UN ប្រាប់ពិភពលោកឲ្យឈប់ប្រើអាវុធជាតិផ្ទុះវាយប្រហារលើតំបន់ជម្លោះ

មន្ត្រីអង្គការសហប្រជាជាតិ (UN) កាលពីថ្ងៃអង្គារ បានអំពាវនាវឲ្យបញ្ឈប់ការប្រើប្រាស់អាវុធជាតិផ្ទុះ នៅតាមតំបន់ទីក្រុងជម្លោះ និងការវាយប្រហារទៅលើទីតាំងថែទាំវេជ្ជសាស្ត្រ ហើយបានសង្កត់ធ្ងន់ថានេះជាឧក្រិដ្ឋកម្មសង្គ្រាម ។

អគ្គលេខាធិការរងរបស់ UN ទទួលបន្ទុកកិច្ចការមនុស្សធម៌លោក Mark Lowcock បាននិយាយថា នៅពេលអាវុធជាតិផ្ទុះ ត្រូវបានប្រើនៅក្នុងតំបន់ទីក្រុង ក្នុងនោះស្ទើរតែ ៩០ ភាគរយនៃប្រជាជនដែលត្រូវបានសម្លាប់ គឺជាជនស៊ីវិល ។

លោកបានបន្ថែមទៀតថា អាវុធទាំងនេះក៏បង្កការបំផ្លិចបំផ្លាញយ៉ាងធ្ងន់ធ្ងរ ដល់ហេដ្ឋារចនាសម្ព័ន្ធស៊ីវិលចាំបាច់ផងដែរ ហើយលោកអំពាវនាវឲ្យភាគីប្រយុទ្ធ គួរផ្លាស់ប្តូរជម្រើសប្រើប្រាស់អាវុធ និងយុទ្ធសាស្ត្ររបស់ខ្លួន ។

លោក Lowcock បាននិយាយថា បុគ្គលិកពេទ្យ ការដឹកជញ្ជូន និងសម្ភារៈបរិក្ខារនានា នៅតែបន្តរងការវាយប្រហារ ។ គ្រូពេទ្យ និងគិលានុបដ្ឋាយិកា ត្រូវបានគំរាមកំហែង ចាប់ពង្រត់ និងសម្លាប់ ។ គ្រឿងបរិក្ខារ និងប្រព័ន្ធដឹកជញ្ជូនវេជ្ជសាស្ត្រ រួមទាំងរថយន្តសង្គ្រោះ ត្រូវបានបំផ្លាញ និងខូចខាត ខណៈអ្នករងរបួស និងអ្នកជំងឺ ត្រូវបានបដិសេធមិនឲ្យទទួលការថែទាំ និងព្យាបាល ។

ទន្ទឹមនោះ លោក Lowcock ក៏បានអំពាវនាវដល់រដ្ឋនានាធានាថា គោលដៅយោធារបស់ពួកគេ គឺស្ថិតនៅឆ្ងាយពីកន្លែងពេទ្យ ត្រូវមានការប្រុងប្រយ័ត្ន រួមទាំងការចេញការព្រមានជាមុនស្តីពីសកម្មភាពយោធា បដិសេធពីការប្រើប្រាស់មធ្យោបាយវេជ្ជសាស្រ្ត ដើម្បីគាំទ្រដល់កិច្ចខិតខំប្រឹងប្រែងរបស់យោធា ក៏ដូចជាធានាថា យោធាត្រូវចូលរួមគោរពច្បាប់មនុស្សធម៌អន្តរជាតិ ។

ជាចុងក្រោយលោក Lowcock បានសង្កត់ធ្ងន់ទៅលើ សារៈសំខាន់ចាំបាច់នៃគណនេយ្យភាព ។ លោកបាននិយាយថា “ប្រសិនបើឧក្រិដ្ឋកម្មសង្រ្គាម មិនត្រូវបានបញ្ចប់ទេ អ្វីៗនឹងកាន់តែធ្ងន់ធ្ងរ ។ ការទទួលខុសត្រូវចំពោះការរំលោភបំពាន ត្រូវតែមានលក្ខណៈជាប្រព័ន្ធ និងជាសកល” ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ មេ UN ថា “យើងកំពុងធ្វើសង្គ្រាមប្រឆាំងកូវីដ” ហើយត្រូវប្រកាន់ខ្ជាប់ក្បួនសឹកបញ្ឈប់រោគរាតត្បាតមួយនេះ

ចុចអាន ៖ មេ WHO ព្រមានថា ពិភពលោកនឹងបន្តជួប “វីរុសដែលសាហាវជាងនេះ” ទាំងការឆ្លង និងស្លាប់ នាពេលខាងមុខ