កូរ៉េខាងជើង បញ្ជាសម្លាប់សត្វឆ្មា និងព្រាប តាមតំបន់ព្រំដែនដើម្បីការពារកុំឲ្យផ្ទុះឆ្លងកូវីដ

គេហទំព័រកូរ៉េខាងជើង Daily NK បានរាយការណ៍ថា អាជ្ញាធរកូរ៉េខាងជើង បានបញ្ជាឲ្យសម្លាប់សត្វឆ្មា និងសត្វព្រាប នៅតាមតំបន់ព្រំដែន ដោយសារតែការភ័យខ្លាចផ្ទុះរោគរាតត្បាតកូវីដ ១៩ ។

យោងតាមប្រភពព័ត៌មានបានឲ្យដឹងថា វិធានការណ៍ផ្សេងៗទៀត ត្រូវបានណែនាំដោយអាជ្ញាធរ ក្នុងរយៈពេលប៉ុន្មានខែកន្លងមកនេះ ដែលរួមមានការបញ្ជាឲ្យសម្លាប់សត្វឆ្មាតាមផ្លូវ និងបាញ់សត្វឆ្មា ឬបក្សីណាដែលព្យាយាមឆ្លងកាត់ ព្រំដែនជាមួយប្រទេសចិន ។

របាយការណ៍បានលើកឡើងថា គ្រួសារមួយមកពីស្រុក Songhu របស់ទីក្រុង Hyesan នៃខេត្ត Ryanggang ប្រទេសកូរ៉េខាងជើង ត្រូវបានគេដាក់នៅក្នុងមណ្ឌលធ្វើចត្តាឡីស័ក សម្រាប់ការចិញ្ចឹមសត្វឆ្មា នៅក្នុងផ្ទះដោយសម្ងាត់ ។

ប្រភពបាននិយាយថា “ក្រុមគ្រួសារនោះ ត្រូវបានផ្តន្ទាទោសរយៈពេល ២០ ថ្ងៃនៅក្នុងការធ្វើចត្តាឡីស័ក ចំពោះការចិញ្ចឹមឆ្មាដោយខុសច្បាប់ នៅក្នុងតំបន់ព្រំដែនចិន-កូរ៉េខាងជើង” ។

ប្រភពបន្តថា ដំបូងឡើយក្រុមគ្រួសារនេះ បានប្រាប់អាជ្ញាធរថា ឆ្មារបស់ពួកគេបានងាប់ នៅពេលដែលមន្រ្តីបានចុះមកពិនិត្យមើល ថាតើពួកគេកំពុងទុកសត្វចិញ្ចឹមនោះឬអត់ ។ យ៉ាងណាក៏ដោយក្រោយមក សត្វនេះត្រូវបានគេប្រទះឃើញនៅក្បែរព្រំដែនចិន ហើយក្រុមគ្រួសារត្រូវបានដាក់រស់នៅដាច់ដោយឡែកជាបន្តបន្ទាប់ ខណៈដែលអាជ្ញាធរបានក្រវាត់ឆ្មានោះចោលផងដែរ ។

គួរបញ្ជាក់ថា កូរ៉េខាងជើង មិនមានករណីឆ្លងជំងឺកូវីដ ១៩ ត្រូវបានរកឃើញសូម្បីមួយករណី ចាប់តាំងពីមានការផ្ទុះឡើង នៃជំងឺរាតត្បាតជាសកលមួយនេះ ស្របពេលដែលអាជ្ញាធរបានដាក់ការរឹតត្បិតយ៉ាងតឹងរ៉ឹង ដើម្បីបញ្ឈប់ជំងឺនេះមិនឲ្យឆ្លងចូលប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កូរ៉េខាងជើង នៅតែបន្តវិធានការការពារតឹងរ៉ឹងជាមួយព្រំដែនចិន ទោះគ្មានករណីឆ្លងកូវីដសូម្បីមួយ