កូរ៉េខាងត្បូង ឲ្យអ្នកចាក់វ៉ាក់សាំងដូសដំបូងរួច ដើរហើរដោយមិនចាំបាច់ពាក់ម៉ាស ចំណែកអ្នកចាក់ ២ ដូស អាចប្រមូលផ្ដុំគ្នាតាមកន្លែងនានា

រដ្ឋាភិបាលកូរ៉េខាងត្បូង បានប្រកាសថា អ្នកដែលបានទទួលការចាក់វ៉ាក់សាំង ការពារជំងឺកូវីដ ១៩ ដូសដំបូងរួចហើយ នឹងមិនតម្រូវឲ្យពាក់ម៉ាស់ ពេលចេញខាងក្រៅនោះទេ ហើយគោលការណ៍នេះនឹងអនុវត្តចាប់ពីខែកក្កដា តទៅ ។

រដ្ឋាភិបាលបានប្រកាសវិធានការ បន្ធូរបន្ថយការរឹតបន្តឹងនៅថ្ងៃពុធនេះ ។ វិធានការដែលរួមមានការដកបម្រាម លើការជួបជុំក្រុមគ្រួសារ សម្រាប់អ្នកដែលបានចាក់វ៉ាក់សាំងដូសដំបូង យ៉ាងហោចណាស់ ២ សប្តាហ៍ នឹងចាប់ផ្តើមពីខែមិថុនា ខណៈការប្រមូលផ្តុំបែបនេះ ត្រូវបានអនុញ្ញាតឲ្យមានរហូតដល់ ៨ នាក់ ។

ចំណែកអ្នកដែលបានចាក់វ៉ាក់សាំងដូសទី ២ យ៉ាងហោចណាស់ ២ សប្តាហ៍ ត្រូវបានគេរំពឹងថានឹងរួចផុតពីការរឹតត្បិត លើការប្រមូលផ្តុំនៅតាមកន្លែងនានា ដូចជា ភោជនីយដ្ឋាន និងសាលអាពាហ៍ពិពាហ៍ ចាប់ពីខែកក្កដា ទៅ ។

ប្រទេសកូរ៉េខាងត្បូងបានចាប់ផ្តើមយុទ្ធនាការចាក់វ៉ាក់សាំងនៅក្នុងខែកុម្ភៈ ដោយប្រើវ៉ាក់សាំង AstraZeneca និង Pfizer ។

រដ្ឋាភិបាលនិយាយថា ប្រជាជនប្រមាណ ៣.៩ លាននាក់ ឬ ៧.៧ ភាគរយនៃប្រជាជន បានទទួលការចាក់វ៉ាក់សាំង យ៉ាងហោចណាស់មួយដូស គិតត្រឹមថ្ងៃអង្គារ ខណៈអ្នកខ្លះហាក់ដូចជា មិនចង់ចាក់វ៉ាក់សាំងនោះទេ ។

គួរបញ្ជាក់ថា គិតត្រឹមពេលនេះ ប្រទេសកូរ៉េខាងត្បូង មានករណីឆ្លងជំងឺកូវីដ ១៩ សរុប ១៣៧,៦៨២ ករណី និងមានអ្នកស្លាប់ ១,៩៤០ នាក់ ខណៈមានអ្នកជាសះស្បើយ ១២៧,៥៨២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងត្បូង បន្តចាក់វ៉ាក់សាំង AstraZeneca កាន់តែធំ

ចុចអាន ៖ ប្រទេសមួយក្នុងតំបន់អាស៊ីត្រៀមផលិតវ៉ាក់សាំងកូវីដ Novavax នៅដើមខែមិថុនា