កូវីដផ្ទុះខ្លាំង វៀតណាម ចេញបញ្ជាមួយ អ្នកប្រើប្រាស់ទូរស័ព្ទទំនើបមិនធ្វើតាម ត្រូវពិន័យ

ស្របពេលករណីឆ្លងជំងឺកូវីដ-១៩កំពុងផ្ទុះឡើងខ្លាំងនៅវៀតណាម ក្រសួងសុខាភិបាលរបស់ប្រទេសនេះ បានអនុម័តនូវសេចក្តីណែនាំថ្មីមួយ ដែលបង្ខំឲ្យមានការដំឡើងកម្មវិធីបញ្ជាក់សុខភាពនិងតាមដានទំនាក់ទំនង នៅលើឧបករណ៍ឆ្លាតវ័យ។

យោងតាមបទបញ្ជានេះ, បុគ្គលរូបណាដែលកាន់កាប់ទូរស័ព្ទទំនើប ប៉ុន្តែមិនបានដំឡើងកម្មវិធីបញ្ជាក់សុខភាពដែលតម្រូវដោយច្បាប់ នឹងត្រូវផាកពិន័យ។

ទោះបីជាយ៉ាងណាក៏ដោយ ក្រុមមន្ត្រីមិនបានប្រាប់ទេថា តើការពិន័យនោះជាអ្វី។ 

មន្ត្រីម្នាក់បានប្រាប់កាសែត Tuoi Tre ថា មន្រ្តីក្រសួងសុខាភិបាលបានធានាថា បទបញ្ជាថ្មីនេះគឺជាការលើកទឹកចិត្តឲ្យសាធារណជន ដំឡើងកម្មវិធីបញ្ជាក់សុខភាពនៅក្នុងទូរស័ព្ទដៃដែលកម្មវិធីមាន៣ដូចជា tokhaiyte.vn, NCOV, និង Bluezone។

សម្រាប់ពេលនេះ ការបញ្ជាក់អំពីសុខភាព គឺជាកត្តាចាំបាច់នៅតាមទីសាធារណៈដូចជានៅអាកាសយានដ្ឋាន តំបន់ទេសចរណ៍និងមន្ទីរពេទ្យជាដើម។

សារាចរណែនាំនេះ ក៏បានជំរុញឲ្យប្រជាពលរដ្ឋ អាជីវកម្មនិងទីកន្លែងនានាប្រើប្រាស់កម្មវិធីបញ្ចាក់សុខភាពផងដែរ ដើម្បីតាមដានហានិភ័យនៃការឆ្លងរោគពីទំនាក់ទំនងជិតស្និទ្ធ។

គួរបញ្ជាក់ថា គិតត្រឹមរសៀលថ្ងៃអង្គារ ប្រទេសវៀតណាមបានកត់ត្រា ការឆ្លងជំងឺកូវីដ-១៩ចំនួន៧,៤៨២ករណី ខណៈមានអ្នកជាសះស្បើយ ៣,០៤៣នាក់និងស្លាប់ ៤៧នាក់៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ថ្ងៃស៊យ! ប៉ូលិសវៀតណាមមួយក្រុម ផាកពិន័យអ្នកល្មើសច្បាប់ចរាចរណ៍ ប៉ះចំអ្នកកើតកូវីដ