ថៃ អនុម័តវ៉ាក់សាំង Sinopharm របស់ចិន មួយទៀតសម្រាប់ការប្រើប្រាស់ជាបន្ទាន់

មន្ត្រីជាន់ខ្ពស់មួយរូបបាននិយាយថា និយតករចំណីអាហារ និងឱសថ (FDA) របស់ប្រទេសថៃនៅថ្ងៃសុក្រនេះ បានអនុម័តវ៉ាក់សាំងចិន Sinopharm សម្រាប់ការប្រើប្រាស់ជាបន្ទាន់ ។

មន្ត្រីជាន់ខ្ពស់ផ្នែកសុខភាពលោក Paisan Dankhum បានប្រាប់សន្និសីទសារព័ត៌មានមួយថា FDA បានអនុម័តប្រើប្រាស់វ៉ាក់សាំង Sinopharm ហើយវាក្លាយជាវ៉ាក់សាំងការពារជំងឺកូវីដ ១៩ ទី ៥ ដែលថៃបានអនុញ្ញាត ។

ការអនុម័តនេះធ្វើឡើង ក្រោយក្រសួងសុខាភិបាលថៃនៅថ្ងៃសុក្រនេះ បានរាយការណ៍អំពីអ្នកស្លាប់ថ្មី ដោយសារជំងឺកូវីដ ១៩ ចំនួន ៣៤ នាក់ទៀត ដោយធ្វើឲ្យចំនួនអ្នកស្លាប់សរុប កើនដល់ ៩៥៤ នាក់ ។

ទន្ទឹមនោះ ថៃក៏បានប្រកាសពីការរកឃើញអ្នកឆ្លងថ្មីចំនួន ៣,៧៥៩ ករណីផងដែរ ដោយនាំឲ្យឆ្លងករណីសរុបកើនដល់ ១៤៤,៩៧៦ ករណី ។

ក្នុងចំណោមករណីសរុប ដែលត្រូវបានរកឃើញក្នុងរយៈពេល ២៤ ម៉ោងចុងក្រោយ មាន ២,៤៦៥ករណីគឺជាប្រជាជនទូទៅ និង ១,២៩៤ ករណីទៀតគឺជាការឆ្លងនៅក្នុងពន្ធនាគារ ។

គិតត្រឹមថ្ងៃព្រហស្បតិ៍ ប្រទេសអាស៊ីអាគ្នេយ៍មួយនេះបានចាក់វ៉ាក់សាំងចំនួន ៣.០២ លានដូសហើយ ។ ប្រទេសនេះគ្រោងនឹងចាប់ផ្តើមយុទ្ធនាការ ចាក់ថ្នាំបង្ការរោគដ៏ធំមួយនៅខែក្រោយ ហើយមានគោលបំណងចាក់វ៉ាក់សាំង ៧០ ភាគរយនៃប្រជាជនជិត ៧០ លាននាក់នៅចុងឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ The Star

ចុចអាន ៖ ទីបំផុត ក្រុមហ៊ុន Sinopharm បញ្ចេញរបាយការណ៍អំពីប្រសិទ្ធភាពវ៉ាក់សាំង ដល់ពិភពលោក

ចុចអាន ៖ ប្រទេសអ្នកមាន អារ៉ាប់រួម ត្រៀមចាក់វ៉ាក់សាំង Sinopharm ដល់ប្រជាជនចិនរស់នៅក្នុងទីក្រុងឌូបៃ