វៀតណាម ញាប់ដៃញាប់ជើងរកជំនួយវ៉ាក់សាំងការពារកូវីដពី ជប៉ុន

រដ្ឋាភិបាលជប៉ុន កំពុងពិចារណាលើផែនការ ដើម្បីផ្តល់វ៉ាក់សាំងការពារជំងឺកូវីដ ១៩ ដល់វៀតណាម បន្ទាប់ពីប្រទេសនេះ បានស្នើសុំជំនួយ ក្នុងការជំរុញយុទ្ធនាការចាក់វ៉ាក់សាំង ក្រោយផ្ទុះករណីឆ្លងសាជាថ្មី ។

ការស្ទង់មតិដោយអ្នកស្រាវជ្រាវ នៃសាកលវិទ្យាល័យ Oxford និងអ្នកដទៃទៀតបង្ហាញថា រហូតមកដល់ពេលនេះ ប្រជាជនវៀតណាម មានតែជាង ១ ភាគរយប៉ុណ្ណោះ បានទទួលការចាក់វ៉ាក់សាំង យ៉ាងហោចណាស់ ១ ដូសកាលពីថ្ងៃព្រហស្បតិ៍ ។

ការស្ទង់មតិបង្ហាញទៀតថា តួលេខនេះទាបបំផុត ក្នុងចំណោមសមាជិកទាំង ១០ នៃសមាគមប្រជាជាតិអាស៊ីអាគ្នេយ៍ (អាស៊ាន) ។

ប្រសិនបើសំណើរផ្ដល់ជំនួយនេះ កើតឡើងមែន ជប៉ុនចង់បញ្ជូនវ៉ាក់សាំងនៅដើមខែនេះ ដោយមិនឆ្លងកាត់ ក្របខ័ណ្ឌចែកចាយអន្តរជាតិនោះទេ ខណៈក្រុមមន្ត្រីនិយាយថា ដោយសារវាត្រូវការពេលយូរជាងនេះ ។

គួរបញ្ជាក់ថា រដ្ឋាភិបាលជប៉ុន មានគោលការណ៍បញ្ជូនវ៉ាក់សាំង ដែលមានក្នុងស្តុកទៅបរទេស ខណៈប្រទេសនេះ ក៏បានបរិច្ចាគវ៉ាក់សាំង AstraZeneca ប្រមាណ ១.២ លានដូស ដល់កោះតៃវ៉ាន់ផងដែរ កាលពីថ្ងៃសុក្រ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជប៉ុន ​ផ្តល់​វ៉ាក់​សាំង​ AZ​ ១.២៤​លាន​ដូស​ឥត​គិត​ថ្លៃ​ដល់​តៃវ៉ាន់​ រំពឹង​ដល់​ល្ងាច​នេះ