដែលត្រូវបានរកឃើញដំបូងនៅប្រទេសប្រេស៊ីល ។

វីរុសបំប្លែងខ្លួន ដែលគេស្គាល់ថា P1 ដែលជាវីរុសនៅពីក្រោយខ្នង នៃការស្លាប់យ៉ាងច្រើន ដោយសារជំងឺកូវីដ ១៩ ក្នុងប្រទេសប្រេស៊ីល ក៏កំពុងរាលដាលពាសពេញតំបន់អាមេរិកឡាទីន ផងដែរ ។ អ្នកវិទ្យាសាស្ត្រនៅប្រទេសប្រេស៊ីល បានរកឃើញថា ការវិវត្តរបស់វីរុសបំប្លែងខ្លួននេះ អាចធ្វើឲ្យវាកាន់តែមានភាពធន់ទ្រាំទៅនឹងអង់ទីគ័រ ដោយបង្កើនការព្រួយបារម្ភជាអន្តរជាតិ អំពីសក្តានុពលរបស់វាក្នុងការឆ្លើយតបជាមួយវ៉ាក់សាំង ឲ្យមានប្រសិទ្ធភាពតិច ។

ទន្ទឹមនោះ ការសិក្សាដែលមានមូលដ្ឋាននៅអាហ្សង់ទីន ដែលអនុវត្តដោយវិទ្យាស្ថានរោគភាគល្អិត Vanella នៃសាកលវិទ្យាល័យជាតិ Córdoba (UNC) បានរកឃើញការឆ្លើយតបភាពស៊ាំខ្លាំងក្លា ប្រឆាំងនឹងវីរុសបំប្លែងខ្លួន P1 លើអ្នកដែលបានចាក់វ៉ាក់សាំង Sputnik V ។

បន្ថែមពីនេះ RDIF បាននិយាយនៅក្នុងសេចក្តីថ្លែងការណ៍មួយថា “ការស្រាវជ្រាវបានបញ្ជាក់ថា ភាពស៊ាំបានវិវត្តចំពោះមនុស្ស ដែលបានចាក់វ៉ាក់សាំង Sputnik V ហើយអាចកម្ចាត់វីរុសបំប្លែងខ្លួនប្រេស៊ីល បន្ទាប់ពីបានទទួលការចាក់ពេញ ២ ដូស ឬមួយដូសដំបូងក៏ដោយ” ។

យោងតាមការសិក្សារបស់អាហ្សង់ទីន ដែលត្រូវបានមើលដោយ Reuters និងដកស្រង់ដោយ RDIF បានបង្ហាញថា ៨៥.៥ ភាគរយនៃមនុស្សម្នាក់ៗ បានដុះអង់ទីគ័រប្រឆាំងនឹងវីរុសកូវីដបំប្លែងខ្លួន បន្ទាប់ពីចាក់វ៉ាក់សាំងដូសដំបូង រយៈពេល ១៤ ថ្ងៃ ខណៈអត្រានោះបានកើនឡើងដល់ជិត ១០០ ភាគរយ ក្រោយមនុស្សម្នាក់ៗបានទទួលការចាក់ពេញ ២ ដូស រយៈពេល ៤២ ថ្ងៃ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ រុស្ស៊ី សហការជាមួយ ចិន ផលិតវ៉ាក់សាំង Sputnik V ជាង ២៦០ លានដូសសម្រាប់ចាក់ដល់ប្រជាជននៅទូទាំងពិភពលោក

ចុចអាន ៖ លោក Putin អួតថា វ៉ាក់សាំងរុស្ស៊ី អាចទុកចិត្តបានដូចជាកាំភ្លើង AK របស់សូវៀត