ទូកនេសាទខ្នាតតូច ជប៉ុន បុកជាមួយនាវា រុស្ស៊ី ទម្ងន់ ៦៦២ តោន ផ្អើលពេញសមុទ្រ

ទូកនេសាទជប៉ុនមួយគ្រឿង និងនាវារុស្ស៊ីមួយគ្រឿង បានបុកគ្នា ហើយក្រឡាប់នៅឯឆ្នេរសមុទ្រ នៃខេត្តហុកកៃដូភាគខាងជើង របស់ប្រទេសជប៉ុន នៅព្រឹកថ្ងៃពុធនេះ បណ្តាលឲ្យនាវិក ៣ នាក់បានស្លាប់ ។

ឆ្មាំឆ្នេរសមុទ្រជប៉ុននិយាយថា ទូកជប៉ុនទម្ងន់ ៩.៧ តោនឈ្មោះ Daihachi Hokkoumaru បានបុកជាមួយនាវារុស្ស៊ីទម្ងន់ ៦៦២ តោនឈ្មោះ AMUR នៅសមុទ្រ Okhotsk ប្រហែល ២៣ គីឡូម៉ែត្រភាគឦសាននៃកំពង់ផែ Monbetsu នៅម៉ោងប្រហែល ៦ ព្រឹក (ម៉ោងនៅជប៉ុន) ។

ឆ្មាំឆ្នេរសមុទ្រជប៉ុនបន្តថា ទូកនេសាទជប៉ុន មានសមាជិកនាវិក ៥ នាក់ ហើយជាកម្មសិទ្ធិរបស់សហករណ៍ជលផល ដែលមានមូលដ្ឋាននៅកំពង់ផែ Monbetsu របស់កោះហុកកៃដូ កំពុងនេសាទក្ដាម នៅមុនហេតុការណ៍បុកគ្នា ខណៈនាវារុស្ស៊ីមានសមាជិកនាវិក ២៣ នាក់ ។

ឆ្មាំឆ្នេរបញ្ជាក់ថា ក្នុងចំណោមអ្នកស្លាប់ ៣ នាក់នោះម្នាក់ជាប្រធានវិស្វករអាយុ ៦០ ឆ្នាំ និង ២ នាក់ទៀតស្ថិតក្នុងអាយុ ៣០ ឆ្នាំ ។

ទន្ទឹមនោះ យោងតាមអ្នកពន្លត់អគ្គិភ័យក្នុងស្រុក បានឲ្យដឹងថា ក្នុងចំណោមអ្នកដែលនៅរស់ចំនួន ២ នាក់ទៀត ម្នាក់រងរបួសស្រាល និងម្នាក់ទៀតកំពុងសន្លប់ ខណៈនាវិកខាងនាវារុស្ស៊ី មិនមានរបាយការណ៍ពីការស្លាប់ និងរងរបួសឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ The Japan Times

ចុចអាន ៖ ជប៉ុន ត្រៀមប្រើប្រាស់វ៉ាក់សាំង AstraZeneca ហើយនឹងចេញថ្លៃព្យាបាល បើមានករណីដុំកំណកឈាមលើអ្នកចាក់

ចុចអាន ៖ ជប៉ុន ​ហាមចូល​​​អ្នក​ដំណើរ​​ចេញ​ពី​កម្ពុជា​ ថៃ​ និង ​៥ ប្រទេសទៀត