ព័ត៌មានអន្ដរជាតិ

ក្រៅពីអង្វរប្រទេសអ្នកមាន ឥឡូវ មេ WHO ជំរុញក្រុមហ៊ុនផលិតចែកវ៉ាក់សាំង៥០%ដល់ Covax

បានផុស

៤ years មុន

នៅ

ថ្ងៃអង្គារ ៨ មិថុនា ២០២១

ដោយ

អង្គការសុខភាពពិភពលោក (WHO) នៅថ្ងៃចន្ទ ទី៧ ខែមិថុនាបានទទួចឲ្យក្រុមហ៊ុនផលិតវ៉ាក់សាំងការពារកូវីដ-១៩ផ្តល់ឲ្យគម្រោង COVAX ទទួលបានសិទ្ធិទិញមុនគេ ឬប្តេជ្ញាផ្តល់ចំនួនពាក់កណ្តាលនៃបរិមាណរបស់កម្មវិធីសកល។

អគ្គលេខាធិការ WHO លោក Tedros Adhanom Ghebreyesus បាននិយាយថា ក្រុមហ៊ុនផលិតវ៉ាក់សាំងគួរយកចិត្តទុកដាក់ចំពោះកម្មវិធី Covax ដែលពិបាកក្នុងការទទួលបានវ៉ាក់សាំងដែលគេបរិច្ចាគឲ្យដើម្បីចែកទៅប្រទេសក្រីក្រ។

លោក Tedros បង្ហាញការខកចិត្តថា បណ្តាក្រីក្រមិនទាន់ទាំងបានចាក់វ៉ាក់សាំងដល់បុគ្គលិកសុខាភិបាល មនុស្សវ័យចំណាស់ និងប្រជាជនដែលងាយរងគ្រោះដោយសារកូវីដ-១៩ផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា ស្របពេលជាមួយគ្នានេះ ប្រទេសអ្នកមានបានកំពុងទិញវ៉ាក់សាំងដើម្បីចាក់ដល់ប្រជាជនរបស់ខ្លួនរហូតដល់ចាប់ផ្តើមចាក់ដល់កុមារថែមទៀត។

Tedros បានអំពាវនាវឲ្យមានការខិតខំប្រឹងប្រែងជាសកលឲ្យបានខ្លាំងក្លាដើម្បីចាក់វ៉ាក់សាំងការពារកូវីដ-១៩ហោចណាស់១០%ដល់ប្រជាជនគ្រប់ប្រទេសទាំងអស់ក្នុងពិភពលោកបានត្រឹមខែកញ្ញា និងហោចណាស់បាន៣០%បំណាច់ឆ្នាំនេះ។

ដើម្បីបំពេញតាមការអំពាវនាវរបស់លោកគឺត្រូវការវ៉ាក់សាំងចំនួន២៥០លានដូសបន្ថែមទៀតត្រឹមខែកញ្ញា ហើយ១០០លានដូសនៅក្នុងខែមិថុនា និងកក្កដា។

លោកអគ្គលេខាធិការអង្គការសុខភាពពិភពលោក Tedros ប្រាប់អ្នកសារព័ត៌មានថា ៖«ចុងសប្តាហ៍នេះ មេដឹកនាំបណ្តាប្រទេសអ្នកមាន G7 នឹងជួបគ្នាក្នុងកិច្ចប្រជុំកំពូលប្រចាំឆ្នាំរបស់ពួកគេ។ ប្រទេសទាំងនេះមានអំណាចដើម្បីបំពេញតាមតម្រូវការទាំងនេះ»។

«ខ្ញុំសូមអំពាវនាវដល់ប្រទេសអ្នកមាន G7 មិនមែនគ្រាន់តែប្តេជ្ញាចែករំលែកដូសប៉ុណ្ណោះទេ ប៉ុន្តែត្រូវប្តេជ្ញាចែករំលែកវ៉ាក់សាំងនៅខែមិថុនា និងកក្កដានេះ»។

លោកបន្តថា ៖«ខ្ញុំក៏អំពាវនាវដល់បណ្តាក្រុមហ៊ុនផលិតទាំងអស់ឲ្យផ្តល់សិទ្ធិទិញមុនគេដល់គម្រោង Covax សម្រាប់ចំនួនវ៉ាក់សាំងការពារកូវីដ-១៩ថ្មី ឬក៏ប្តេជ្ញាចែកវ៉ាក់សាំងរបស់ពួកគេ៥០%ដល់ Covax ក្នុងឆ្នាំនេះ»។

គម្រោង Covax របស់អង្គការសុខភាពពិភពលោកត្រូវបានបង្កើតឡើងដើម្បីធានាបាននូវការផ្គត់ផ្គង់វ៉ាក់សាំងឲ្យបានស្មើគ្នា ជាពិសេសដល់បណ្តាប្រទេសដែលមានប្រាក់ចំណូលទាប និងមធ្យម ហើយរហូតដល់ពេលនេះទើបតែចែកបានប្រមានជាង៨០លានដូសប៉ុណ្ណោះដល់ប្រទេស និងតំបន់ជាង១២៩៕

ប្រែសម្រួល៖ វីរបុត្រ
ប្រភព៖ reuters