មិនញញើតដៃ! ត្រឹមរយៈពេលមួយខែឧសភានេះ ក្រុមតាលីបង់ សម្លាប់ ជនស៊ីល ២៤៨ នាក់

អ្នកនាំពាក្យក្រសួងមហាផ្ទៃអាហ្វហ្គានីស្ថានលោក Tariq Arian បាននិយាយកាលពីថ្ងៃអាទិត្យថា យ៉ាងហោចណាស់ជនស៊ីវិល ២៤៨ នាក់ត្រូវបានសម្លាប់ និង ៥២៧ នាក់ទៀតរងរបួស នៅក្នុងការវាយប្រហារដោយក្រុមតាលីបង់ រួមមានការបំផ្ទុះគ្រាប់បែកនៅតាមដងផ្លូវ ចាប់តាំងពីថ្ងៃទី ១ ខែឧសភា មក ។

អ្នកនាំពាក្យរូបនេះ បានចោទប្រកាន់គោលដៅរបស់តាលីបង់ ទៅលើជនស៊ីវិលថាជា ឧក្រិដ្ឋកម្មសង្គ្រាម ដោយនិយាយថា កងកម្លាំងការពារ និងសន្តិសុខនៅក្នុងប្រទេសអាហ្គានីស្ថាន តែងតែឆ្លើយតបចំពោះការវាយប្រហារបែបនេះ ។

ទន្ទឹមនោះ ពួកតាលីបង់បានបដិសេធ ការសម្លាប់ជនស៊ីវិលនេះ ប៉ុន្តែគ្រាប់បែកនៅតាមដងផ្លូវ ដែលត្រូវបានដាំ ដើម្បីវាយប្រហារទៅលើក្រុមសន្តិសុខ តែងតែត្រូវបានបញ្ជាក់ដោយក្រុមមួយនេះ ។

បន្ថែមពីនេះ អ្នកនាំពាក្យក្រសួងការពារជាតិអាហ្វហ្គានីស្ថាន លោក Fawad Aman បាននិយាយនៅលើ Twitter កាលពីថ្ងៃអាទិត្យថា នៅយប់ថ្ងៃសៅរ៍គ្រាប់រ៉ុកកែតមួយគ្រាប់ ដែលត្រូវបានបាញ់ដោយពួកតាលីបង់ បានវាយប្រហារនៅក្នុងពិធីមង្គលការមួយ នៅក្នុងខេត្ត Kapisa និងបានសម្លាប់ជនស៊ីវិលយ៉ាងតិច ៦ នាក់ និង ៤ នាក់ផ្សេងទៀតរងរបួស ។

លោក Aman បានបង្ហើបនៅក្នុងសារ Twitter កាលពីថ្ងៃអាទិត្យថា ប្រតិបត្តិការអាហ្វហ្គានីស្ថាន ចាប់តាំងពីថ្ងៃទី ១ ឧសភា បានសម្លាប់ និងធ្វើឲ្យសកម្មប្រយុទ្ធតាលីបង់ ១,៥០០ នាក់រងរបួស ។

គួររំឭកថា អំពើហិង្សាបានកើនឡើង ក្នុងប៉ុន្មានសប្តាហ៍ថ្មីៗនេះ នៅពេលដែលកងកម្លាំងរដ្ឋាភិបាល និងពួកតាលីបានប៉ះទង្គិច នៅក្នុងការប្រយុទ្ធគ្នាស្ទើរតែរាល់ថ្ងៃ នៅទូទាំងទីជនបទដែលមានព្រំប្រទល់ជាប់គ្នា ៕

ប្រែសម្រួលដោយ ៖ ជីវ័ន្ត

ប្រភព ៖ CGTN