ក្រៅពីវ៉ាក់សាំង មានហេតុផល១ទៀត នាំឲ្យមនុស្សពេញវ័យ ៨០ភាគរយនៅអង់គ្លេស ដុះអង់ទីគ័រប្រឆាំងជំងឺកូវីដ-១៩

មនុស្សពេញវ័យ៨នាក់ក្នុងចំណោម១០នាក់នៅប្រទេសអង់គ្លេស ឥឡូវនេះមានសញ្ញានៃភាពស៊ាំទៅនឹងមេរោគឆ្លងកូវីដ-១៩ ដោយសារតែការចាក់វ៉ាក់សាំងឬធ្លាប់ឆ្លងជំងឹនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យធ្វើតេស្តឈាម ដែលវិភាគដោយការិយាល័យស្ថិតិជាតិ (ONS) បានប៉ាន់ប្រមាណថា មនុស្សពេញវ័យ ៨០,៣ ភាគរយនៅទូទាំងប្រទេស មានអង់ទីគ័រកូវីដ គិតត្រឹមសប្តាហ៍ទី ៣ នៃខែឧសភា ពោលគឺកើនឡើងពី ៧៦ ភាគរយ កាលពីចុងខែមេសា។

ទោះបីជាយ៉ាងណាក៏ដោយ គេនៅតែមានការភ័យខ្លាចថា អង់ទីគ័រដែលបង្កើតឡើងពីការចាក់វ៉ាក់សាំងឬវីរុសចាស់ នឹងមិនមានប្រសិទ្ធភាពទេ ប្រឆាំងនឹងវីរុសឥណ្ឌាឬមានឈ្មោះថ្មីថា Delta ប៉ុន្តែពួកគេនៅតែបង្ហាញការការពារដល់មនុស្សភាគច្រើន។

យោងតាមរដ្ឋមន្ត្រីក្រសួងសុខាភិបាលអង់គ្លេស លោក Matt Hancock បានឲ្យដឹងថា រហូតមកដល់ពេលនេះ មានតែមនុស្សបីនាក់ប៉ុណ្ណោះដែលចាក់វ៉ាក់សាំងពីរដូសហើយ ត្រូវបានបញ្ជូនទៅមន្ទីរពេទ្យដោយសារវីរុសឥណ្ឌា។

កម្មវិធីចាក់វ៉ាក់សាំងដ៏ធំរបស់ប្រទេសនេះ គឺជាកម្លាំងជំរុញដ៏សំខាន់​ នៅពីក្រោយការកើនឡើងនៃចំនួនមនុស្សដែលបង្ហាញពីភាពស៊ាំ។

នៅទូទាំងចក្រភពអង់គ្លេស ប្រជាជនចំនួន ៤០.៦ លាននាក់ យ៉ាងហោចណាស់ទទួលបានវ៉ាក់សាំងដូសទី១ ពោលគឺច្រើនជាង ៣ ភាគ ៤ នៃមនុស្សពេញវ័យទាំងអស់ ហើយ ២៨.២ លាននាក់ ទទួលបានវ៉ាក់សាំងពេញ២ដូស ដែលផ្តល់ការការពារអតិបរមាដល់ពួកគេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ្នកជំងឺស្រាល មានអង់ទីគ័រប្រឆាំងវីរុសបាន ១១ខែ ឬមួយជីវិតតែម្ដង ក្រោយជាសះស្បើយពីកូវីដ