ព័ត៌មានអន្ដរជាតិ

ហ្វីលីពីន បន្តបិទព្រំដែនសម្រាប់អ្នកដំណើរពីប្រទេសចំនួន ៧ ដល់ពាក់កណ្តាលខែមិថុនា ជាពិសេសការពារឆ្លងវីរុសបំប្លែងខ្លួន

បានផុស

៣ years មុន

នៅ

ថ្ងៃអង្គារ ១ មិថុនា ២០២១

ដោយ

លោក Harry Roque អ្នកនាំពាក្យប្រធានាធិបតី បាននិយាយកាលពីយប់ថ្ងៃចន្ទថា ព្រំដែនរបស់ប្រទេសហ្វីលីពីន នឹងនៅតែបិទសម្រាប់អ្នកដំណើរចូលមកពី ប្រទេសឥណ្ឌា ប៉ាគីស្ថាន ស្រីលង្កា បង់ក្លាដែស នេប៉ាល់ អូម៉ង់ និងអារ៉ាប់រួម រហូតដល់ថ្ងៃទី ១៥ ខែមិថុនា ។

លោក Roque បាននិយាយថា ប្រធានាធិបតីហ្វីលីពីនលោក Rodrigo Duterte បានយល់ព្រមលើការបន្ថែមការរឹតត្បិតនេះ ដើម្បីការពារការរីករាលដាល នៃវីរុសបំប្លែងខ្លួនដែលឆ្លងយ៉ាងឆាប់រហ័ស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយ រដ្ឋាភិបាលបានផ្អាកការចូលរបស់អ្នកដំណើរ ពីប្រទេសទាំង ៧ នេះ រហូតដល់ថ្ងៃទី ៣១ ខែឧសភា ប៉ុណ្ណោះ ខណៈបានដាក់ការរឹតត្បិត លើការធ្វើដំណើរពីប្រទេសឥណ្ឌា ចាប់ពីថ្ងៃទី ២៩ ខែមេសា ដោយសារតែការកើនឡើង នៃករណីឆ្លងកូវីដមិនធ្លាប់មានពីមុនមក នៅក្នុងប្រទេសនោះ ។

ទន្ទឹមនោះ ប្រទេសហ្វីលីពីន ក៏បានពង្រីកការហាមឃាត់របស់អ្នកដំណើរ មកពីប្រទេសបង់ក្លាដែស នេប៉ាល់ ប៉ាគីស្ថាន និងស្រីលង្កា ចាប់ពីថ្ងៃទី ៧ ឧសភា ។

បន្ថែមពីនេះ ប្រទេសហ្វីលីពីន ក៏បានហាមឃាត់ការធ្វើដំណើរអន្តរជាតិ ពីប្រទេសអូម៉ង់ និងអារ៉ាប់រួម ដោយបានចាប់ផ្តើមពីថ្ងៃទី ១៥ ខែឧសភា បន្ទាប់ពីពលករហ្វីលីពីននៅក្រៅប្រទេស ដែលបានហោះហើរពីប្រទេសទាំងពីរនេះ បានធ្វើតេស្តវិជ្ជមានវីរុសកូវីដបំប្លែងខ្លួនថ្មី ។

គួរបញ្ជាក់ថា គិតត្រឹមពេលនេះ ប្រទេសហ្វីលីពីន មានករណីឆ្លងកូវីដ ១៩ ជាង ១.២៣ លានករណី និងមានអ្នកស្លាប់ចំនួន ២០,៩៦៦ នាក់ ៕