រន្ធត់! រថភ្លើង ២ គ្រឿងបុកគ្នានៅ ប៉ាគីស្ថាន ស្លាប់ និងរបួសមនុស្សជាង ១០០ នាក់

យ៉ាងហោចណាស់មនុស្ស ៣២ នាក់បានស្លាប់ និងរងរបួសជាច្រើននាក់ បន្ទាប់ពីរថភ្លើងបុកគ្នា នៅជិតទីក្រុង Dharki ភាគខាងត្បូងនៃប្រទេសប៉ាគីស្ថាន ខណៈការងារជួយសង្គ្រោះនៅតែបន្ត ដើម្បីស្វែងរកអ្នកនៅរស់ ដែលជាប់នៅក្នុងគំនរបាក់បែក ។

ក្រុមមន្ត្រីបាននិយាយថា ការបុកគ្នានេះ បានកើតឡើងនៅព្រឹកថ្ងៃចន្ទនេះ នៅជិតទីក្រុង Dharki ដែលមានចម្ងាយប្រហែល ៤៤០ គីឡូម៉ែត្រ ភាគខាងជើងទីក្រុងការ៉ាជី របស់ប្រទេសប៉ាគីស្ថាន ។

លោក Manzoor Jakhrani មន្ត្រីសុខាភិបាលជាន់ខ្ពស់បាននិយាយថា “វាជាស្ថានភាពធ្ងន់ធ្ងរ ។ សាកសពចំនួន ៣២ នាក់ ត្រូវបានគេរកឃើញ ហើយអ្នករងរបួសមាន ៩៨ នាក់ ខណៈចំនួនអ្នកស្លាប់អាចនឹងបន្តកើនឡើង ខណៈការងារជួយសង្គ្រោះកំពុងតែបន្ត ហើយប្រជាជននៅតែជាប់ក្នុងរថភ្លើងនៅឡើយ” ។

រូបភាពពីទូរទស្សន៍នៅកន្លែងកើតហេតុ បានបង្ហាញពីបំណែក នៃរថភ្លើងទាំង ២ ដែលបានបុកនៅលើផ្លូវដែក ខណៈក្រុមអ្នកជួយសង្គ្រោះបានប្រើឧបករណ៍ស្ទូច និងឧបករណ៍ផ្សេងទៀត ដើម្បីព្យាយាម និងទៅដល់អ្នកដែលជាប់នៅខាងក្នុង ។

ទន្ទឹមនោះ មន្ត្រីក្នុងតំបន់លោក Razzaq Minhas បានប្រាប់សារព័ត៌មាន Al Jazeera ថា គ្រោះថ្នាក់នេះបានកើតឡើង នៅពេលដែលរថភ្លើងទូ ៨ របស់ក្រុមហ៊ុន Millat Express បានបើកធ្លាក់ផ្លូវក្បែរទីក្រុង Dharki ។ លោកបាននិយាយថា ចំណែករថភ្លើងដឹកអ្នកដំណើរ Sir Syed Express ស្ថិតនៅភាគខាងត្បូង បន្ទាប់មកបុកនឹង ទូរថភ្លើងដែលខូចខាតនោះ ។

បន្ថែមពីនេះយោធាប៉ាគីស្ថាន បាននិយាយថា ខ្លួនបានបញ្ជូនឧទ្ធម្ភាគចក្រ រថយន្តសង្គ្រោះបន្ទាន់ និងក្រុមរុករក ក៏ដូចជាអ្នកជំនាញជួយសង្គ្រោះ ទៅកាន់កន្លែងកើតហេតុ ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ថភ្លើង ២ គ្រឿងបុកគ្នា កក្រើកទីក្រុង គូឡាឡាំពួរ

ចុចអាន ៖ រថភ្លើង​បុក​គ្នា​នៅ ​អេហ្ស៊ីប​ សម្លាប់​មនុស្ស​ ៣២ ​នាក់​ របួស​​ច្រើន​នាក់​