អាមេរិក ប្តេជ្ញាជួយ ឥណ្ឌា យកឈ្នះកូវីដ

រដ្ឋមន្រ្តីក្រសួងការបរទេសអាមេរិកលោក Antony Blinken បាននិយាយកាលពីថ្ងៃសុក្រទី២៨ខែឧសភាថា សហរដ្ឋអាមេរិកនិងឥណ្ឌាបានរួបរួមគ្នា ក្នុងការព្យាយាមដោះស្រាយការរីករាលដាលនៃជំងឺកូវីដ-១៩ ហើយទីក្រុងវ៉ាស៊ីនតោន ចង់បញ្ជាក់ថា ខ្លួននឹងចាត់វិធានការដើម្បីជួយដល់ប្រទេសឥណ្ឌាដែលកំពុងវិបត្តិជំងឺឆ្លងធ្ងន់ធ្ងរ។

រដ្ឋមន្រ្តីក្រសួងការបរទេសឥណ្ឌាលោក Subrahmanyam Jaishankar បានប្រាប់អ្នកយកព័ត៌មាន ពេលកំពុងឈរជាមួយលោក Blinken នៅឯក្រសួងការបរទេសអាមេរិកថា ប្រទេសឥណ្ឌា សូមថ្លែងអំណរគុណដល់សហរដ្ឋអាមេរិក ដែលបានគាំទ្រយ៉ាងខ្លាំងនិងមានសាមគ្គីភាព។

ស្របពេលជាមួយគ្នានោះ លោក Blinken បានថ្លែងថា “នៅថ្ងៃដំបូងនៃវិបត្តិកូវីដ-១៩ ប្រទេសឥណ្ឌាបានស្ថិតនៅទីនោះសម្រាប់សហរដ្ឋអាមេរិក ជាអ្វីដែលយើងមិនដែលភ្លេចឡើយ។ ហើយឥឡូវនេះ យើងចង់ធ្វើឲ្យប្រាកដថា យើងក៏នៅទីនោះសម្រាប់ប្រទេសឥណ្ឌាដែរ”។

ភាពជាដៃគូរវាងសហរដ្ឋអាមេរិកនិងឥណ្ឌាគឺសំខាន់ខ្លាំង និងមាន ផលិតភាពកាន់តែខ្លាំងឡើង។

ក្នុងខែនេះ ឥណ្ឌាដែលជាប្រទេសមានប្រជាជនច្រើនជាងគេលំដាប់ទី ២ លើពិភពលោក បានកត់ត្រាចំនួនអ្នកស្លាប់ដោយសារកូវីដ ខ្ពស់បំផុតចាប់តាំងពីរោគរាតត្បាតផ្ទុះឡើងក្នុងរយៈពេលជាងមួយឆ្នាំមកហើយ។

មានតែប្រមាណ ៣ ភាគរយប៉ុណ្ណោះនៃប្រជាជនឥណ្ឌាទាំង ១.៣ ពាន់លាននាក់ ដែលបានទទួលការចាក់វ៉ាក់សាំងពេញលេញ ដែលនេះជាអត្រាទាបបំផុតក្នុងចំណោមប្រទេសទាំង ១០ ដែលមានករណីជំងឺច្រើនបំផុត៕

ប្រែសម្រួល៖ Vann Vann

ប្រភព៖ CNA

ចុចអាន៖ ករណីឆ្លងកូវីដប្រចាំថ្ងៃនៅ ឥណ្ឌា ធ្លាក់ចុះទាបបំផុត ក្នុងរយៈពេលជាងមួយខែ