ទៀតហើយ! ក្រុមអាចារ្យនៅ ឥណ្ឌា បួងសួងសុំសេចក្តីមេត្តាពីព្រះអាទិទេព ជួយការពារកូវីដ ក្រោយអស់ជំនឿលើគ្រូពេទ្យ

ក្រុមអាចារ្យសាសនាហិណ្ឌូ នៅឯប្រាសាទមួយរបស់ប្រទេសឥណ្ឌា កំពុងធ្វើការបួងសួងរាល់ថ្ងៃចំពោះព្រះការពារជំងឺកូវីដ ១៩ ចំនួន ២ អង្គ នៅក្នុងកិច្ចប្រឹងប្រែងមួយដើម្បីទប់ទល់នឹងជំងឺរាតត្បាតនេះ ខណៈដែលប្រទេសនេះកំពុងតែប្រយុទ្ធនឹងការឆ្លងថ្មីៗ ។

រូបចម្លាក់ “Corona Devi” ចំនួន ២ អង្គត្រូវបានបង្កើតឡើងនៅភាគខាងត្បូងនៃទីក្រុង Coimbatore ក្នុងរដ្ឋ Tamil Nadu ដែលក៏រងការវាយប្រហារយ៉ាងធ្ងន់ធ្ងរដោយជំងឺកូវីដ ១៩ ដែរ ដោយក្នុងនោះបានសម្លាប់មនុស្ស ១០០,០០០ នាក់ ក្នុងរយៈពេលបួនសប្តាហ៍ចុងក្រោយនេះ ។

ប្រាសាទ Kamatchipuri Adhinam ត្រូវបានបិទសម្រាប់អ្នកគោរពបូជា ដោយសារតែអត្រាឆ្លងខ្ពស់របស់ទីក្រុង Coimbatore ប៉ុន្តែអាចារ្យកំពុងគោរពសក្ការៈ នៅចំពោះមុខព្រះដែលធ្វើពីឈើមួយ និងមួយទៀតធ្វើពីថ្ម ។

ពួកគេបានទុកអាហារ និងតង្វាយផ្សេងៗទៀត ហើយបន់ស្រន់បួងសួងដល់ព្រះ សុំឲ្យបញ្ឈប់រោគរាតត្បាត និងស្រង់ទឹកឲ្យរូបព្រះដោយទឹករមៀត និងទឹកដោះគោ ។

អ្នកគ្រប់គ្រងប្រាសាទលោក Anandbharathi បាននិយាយថា “យើងមានប្រាសាទស្រដៀងៗគ្នា សម្រាប់បួងសួងឲ្យជាជំងឺអុតស្វាយ និងប៉េស្តកាលពីអតីតកាល” ។

លោកបានបន្ថែមថា “យើងកំពុងគោរពបូជាវីរុសក្នុងទម្រង់ជាទេពធីតា ហើយអធិស្ឋានដល់ព្រះនាងរាល់ថ្ងៃ ដើម្បីកាត់បន្ថយផលប៉ះពាល់នៃជំងឺនេះ” ។

លោក Anandbharathi បានបន្តថា “សូម្បីតែគ្រូពេទ្យ ក៏មិនអាចដោះស្រាយ ស្ថានការណ៍ដ៏ធំធេងនេះបានដែរ ។ ដូច្នេះយើងងាកទៅរកជំនឿ និងព្រះជាមធ្យោបាយចុងក្រោយ” ។

ទន្ទឹមនោះ ក្រុមអាចារ្យដែលធ្វើពិធីនេះ គ្រោងនឹងបន្ដអធិស្ឋានរបស់ពួកគេ ដល់រូបព្រះ “Corona Devi” រយៈពេល ៧ សប្តាហ៍ទៀត ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ២៧ លានករណី និងមានអ្នកស្លាប់ ៣១៥,២៦៣ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ គ្រូល្បីឈ្មោះ ឥណ្ឌា អះអាងថា មនុស្សរាប់ម៉ឺននាក់ស្លាប់ដោយសារកូវីដ ព្រោះមិនជឿឱសថបុរាណ ផឹកតែថ្នាំសម័យទំនើប

ចុចអាន ៖ វីរុស​បំប្លែង​ខ្លួន ​ឥណ្ឌា កំពុង​សាយ​ភាយ​ដល់​ប្រទេស​ជាង ៥៣ ហើយ