វីដេអូស្ដែងៗ អាមេរិក ជោគជ័យប្រើយន្តហោះដ្រូនចាក់បំពេញប្រេងសាំងឲ្យយន្តហោះចម្បាំងនៅពាក់កណ្ដាលអាកាស

បញ្ជាការទ័ពអាកាសអាមេរិក និងក្រុមហ៊ុន Boeing បានប្រកាសកាលពីថ្ងៃចន្ទថា យន្តហោះប្រភេទ MQ-25A Stingray របស់កងទ័ពជើងទឹកអាមេរិក បានទទួលជោគជ័យក្នុងការចាក់បំពេញបន្ថែម ប្រេងសាំងនៅពាក់កណ្តាលអាកាស ជាលើកដំបូងតាមរយៈយន្តហោះដ្រូន ។

ការធ្វើតេស្តប្រភេទដំបូងនេះ បានធ្វើឡើងនៅអាកាសយានដ្ឋាន MidAmerica ក្នុងទីក្រុង Mascoutah រដ្ឋ Illinois កាលពីសប្តាហ៍មុន ខណៈវីដេអូដែលបានផ្សព្វផ្សាយនៅសប្តាហ៍នេះ បង្ហាញពីយន្តហោះចម្បាំងគ្មានមនុស្សបើក កំពុងចាក់បំពេញបន្ថែមប្រេងសាំង ដល់យន្តហោះចម្បាំង F/A-18 Super Hornet ។

យន្តហោះប្រភេទ Stingray ត្រូវបានគេមើលឃើញ បញ្ចេញបំពង់ទុយយោរបស់ខ្លួន ដើម្បីបញ្ជូនប្រេងសាំងទៅឲ្យយន្តហោះចម្បាំង ។ ការធ្វើសមយុទ្ធនេះ តម្រូវឲ្យមានចម្ងាយ ៦.១ ម៉ែត្រ រវាងយន្តហោះដ្រូន និងបំពង់ប្រេងសាំងរបស់យន្តហោះ Super Hornet ។

ការធ្វើតេស្តដ៏ជោគជ័យនេះ បានកើតឡើង បន្ទាប់ពីការហោះហើរសាកល្បងចំនួន ២៥ ដង ខណៈការធ្វើតេស្តបន្ថែមទៀត ត្រូវបានគេរំពឹងថានឹងធ្វើឡើង នៅចុងឆ្នាំនេះ ហើយកងនាវាចរអាមេរិក គ្រោងនឹងទិញយន្តហោះ MQ-25A ចំនួន ៧២ គ្រឿងទៀត ក្នុងតម្លៃប្រមាណ ១.៣ ពាន់លានដុល្លារ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កងទ័ពជើងទឹក អាមេរិក បញ្ចេញវីដេអូធ្វើសមយុទ្ធ និងឃ្លាំមើលនាវាដឹកយន្តហោះចិននៅសមុទ្រចិនខាងត្បូង